الله على آيام ٍ مضت يا خساره=وقت ٍ مضى مبطي ولا آظنه يْعود
في وقت كان الجار أخو ٍ لجاره=والطيْب معطوف ٍ على الخير والجود
والود بين الناس صنو التجاره=والعِرف بين الخلق ماهو بمجحود
وكلمة الرجّال بنت ٍ لآفكاره=لا قالها تثْبت ولا تنقض عْهود
وكبير السّن فيه سمْت وْوقاره =كل ٍ يجلّه لا ولا فيه منقود
والطفل امْحدّداً له سكّة مساره=بالتربيه الحسْنه عليها من مْهود
والحُرمه ترعى بيتها بْكل شطاره=لعيالها تبذل لهم كل مجهود
وكل صبي امصاحب عيال حاره=كما الآخوان ولا يفرّقهم صْدود
وحصه وتهاني مع جواهر وساره=ومنيره ونوره ومزنه مع نْجود
والضيف ضيف الله و زاير لداره =له الكرامه والحشيمه على زود
يلقى ترحيب ٍ مع جميل العباره=يا مرحبا ويا مسهلا سْهود ومْهود
له جلسة ٍ في مجلسه بالصداره=مع دلة الرسلان والقدع مزنود
يعطيهم الآخبار وينفض غْباره=طبيعة الخلان يرقى بها سْنود
نالوا المعالي كلها عن جداره=وآمثالهم في وقتنا شِبْه مفقود

’،
جوهر الراوي

سلمت يداك
صح لسااااانك مدد بليااا عدد
تقديري واحترامي وامتناني
لشخصك وبوحك
ذكرى الغالي