مجموعه من قصائد الشاعر حامد زيد
1/ أربـــع خـنــاجــر....
مشكلة لا جات حاجتك بيدين البخيل
ما يفكك لين تدفع كثر ما يدفعه
و مشكلة لا صرت مطعون بكفوف الدخيل
في ظهرك أربع خناجر و بالصدر أربعه
و مشكله لا ضاق بالوقت رجالٍ ثقيل
يطلب أحبابه و عيا زمانه ينفعه
ليت ربي ما يحاسب خليلٍ من خليل
دام ما للحظ فزعة و للوجه أقنعه
دام ما للعذل تالي و ما بالحيل حيل
الغلا سمٍ نذوقه و مُرٍ نجرعه
نحتري فيه اللقا و الحصيل اهوَ الحصيل
مثل حلمٍ ما تحقق و عييت أقطعه
كني اللي حط بشفاه من جمر المليل
لا قدر يرميه للناس و ازرى يبلعه
و الظروف اللي حدتني لنيران و فتيل
عرضت دمع المحاجر لشيٍ يجزعه
و المدامع بالغلا لا تحال و لا تحيل
و المشاكل كل ماجات جات مجمعه
أعذلوني عن هوى النفس و عيوني تخيل
في حبيبٍ ما تركته و لازلت اتبعه
مغرمٍ في حب مثله و لا أرضى له بديل
عيني تشوفه و قلبي يجوع و يشبعه
ذاك كل ما زان بالي و طالعت النخيل
ما ذكرت الاّ ثباته بوقت الزعزعه
ما هو إلا قطعةٍ من حشا قلبٍ عليل
و ماني الا قطعةٍ منه مخلوقٍ معه
لا جميلٍ شفت قبله و لا بعده جميل
العذارى رهن رمشه و انا رهن أصبعه
و الله انه لو طلبني طلوع المستحيل
ل اطلعه منّيه مناك يعني لطلعه
ما علي من الملامه و لا هرج الهبيل
ما أشجع الرجال لا ثار غيره ما أشجعه
في عيون اللي عشقني و لا جاني هزيل
الله اللي حط عشقه بقلبي و ازرعه
لو سكت ينطق له الصم و الدنيا تسيل
و ان حكى لو يمشي المزن يوقف يسمعه
سلسبيلٍ من شفاته يخالط سلسبيل
معمعه بسكات و احلى سكات بمعمعه
ما هقيت ان أكثر الليل يمرح بالجدايل
لين شفته شوف عيني بكفه يرفعه
و إن حييت و ما بقى لي معه كود ليل
لسهره بأول غروبه و اموت بمطلعه
و الله ان العشق جمره و طاحت بالشليل
و ان حصل ما طاعك الوقت بحبابك طعه
و منهو اللي علم أعداي نكران الجميل
و منهو الي خان خلي و حاول يقنعه
كل عاذل ردني عنك يالطرف الكحيل
يا عسى الله يقلعه يا عسى الله يقلعه
يا معرض قلب الأحباب للدرب الطويل
السعه لا بارك الله بالضيق السعه
و الله أن الوقت قاسي و أنا ماني ذليل
و أشهد ان الرجل مرات ظنه يخدعه
و أنتم تعذلون خفاق بعيون العديل
ما رحمتم نار جرحه و غيرة مدمعه
و السوالف ليلها ليل و الحايل يحيل
و المشاكل مشكله مشكله متجمعه
مشكله لا خانك الوقت بالحمل الثقيل
لو زرعت الزرع هوج العواصف يشلعه
و مشكله لا صار عاذلك ما يبرد غليل
لا ترده طيب كلمه و لا حدٍ يمنعه
و مشكله لا صرت مطعون بكفوف الدخيل
في ظهرك أربع خناجر و بالصدر أربعه
2/الـكـذب خـيـبـة.....
روحي وهالمرّه خلاص لاتردين
هذا الفراق وروحةٍ دون رده
الكذب خيبه ماعرفتي تحبين
ما أنتي من إلى يستحق المودّه
ماتعرفين الحب والعطف واللّين
ولا عاد في قلبي على الحب شده
3/صـوت الـفـنـاجـيـل....
ياحبيبي لاتواعد مواعيد وتغيب
دامك تقول المواعيد من غير شهوه
والله إني من عرفتك وسميتك حبيب
أسمع بصوت الفناجيل وماشفت قهوه
4/أثـنـى عـشـر شـهـر....
التحدي والتصدي عادة القلب الصبور
والصمود اقرب مسافة لكن الفترة دهر
والخساير عاندتني حوطتني بلف سور
والخيانه للامانه زودت قلبي قهر
كنت ابقدم للنهاية لكن الدنيا تدور
وقفت وياي ليلة وكتمل ضدي شهر
كل ماطلت الحقيقة وامتلا قلبي سرور
طاولتني من عذولي طعنة وسط الظهر
حرت اميز في دروبي بين نار وبين نور
بين هجعة ليل ولا صحوة اجفان وسهر
خانت ظنوني وعيوني خانني ذاك الشعور
اقطف الشوكة بكفي واحسب الشوكة زهر
مشتهر بلسان صادق ماحكيت الصدق زور
ولا حكي عني لساني ولا جهرت ولا جهر
كم كتمت السد وافي خايف اعصابي تثور
لين باح السد لما مدمعي بان وظهر
ولا طوت رجلي مسافة ولا اثر فيني شهور
ولا كوت قلبي حريقة ولا طفلي ضوى نهر
معتري درب النهاية بعبر ضفاف البحور
واشبك الدنيا بكفي وادفع ايامي مهر
ودام هذا عنفواني واضح بين السطور
من يلوم الدرب فيني لو قهرته او انقهر
وبتدى مرة جديدة ودام انا قلبي جسور
تجربة والعمر مرة والسنة اثنا عشر شهر
5/يـجـيـنـي يـوم وعـطـيـهـا....
انا ما اخطيت في حقك ولكن الكلام عتاب
أعاتب والعتب كلمة تفسرها معانيها
اعاتب واحسب بهرجي الا مني حكيت حساب
وكلمه يستحي منها لساني يبتدى فيها
واذا انت من العتب تزعل علينا وابتصك الباب
ترى ما نيب قاصدها ولاني فيك ناويها
ولا ودى على الفرقا وقلبي داخلي مرتاب
اشوف ان الهوى خدعة واشوف القلب راضيها
واشوف ان الهوى فرقا مواليف وعناد احباب
واشوف ان الجفا خطوة ولاني قادر اخطيها
وقلبي لو عشق يخلص ولو طالت عليه رقاب
وتشهد له دروب الحب حاضرها وماضيها
عشقنا والهوى حسرة،مشينا ولاأمل كذا
بدينا نانبني منها قليل من بلاويها
عرفت الحب من عمري صغير بالغرام وشاب
وقلبي للحبيب اكبر من الدنيا وما فيها
صحيح انى نويت ابعد ولكن الهوى غلاب
وهي رحلة بديت بها ولا ادري كيف بنهيها
تحريتك شروق الشمس وشفتك للشروق غياب
ولا اضنك تبيع العشره اللي كنت شاريها
بقى لي بالهوى نظرة وتغريبة ودمع اهداب
وقصة بترك لسانك على العذال يرويها
واناجي باقي حروفي وبألف للفراق كتاب
قصايد تملي اوراقي ارددها واغنيها
واذا مرتني الذكرى وجرحي بالحشا ما طاب
بتبعدني وتدنيني وببعدها وابدنيها
وانا عيب علي اشكي من الدنيا بدون اسباب
مدامي ما خذ منها يجيني يوم واعطيها
6/خـطـاكـ الـــســو....
لأن الدمع ما يسخي عطاه إلا على الأحباب
ترى ما للهدب دمع صدوق إلا مع أحبابه
ومدام أن الدموع أصدق تعابير الحزن بأهداب
حرام أن الدموع تجف طليلة فترة غيابه
هذاك اللي شعل شمعة ضوت كل الدروب وذاب
فقد رمل الوطن دوسة قدمه وعطر ترحابه
فقده من الثرى ضيق وتراحيب وسهل وهضاب
فقده من الوطن حتى عذوبة ماه واعشابه
يغيبه المرض عنا وكنه بيننا ما غاب
بعيد وشعبه الوافي عليه أقرب من ثيابه
سكن باهدابنا حتى يلامس رعشة الأعصاب
فرش بدروبنا قلبه ولف الشعب بأهدابه
تضيق ابنا الدروب ونرتجي في وجهه الترحاب
حشا كن الشوارع ماتمر إلا على بابه
من أول ما حكم وأسس ومسس للثبات أطناب
سجد قلبه على ملة رسول الله وكتابه
غرس فينا الوفا نبته مثل ماتنبت الأعشاب
وقال إن الثرى له حق نشقى له ونشقى به
وطن ما به وطن غيره..ولا غير التراب تراب
مادام الله خلق دون البلاد سباع وذيابه
عرفت أنه يهاب أنه يهاب وما يعرف يهاب
يحفظ الدار يوم الجار ثار وكشر انيابه
وقف للعالم بأسره وقوف الفاقد الطلاب
خطب خطبة شجاع وفزز التأييد بخطابه
عتق دمعة فرح تلبس لميعاد الرجوع ثياب
حشا كن الدموع تعرف علم الغيب واسبابه
خطاك السو وعيون الحسود وهرجة الكذاب
وتعدتك المنايا يا ظلال الشعب وحجابه
فبعدك يا طويل العمر يبقون القراب أغراب
وترى يا شيخ ما كل القلوب البيض تتشابه
يقولون الغلا واحد وأنا قايل: شجاب لجاب؟
هذاك الشيخ جابر غير..ذاك الشيخه أولى به
هذاك اللي فقد لذة منامه لأصغر الأسباب
هذاك يموت ما خيب هقاوي من تهقوا به
هذاك إن لد للعذرا تغطرف له ولع وإعجاب
هذاك اللي أسر عشق القلوب بطرف سبابه
هذاك اللي من أفعاله عجز في مثله الا نجاب
كأن الله منع بعده يجي شخص يتحلى به
هو اللي شتت جموع الضياع وولف الأحزاب
هو اللي جفف دموع اليتيم ويتم صوابه
هو أول من حما شعبه من طعون الزمن وأ نصاب
هو اول من نذر نفسه يرد الحق لاصحابه
كأن الله خلق بينه وبين المستحيل أحجاب
فلا يعرف محال إلا يكون أسهل من صعابه
أبو مبارك تطامن له خشوم وتفتديه رقاب
عريب إن ما زها بالمجد كان المجد يزهابه
ودام الله خلق فينا جماعات وأمم وأنساب
أبي هو بالجود انساب خلق أكرم من أنسابه؟
تحلى بالصبر يا شعب...لا تحزن ولا ترتاب
ترى شعب الكويت أكبر من ان الشك ينتابه
وعساكم أن تحبوا شيء كرها يا ألو الألباب
وعسى أن تكرهوا شيء وهو خير لطلابه
نبي نصبر على كربه ولو أن الصبر غلاب
عزانا للبلاد أنه بيحيا له ويحيا به
ومثل ما قد سجد بأرضه لوجه الباري التواب
بعون الله بيرجع له وبيسجد على ترابه
وتطير من الفرح بسم السلام من الحمام أسراب
بعدها تكتمل فرحة رجوع الشيخ الأحبابه
وعسى رب السما يفتح لدعوات القلوب أبواب
وتكون أصدق دعاوى شعبه ملباه ومجابه
ولأن الدمع ما يسخي عطاه إلا على الأحباب
حرام أن الدموع تجف طليلة فترة غيابه
7/قـدهـا وقـدود...
أنا ربتني الدنيا على جزل العطا والجود
ونفسي للوفا والطيب وفعل الخير جزامه
وأعارض منهج الهابط وأوافق للصعود صعود
وأسيّر نفسي بعقلي مدام النفس هدامه
ولا تثّر بي البسمة ولا كحل العيون السود
ولا يقوى على قلبي صغير الحسد وأجسامه
أردّ الجود بأمثاله وأقابل بالجحود جحود
وترى لا خير في رجلٍ يوطّي للردى هامه
وعندي مع أهل العِليا مواثيق وثلاث عهود
أوفي له مطاليبه وأودّه وأرفع أعلامه
أعايش مركب الدنيا على متن القدر مولود
أبعرف هو صحيح إنّ القدر بالناس دوّامه ؟
ومن وين الزمن مقبل وإلى وين الليال تقود
ومن في هالزمن يقدر يوجّه خطوة أقدامه
ومن له بالزمن غاية ومن عنده هدف منشود
ومن منّا قدر يعرف خفايا مقبل أيامه ؟
عرفت إنّ الشقا باقي ، عرفت إنّ الحسد موجود
عرفت إنّ القدر يفرض علينا بأسوأ أحكامه
لقينا بالعرب حاسد وشفنا بالعرب محسود
وبه ناسٍ لنا ضامت ، وبه بالناس منظامه
وينقص بعضنا خوّه وينقصنا وفاء وعود
مدام الحسد باقي وبعض الناس نمامه
ولا ترجى بها الدنيا من ربوعك يجيك اسنود
ولا تشره على رجلٍ عيونه خانت أقدامه
وقابل خطوة بخطوة وجازي بالصدود صدود
تناسى غلطة الصاحب عليك بلحظة اخصامه
ولا تخطي ترى لصبر الحليم اليا سلاك حدود
تروّى واعرف بضرب الحديد تفكك لحامه
تجنب كسرة الخاطر ولو حبل الزعل مشدود
تراك بكسرة الخاطر حكمت القلب بعدامه
ولا تزعل على رجلٍ بذل لك ولرضاك جهود
ولا تامن من الحاسد رضاه ورفعة ابهامه
نبي نصبر على الدنيا قلوبٍ بالحياة زهود
مدام إنّ البخت عيّت توّفق رمعة سهامه
وأنا ما قلتها راجي ولا أطلب بعدها مردود
ولكن الفتى ودّه يحقق جملة أحلامه
وبمشي لآخر الدنيا ولو كلّ الأنام اقعود
وعن وجه الزمن بكشف حقيقه وأرفع الثامه
صحيح إني صغير السن ولكن قدها وقدود
وأنا عندي مع الدنيا مواقف ترفع الهامه
طموحي يملي العالم ولابه للطموح قيود
مدام إن الأمل طبعي ( عرين وصرت ضرغامه )
خلقنا الله من ترابه ولأحضان التراب نعود
تحت رمل الثرى نبقى تغطي جسمنا خامه
سلفنا ما لحقناهم تحت قاع التراب رقود
ولا يبقي من الميت سوى ذكراه وعظامه
ولو طال العمر فاني وترى عمر الفتى محدود
وكلٍ يطلب المولى يبيحه يحسن ختامه
وأنا بلّغت بلساني وربي والأنام شهود
وصحف البيّنة جفّت وعنها رفعت أقلامه
8/أقـرب الـنـاس....
بمشي على درب له الناس يسعون
واصد عن درب الدجي والعتامة
وبقصر اليسرة عن الضيم والهون
وطلق يميني للصخا والكرامة
وبحترم نفسي وانا شخص ممنون
ومن يحترم نفسة وجوب احترامه
ماني من اللي في ذرى الحيط يمشون
ولامن اللي معتلي في مقامه
متواضع وأمشي على الحق بالهون
متوسط المعرفة والشهامة
ولي مجلس دايم له الناس يلفون
شرعت بابه والدلال العلامه
مايفتح الا فيه الاجواد يدنون
ويالله عسى اللي يقرب للسلامه
هذا طريقي وكثر الناس يدرون
صديت عن درب حلاله حرامه
ميزت ربعي بين عاقل ومجنون
واكشف بليد المنفعة من سلامه
واهل المصالح لو على يوم يبنون
في يوم ثاني يرغبون الهدامه
واهل الحكي لو لك عن الناس يحكون
بيجيك يوم ويقصدك في كلامه
لاصار سيفة لاقرب الناس مسنون
يضرب رفيقة وان اقوى في عضامه
ناس مع الكلمة يروحون ويجون
بس المصيبة يدعون الفهامه
ولانيب ديان ولانيب مديون
ولا بغيت من الهروج الملامه
ولاطلبت من المخاليق يبكون
ولا بغيت من الحزين ابتسامه
بمشي بدربي واترك الناس يمشون
كلن على كيفه رقى كل هامه
ولا صرت انا من راعي الطيب مطعون
ابيستوي قرب الرفيق وعدامه
وأن خاب ضني بأقرب الناس وشلون
بعطيك ضني يارفيق الندامه
9/الـدنـيـا بـخـيـر....
الظلام اليا تبرى من مدرات النهار
يبتدي عمره ضرير وينتهي عمره ضرير
والعيون اليا عماها حقدها تبقى صغار
ماتهادي مستواها غير للعقل الصغير
والدروب اللي نهاية وصلها ذاك المسار
ماتساوت مع طموحات الفهيم المستنير
من يميز في طريق الشر حسن الاختيار
من صرخ في كل قلب مظلم بصوت النذير
من قدر ياخذ بحق التايه الضايع قرار
من دفع عمره لحب الناس لو يبقي فقير
من يقيد لكل فزعه للندم همسة شرار
من يطفي بالقلوب المدمنة نار السعير
من خلقنا ماعهدنا غير حب الافتخار
نملك الصبر الكبير ونعشق الدرب العسير
همنا نرفع بلدنا مع صفوف الازدهار
ونتذكر يوم كان ترابها فرش وحصير
وللاسف عشنا وشفنا حرب درب الانحدار
حرب تشتيت القلوب وحرب تأنيب الضمير
حرب اقسى من حروب النار وحروب الدمار
حرب ابشع من نزيف الدم وبالسيف الشطير
بالسموم اللي تروج بالكويت بكل دار
السموم اللي تردوا من سبايبها كثير
والشباب اللي تمادوا في دروب الانتحار
اصبحوا فيها رهينة لعنة السم الحقير
يستغيثون بعمار النفس من نسف العمار
يرتجون وداع ظلما الليل للصبح المنير
صرخة المدمن تهيم وترتجي رفع الستار
رددت عند الهدف كلمة يصير أو مايصير
أشعلت بين الضلوع العوج بعد النور نار
وأدمعت كل العيون المشفقة دمع غزير
وامتلت كل الحناجر من صدى الصرخة مرار
وارتوت كل القلوب الضامية من زمهرير
آفة الإدمان زادت وابتدت بالانتشار
والوجوب إنا نحدد في تلاحمنا مصير
ناخذ اطراف القضية في عيون الاعتبار
ونرسم دروب النجاة وخطة الفوز الكبير
ونرسم خطانا وتكفي دمعة المدمن شعار
ويكفي إنا من ربوع المجد وأخوان الاسير
إن نوينا ما بغينا غير حرب وانتصار
وان ضمينا ما رضينا غير نروى من غدير
إتحدنا قلب واحد للهدب والاختيار
والفضل يرجع لربي ثم يرجع للامير
وعلموا من يفقد احساس الامل بالانتظار
الهدف لازال حي وتوها (الدنيا بخير)
10/نـار وبـارود....
حنا اليامنا وعدنا وفينا
واليا عطينا نعرف الجود ونجود
وما نذبح البسمه ليا من حكينا
وما نفرض الغلطة على البيض والسود
من طبعنا لا من عطينا عطينا
جود من الموجود والجود موجود
بعنا المذلة للضعيف وشرينا
عزة نفوس وجد واخلاص وعهود
نضرب خطانا بالعصا لاخطينا
حتى ولوكان الخطا غير مقصو
ومانزعل اصحاب الجمايل علينا
هذا وحنا نجزي الجود بالجود
يكبر غضبنا لاتعزوي حدينا
نرضيه لو نبذل على ارضاه مجهود
واليا انتخن المترفات اعتزينا
نفزع ولا نرضى على البنت منقود
نزعل ونغضب وان زعلنا نوينا
كن الهدب والعين نار وبارود
نرضى نموت ومدنا في يدينا
ولانعيش بمجد ضايع ومفقود
نعم خضعنا روسنا وانحنينا
لله ولا غيره مع الناس معبود
مثل الغصون اليا انثنت انثنينا
وقلوبنا خشاع ركاع وسجود
نتبع ونأمن وبالرسل واقتدينا
بمحمد وعيسى وموسى وداود
خفنا من اسباب الضياع ان قرينا
باهل الجحيم وقصة اصحاب الاخدود
نمشي على كف التراب وروينا
من قلب مزن مرعد يرعد ارعود
يكفي فخرنا بأصلنا لا انتخينا
حنا عرب من واقع جدود لجدود
ماقد تعلمنا الخطا واعتدينا
ولا قف في صفنا شخص مضهود
الصبر فينا مبتلي وابتلينا
نصبر ولا نرجي من الوقت مردود
لو يشكي منا التعب ماشكينا
ولا تخلفنا ولا نخلف وعود
حنا ليا منا وعدنا وفينا
واليا نوينا قد الافعال وقدود
غير القلوب الخاشعة مارجينا
والدمعه اللي تجرح اوجان وخدود
لا الكره قايدنا ولا الحقد فينا
ماحنا من اللي يجزي الطيب بجحود
هذي عوايد طبعنا واكتفينا
الله خلقنا ازهود ونفني له ازهود
اقولها والله وكيل علينا
بسم العلم لاصار عالي ومرصود
اقولها اقولها وانتهينا
حنا الكويت قيادة وشعب وجنود
11/يقولون مالا يفعلون.....
ما بقى الا سود الايام تحرمك الرقاد
كيف الاوهام اتجرأ اتسريك مغبون
من متى تجزع من الدمع و تخاف البعاد؟
من متى تقفي بك ظنون و تجيبك ظنون؟
صرت تاخذ كذبتي صدق و مزاحي وكاد
لو بقول اني بخونك تحسب اني بخون
ما تعرف ان كل شاعر يهيم بكل واد؟
و انهم دايم يقولون ما لا يفعلون؟
ابك انا لا قلت ابنساك و انكرت الوداد
و الله اني مانسيتك ولاهم يحزنون
من جزع من صفعة الشمس يطمع بالبراد
و من فقد وجهاته الخمس يلقى بك ركون
اعتبرها هفوة انسان او كبوة جواد
لو بتسمح فانت غالي و لو تجرح تمون
عد صداتك مروة و طعناتك ضماد
خلهن لاراحن طعون و لا ردن طعون
خنجرك يستاهل الطعن و متوني شداد
و منك يازين الخناجر و يا بخت المتون
ردلي حنية المزح باحساس الجماد
خلنا واحد يجي صلب و الثاني حنون
موت فيني و اندفن فيك بثياب الحداد
و ان حييت أموت لرضاك و احيا بك بهون
مره ارقد بالكفن و انت ترقد بالمهاد
و مرة ارقد بالمهد و انت ترقد بالكفون
ادري ان شجونك شجون و اعنادك عناد
و البلا ان عنادك عناد و شجونك شجون
ربك اللي سخرك لي تقود و ما تقاد
و الله الخالق و لله في خلقه شؤون
ازرع ضلوعي من رضاك و ابشر بالحصاد
لعنبو من جيت ترضيه و ترد محزون
بس تسوالك بلد ؟ قول تسوالك بلاد
انت كل العالم بكون و لحالك بكون
مابعد محبتك حب و مرادك مراد
غير كونك سيد حشاي تدري من تكون ؟
نعمتين اختصوا الخلق من جود الجواد
كافل الأرزاق من حيث مالا تعلمون
البنون و نعمة المال في عيون العباد
زينة الدنيا بلا شك في كل العيون
مثل زينة دنيتي بس عندي شي زاد
من عرفتك صاروا المال و انت و البنون
انتشي بك نشوة التيه لعناق الرشاد
و افزع الك فزعة القرم لشهاق الزبون
و احصنك تحصين الأرزاق عن درب الفساد
و اعشقك عشق المظاليم لفراق السجون
لو تزيد الشوق جمرة تحولني رماد
لو يزيد العشق شعرة بوصل للجنون
خل هقواتك كبيرة و نظراتك بعاد
كانك انت بكبرك تهون من اللي ما يهون ؟
ازعلك و ارهن حياتي تحت رحمة زناد
تهبى لا و الله الا انت و الموت تهبون
عاد اذا ما ارضاك هرجي و لا اللي قلت فاد
اننا لله و انا اليه راجعون
و انت باكر بتعرف على ناس جداد
و الكلام يجيك من كل شكل و كل لون
لا تحسب ان كل كلمة بتسمعها وكاد
و لا تصدق هرج شاعر و تخدعك الظنون
دايم اعرف كل شاعر يهيم بكل واد
و ان هم دايم يقولون ما لا يفعلون
حتى انا اللي قلت اعشقك و ما اطيق البعاد
يمكن اطلع ماعشقتك .. و لا هم يحزنون
12/قصة حياة....
جتني ظروف للكدر مستعده
قامت تحدد لي الاحزان ميعاد
مرة مع حظي ومرات ضده
واليا تكدر خاطر القلب تزداد
في دنية خلقت على الناس نده
مردودها للخير تجرح واجهاد
إتجي على المظلوم وتبيح سده
واتجي على الظالم تساهيل وامداد
والصدق فيها ما لقى من يعده
والكذب يلقى له مع الناس شهاد
واللي فقد حق عجز يسترده
يصبح على تسديدة الدين معتاد
ومسكين من راد الزمن يستبده
عيت عليه اقدار الايام تنقاد
تطرح به الدنيا على القاع مده
مثل الفريسة والمقادير صياد
ضاعت حياته في لحاف ومخده
عدت عليه ايام بغفول ورقاد
وماله عن دروب الوعر من يصده
ولا هو عن دروب السلامات نشاد
تلطمه مو جات القدر فوق خده
وتخطي به الخطوة من بلاد لبلاد
حبله قريب وعاجز لا يشده
يحسب جميع الناس قاصين وبعاد
عاند حياته لو حياته تحده
وادى سنينه كلها عناد بعناد
إصحى من الغفلة ترى العمر حده
للوقت سجاته وللموت ميعاد
وهذي هي الدنيا تجي مستجده
تلقا بها المازح وتلقا بها الجاد
قصة حياة ومننا مستمدة
ويلزمها تنفيذ وإخراج وإعداد
عشنا على كف القدر فوق يده
الله خلقنا عباد ونفني له عباد
ولا حاصل للحي ماكان وده
ولا حاصل للي يموتون ميلاد
ويكفيني اني من ظلوه الموده
ومالي مع الخسران بالدين مقعاد
وإن جتني الغفلة علي اوقات شدة
اصبح لها صداد والقلب صداد
وتقدير ربي مالنا في مرده
ومعارض لتقديره إشراك والحاد
13/ثامن العجايب....
اسمعي والكل منا له هواه وله ميوله
لاتمسين بكلامك شعرة بروس القرايب
ان حكيتي ماوفيتي وان تحديتي عجوله
تحسبين ان كل فعل تفعله يمناك صايب
تحسبين انك خذيتي بالحشاء صولة وجوله
تحسبين اني ذكرتك مع نسانيس الهبايب
والله انك لو ذبحتي خافقي لالقاك حوله
عاشقه تشقىبفلب من طريق العشق هايب
كم رضيت اسكت عليك من القهر وانتي زعوله
خايف اضحك واستفزك واهجرك واعيش ذايب
ادعيت انك خجوله وادري ان منتي خجوله
وادري انك تخجلين الشمس من فوق السحايب
مايحببني بقلبك يالهنوف الا فضوله
وماينسيني غرامك غير تكرار المصايب
عاشقه جيتي ورحتي يالحبيبه يالعذوله
مابنيتي لي طموح ولاتركتيها خرايب
تستبيحين القلوب وتستحقين البطوله
واستحق بعدك تايب واموت تايب
ياكثر ماشال قلبي شيء اكبر من حموله
ولاعفيتي عن غلاه ولابخلك بالوهايب
كنه ارحم من همال المزن للزهر بذبوله
وانتي اقسى من سموم القيض وكفوف اللهايب
وانتي ادرى في غلاك بداخلي شاللي يزوله
وادخلي دخله على الله واحفظي ذيك السبايب
ماخبرت اللحظه اللي حللت قربك تحوله
ولاهقيت اني بشدد للجفا قلب وركايب
ماهقيت انك تحسبين الزلل وانتي جفوله
وماهقيتك تكرهيني كثر حبك للطلايب
كن قلبي في وصالك وابل لحظة نزوله
وفي فراقك مثل دمعه تنحدر من عين شايب
كنت ابي وقفه حبيبه تنهض القلب بخموله
طافح بالعشق وانتي عايبه والحظ عايب
كنت عصن كل كف غير كفك مايطوله
كنت درب ودمعتين وقلب وجروح عطايب
كنت ابيع العمر كله وارخصه عرضه وطوله
للعيون اللي هدبها ثامن السبع العجايب
بس ابرضيلك غرورك واكسر القلب بذهوله
وقتها ماكنت افكر صايب او كنت خايب
والرجل لو ماعلى بالشهامه والرجوله
صدقيني صعب يقدر يملك قلوب الحبايب
صدقيني مايوالف خافق البنت بسهوله
بالهوى يابنت حواء غير طلاب النشايب
والسهر والعشق الاول والهوى واللي ينوله
شيء اقسى من همومك وألعنه حاظر وغايب
والهموم اللي دعتني من بعد سن الطفوله
كلها من تحت رأس العشق ملعون الصلايب
14/قالها حامد....
تمادي و أنا مثلك تماديت بهجر و بعاد
و كلٍ مثّل عناده خفوقٍ ثابتٍ صامد
و إذا عندك بعادي عيد ترى عندي جفاك أعياد
و عسى طول الجفا مني يليّن قلبك الجامد
أبضحك وأظهر البسمة و لو إن الجروح اجداد
و ترى قلب الحريقة ضو و لو وجه الحطب رامد
بكون أكبر من الغلطة و بعلن للهوا ميلاد
إذا كان الخطا منك مجرّد ثورة الخامد
و إذا كان الجفا منّك مسافات و غلا و عناد
تراي أكبر من عنادك و قولي قالها حامد
15/تزعلين وتقعدين....
عافت الشمس المدينة و أعلنت وقت الزوال
رغبةٍ للنوم منها مع عيون الناعسين
أبعدت من يوم شافت بالسما ضيّ الهلال
كنّها كانت تهزّا بالهلال وتستهين
كفكفت صبح التلاقي من ورا روس الجبال
واستخارتني وراحت وابعدت عن كل عين
وانتي أخطيتي خطاها وانعزلتي بالوصال
ولا رحلتي من سكات ولا وعدتيني تجين
عشت عمري بالمحبة في سبيل الاحتمال
وانتي تعيشين عمرك تفرحين وتجرحين
من غرورك في جمالك ما عطيتيني مجال
وأدري إنك تفهميني لو بغيتي تفهمين
كيف أشوف الشمس تشرق بالسما وانت ظلال
ومن يعيش بوسط غارٍ للذياب الجايعين ؟
كنت أحسب الكره زايل والجفا لو طال زال
ولا بديتي بالغرام ولا بقى فيني حنين
أشهد إني ما خطيت ولا نويت الانعزال
وما خدعتك في غرامي لين شفتك تخدعين
اصدقي بالوعد مرة لي ولو فيها سؤال
من عرفتك ما أذكر إنك توعدين وتصدقين
كنت أشوفك من عيونك تأمرين أقوى الرجال
والله إني قبل أعرفك ما هقيتك تخضعين
كنت أشوفك تبعدين وقلت من باب الدلال
وإن بعدتي عن عيوني قلت باكر ترجعين
كنتي أكثر في عيوني من عدد وبل الخيال
وين أنا ما الد وجهي كنت أشوفك تضحكين
وإن بغيت أصد عنك من يمين ومن شمال
ما قوت عيني تلفّت لا شمال ولا يمين
عاشقٍ والعشق بلوى وأشهد إن الحال حال
ولا تركتي رحمة الله ولا عرفتي ترحمين
وأدري إنك في غرامي للأسف نلتي منال
افترقنا في دقايق والسبب لعنة لعين
حبك أشبه في غرامي بالوصال الانفصال
ويلعب الخفاق لعبة كبرياء الخاضعين
بالهوى ماهي غريبة نكبة عيال الحلال
ولاني أول من يصون ولا انتي آخر من يهين
الصداقة في عيون الناس منفى للعدال
وكان ردّت للصراحة كلبونا مذنبين
المحبة شبه زالت والصداقة لاتزال
بس أببقى في عيونك حامد اللي تعرفين
علّميها يا قصيدة واضربي فيني مثال
عرفيها بالبداوة في طباع الأولين
علّميها كيف نصنع صبرنا والاحتمال
علّميها كيف نفلح بالعمل دنيا ودين
علّميها في سوالف حلّنا والارتحال
علّميها كيف نظهر جورنا للجايرين
علّميها يا دقايق ، علّميها يا ليال
علّميها يا عصور وعلّميها يا سنين
إن عشقنا ما بغينا غير عشقٍ بالحلال
وإن نوينا ما لفينا كود ناس طيبين
كاملينٍ في عطانا بس لله الكمال
والرجل فينا غرامه لو يعين ويستعين
ابدويٍ ما يقوده للردّى شد الحبال
يعسف اليدّ الشحيحة للعطا حتى تلين
همنا فعل الرجولة رمزنا لبس العقال
وانتي المكياج كله صار في وجهك سجين
عندك المكياج موضة تحسبين إنه جمال
صار همك في حياتك تكشخين وتطلعين
والا أنا قلبي بقى لي بالمحبة راس مال
والله اللي مبتليني بالهوى والله يعين
إن بغيت أعشق أبالقى كثر حبّات الرمال
لكن انتي لو بغيتي صعب مثلي تعشقين
قلت لك كل الصراحة وأختم أطراف الجدال
وإن زعلتي من كلامي تزعلين وتقعدين
16/صح النوم....
تعودنا على حمل الجمايل و الزعل و اللوم
ولا نرفض عتب غالي ولا نزعل من جداله
تمنينا حوز اغلى مكانه في وجيه القوم
ونعيش الخوه بوقت يضد رجاله رجاله
تعلمنا من الدنيا وزدنا للعلوم اعلوم
وسقنا للدروب قلوب رجليه وخياله
وقفنا للزمن وقفة شجاعه والقروم قروم
الين ان صار واحدنا بديل اقواله افعاله
الى منه خذا ياخذ مثل ماياخذ المحروم
والي منه عطا يعطي ولو من لقمة اعياله
ولا بتنا ولو باتت رحايلنا بدون عزوم
نساوم للفخر بارضه ولو بأي من اشكاله
ولا عفنا ولو شفنا على باب النهار سموم
ولا خفنا ولو طفنا بمخراجه ومدخاله
واذا شفنا عناقيد العنب فوق الشجر ملموم
نهز غصون عنقوده واذا ماطاح نرقا له
نصبر بعضنا بالكذب الابيض والهدف معدوم
ونقول انا وصلنا له لو انا ما وصلنا له
وانا واحد من اصغرهم طموح وللطموح رسوم
على وجهي مثل قوله بغى شي ولا ناله
عطيت ولا رضيت اخذ من سلوم البخيل سلوم
ولا عمري رضيت اقعد على قلب العرب عاله
ولا ارضى بالفخر فزعه وجواسيس وكلام رخوم
ولا عمري حنيت الوجه بعد المجد لحثاله
غناي الله وانا رجل عزيز مقدر محشوم
قنوع بالقدر وان قلت فال الله ولا فاله
بسيط يرمي حموله على متن الجبال هموم
بوقت الاسف عيت تطيق همومه جباله
بوقت نزل خشوم ورفع من رداه خشوم
وخلي قيمة الرجال بين الناس برياله
صحيت وقلت للنايم بعد ماقام صح النوم
زمانك ماعطاك إلا صور وحطام تمثاله
سنين اطالع البارق وقول ان المطر محتوم
وهو ما مد لي كفه وانا ما طلت هماله
أرد اكذب على نفسي واقول ان النخل مفطوم
وهو ما بالنخل عذقي عطش ماذاق شلاله
وانا مابي من البارق هماليل ومطر وغيوم
ولو ذقت العطش بعيون طرقية ورحاله
تعلمت الصبر من كنت طفل بالمهد مزموم
إلين ان صرت رجل لا أنتخوا به طوح اعقاله
وانا ما احلف بعد عمر طويل بدفنتة المرحوم
بقول الله ولا غير الله الرحمن نلجاله
ومثل ما بالمطر خوه الي من اهل كوم وكوم
انا قلبي بعد يقدر يدك البيد بلحاله
واذا اسمي واصل الدنيا قبل لا القى الحياه بيوم
ابتكرها وانا اسمي يضرب التاريخ بامثاله
واذا ربعي وهم ربعي تناسوا حقي المهضوم
بعيش اشره على قلبي قبل ارثي على حاله
واذا كفي طعن كفي برأس الخنجر المسموم
بعرف ان النصيب اقرب من الرجال لظلاله
مدام ان الزمن خلا الشجاع بوقتنا مهزوم
اجل خلو ضعيف النفس يقصر شرة اشواله
17/سرمدية.....
من عرفت العلم و انتي يالليالي سرمديه
و الوصول أغلى طموحات الفتى بأول شبابه
و المهابه ماتهادت غير لنفوسٍ رديه
ليت في قلب الليالي للفتى قدر و مهابه
دنيةٍ تجمع صفاتين الخجل و العنجهيه
كنها بنت يزود بحسنها ثقل و ذرابه
يوم جتني تمتحني في زمان الجاهليه
جيتها رجلٍ تحلى في تقاليد الصحابه
بالعطا تبخل علي و بالعذاب تموت فيه
عشتها قلب رحوم يكره الضيم و يهابه
بس ابدري وش نهاية وصلها و أخر هديه
و هو صحيح ان القصايد للجريح أول عذابه
و من عرف لك يالليالي و انتي اكثر من هويه
و من تحلف في ترابك مقتنع باللي جرى به
من قدر يفرض طموحه في زمان المعمعيه
مَن مِن الناس يتجرا يتركك و انتي ترابه
السؤال يعيد نفسه و الاٍ جابه مبدئيه
السؤال يعيد نفسه والإجابه مبدئيه
الرحوم يخون ناسة والخوي ينسى خويه
والقلوب اللي تخالف ودها صارت تشابه
و الخلايق ما تسوي طيبها جود و حميه
كلنا نضحك بوجهِ مبتسم للغدر نابه
لو يصير الموت راعي .. كلبونا له رعيه
لو زعل نزعل و نرضى لا رضى حضرة جنابه
و الله اني ما نويت اكشف ملفات القضيه
لكن اني شفت شيٍ يفقد العاقل صوابه
يا الحياه انتي غديتي بالغرابيل اجوديه
كنك اللي مايميز بالخطا غير ارتكابه
ما عطيتي غير جرح و لعنبوها من عطيه
و الله انك ما عطيتي خير للقلب و صوابه
خاينه .. ما انتي عزيزة خافقي يا الاجنبيه
جنبي عني و أجنب من مداهيل الغرابه
و أخذ بدربٍ يدرك للقى روحه و جيه
يا يموت الدرب و لا بدفن القلب بضبابه
و ان ذبحتني تمني رجعتي و ابكي عليه
لين تملين المحاجر بالبكا حزن و كآبه
و ادفنيني بين ظلك و الخيوط العسجديه
لو لقيتي بعد موتي واحد بنفس الصلابه
شاعرٍ قدم قصيده لاغلب أيامك ضحيه
بين ناسٍ مايطيقون القرايه و الكتابه
يا زماني لو بقى للشعر في صدري بقيه
بكتبه و ارسم خيالي بالورق و أروي سرابه
و كان ردت للعناد و عودت للمقدريه
و الله أني ما اتنازل لين اعديه السحابه
يا زمانٍ مبتلي به و ابتلى فيني بليه
لا تلوم اللي يخونك كان له عقل و لبابه
بقفل القلب المشقى عن هبايبك العتيه
و دق بابه من بعدها لو قدرت تدق بابه
الحياه اللي تسمي لعبة الشاطر خطيه
ما تساوت في عيوني مع جناحين الذبابه
أذكر أني كنت عايش بالليال الاوليه
و أذكر أني كنت عايش وقتها باحضان غابه
ما عرفت إلا عبارة مثلها مثل الوصيه
عيش عمرك ذيب تسلم من مخاليب الذيابه
18/رد السؤال....
انتبهت لدمعها بالهدب و الكحل سال
لين جفت عينها دمع و القاع ارتوى
و ابتدت لحظة جفا و انتهت لحظة وصال
و أنطفى نور السعادة و احسب انه ضوى
ما اكتفيت من الهوى و الغرام أربع ليال
و اقفت أيام التلاقي و جا وقت النوى
كنت ابلسى و ابتسم و التفت عنها شمال
لا قويت الصد عنها و لا قلبي قوى
ما هقيت ان الهوى عذب قلوب الرجال
لين ضاع القلب مني و تفكيري سوى
رحت أدور دفوة الشمس ضيعت الظلال
جيت اطفي شعلة النار و القلب انكوى
ما هقيت ان السعادة خيال في خيال
تروى قلوب الحبايب و قلبي ما روى
كنت ابشتال الهوى و الهوى ثقل الجبال
و ان تحملت الجبل ما تحملت الهوى
كنت ابسلى بالهوى و الهوى صعب المنال
ما رضا لي حظي اللي طواني و انطوى
قلت لا فراحي تعالي و لا قالت تعال
و الخفوق ان قلت ابقبل على صدي نوى
الله أكبر لا شرقت شمس يتلاها زوال
كيف ابفرح في صباح مع الليال استوى؟
لا حصل بالحب قسمة و لا جا لي مجال
غير اشوف معاند الجرح و عناد الدوى
شبت النيران و اقفت و جاء رد السؤال
ما تشب النار يا كود يوصلها هوى
19/من تحت لي تحت.....
لو تعرف الخطايا كيف كنت محروم
كان سود الليالي يوم طحت سمحت
لو هموم المفارق مثل كل الهموم
ما تشوفون عيني بالدموع سبحت
و لو تحن المشاكل عقب حب الخشوم
كان حبيت خشم المشكله و استحت
بين صدة عزيز وكبرياء مهزوم
عين شحت على و عينٍ استسمحت
بس مالله خلقني من بكاي معصوم
و ادري انه المحاجر لو تفيض افضحت
و الله اني على جرحي صبور و كتوم
لكن ان الدموع ان روحت روحت
اعذلتني ظروفي و انهكتني عزوم
و الوجيه احزنت لي و القلوب افرحت
اشهد ان الليالي ماتعرف السلوم
قلب جافي لقاه و وجه صافي بحت
راهنتني تبلل بالدموع الكموم
و يشهد الله عليها راهنت و اربحت
احرمت نور عيني من غلا ريم قوم
بذرةٍ و ارتوتني و اثمرت و اطرحت
جادلٍ دوم ماهي مثلها كل يوم
استضاحت غموض و بالغموض اوضحت
دورت بين قلبي و الهدب درب نوم
و امرحت وين مدري المهم امرحت
تنحت اسمي بقلبٍ جيت فيه معزوم
و اسمها بين جلدي و العظام انحت
مثل جفني لعيني بالنعاس محكوم
كل مانمت نامت كل ماصحى صحت
ما تعارض كلامي غير عند اللزوم
بس لا قمت اسولف و اندمجت سرحت
دايم ازعل عليها بس قلبي رحوم
و هي تموت بعذابي من تحت لي تحت
مثل وجه العلاقه في ثياب الخصوم
ان تطيبت طابت وان جرحت اجرحت
خصها الله بوصفٍ من خيال معدوم
لا اذان اسمعتبه و لاعيون المحت
كن ربي خلقها من بياض الغيوم
و من كفوف السحابه بالورود لقحت
عن سواها فرقها بالقمر و النجوم
و كل عذراء تباها بالجمال نزحت
بالحلا هي كوم و باقي الناس كوم
كفتٍ عادلوها بالبشر و ارجحت
حسبي الله على اللي ما بغاها تدوم
من بعد كيف كانت شوف كيف اصبحت
لاتحقق وصال و لا فراق محتوم
خطةٍ قربتني للفشل و انجحت
لعنة العشق تبقى مثل ضرب السهوم
لو محى الوقت جرحه صورته ما انمحت
كيف ابنسى و انا اللي من جفاف لسموم
ما حشمت العيون و لا الدموع فلحت
كانها بالحميا كل ربعي قروم
لو يلدون لاصعاب الظروف صلحت
اجزم ان كنت ياقلبي شجاع و جزوم
لد لعيون بنتٍ لا التفت الفحت
ما تهين البخيل الا يدين الخدوم
دام كف الخطايا بالجفا لوحت
نطح الباس باس و نطح اللوم لوم
و ان تهدت تهد و صيح ان صيحت
يا تعيش بمعزه ياتموت محشوم
ودك ان الليالي لا فعلت مدحت
عمر ضعف الاراده ما يسر الرخوم
ضربة السيف لو بيد الشجاع ذبحت
20/هملوني(( الذهب)).....
يا كثر ما رافقت خلان و احباب
و يا كثر ما في شدتي هملوني
على كثر ما أعدهم ستر و حجاب
على كثر ما احتجتهم و اتركوني
من صارت الخوه ثمن حفنة تراب
نفس الوجيه اللي نصوني نسوني
من غير ذكر فروق و عروق و أنساب
كانوا ثلاثة و الثلاثة جفوني
علمتهم و شلون الأهداف تنصاب
و لما سواعدهم قوت صوبوني
عشاني أصغرهم عمر صاروا أحزاب
عشاني اصدقهم قصيد اظلموني
اللي نجاح اسمي زرع فيهم أنياب
حتى النصيحة ما بغوا ينصحوني
دام العطايا عندهم دين و أتعاب
و الله لو أطلب ذنبهم ما عطوني
طالب نصيحة كني طالب أرقاب
و هي نصيحة؟! كيف لو زوجوني؟
كنت أكتب لنفسي مشاريه و عتاب
و لا ادري إن اللي قروني قروني
تضاربت من دوني عقول و ألباب
واجد بغوا غيري و واجد بغوني
أقفل هدب تسهر على شعري أهداب
كني حبست إرقادهم في جفوني
لو شفتهم واحد يشوفوني اسراب
من وين مالدوا نظرهم لقوني
أثري و جودي بينهم محرق أعصاب
و مزعل بعضهم من بعض لو طروني
يا كبري بعيني و أنا توني شاب
و اهم كتاب الشعر حاربوني
حتى و لو يهوي على نجمي شهاب
يكفيني إن إسمي كبير بعيوني
قد قال ابوي :ان هبتهم قول :ما هاب
لو يقدرونك قول :ما تقدروني
ما دام قبري محتضن راس مرقاب
على كثر ما تقدرون ادفنوني
لو ماني بذيب إنهشت عظمي ذياب
لو ما عرفت اثبت وجودي لغوني
لو ما سكنت وجيههم مت بغياب
لو ما قدرت أمحي ورقهم محوني
أصبحت الأصعب لأنهم كانوا اصعاب
جننتهم مثل ما جننوني
ما جيت أبدبل كبدهم شعر و خطاب
لين أدبلوا كبد الذي خلفوني
يا ويل وجهي كن للدمع مخلاب
ما جف ماه و لا استحى من طعوني
كل ما طرالي منظرمريب و أرتاب
كان الوحيد اللي يحرك شجوني
قبلة صلاة و ذكر و خشوع و كتاب
و أمي على سجادة النور دوني
تدعي لي الله يفتح بوجهي أبواب
تتوسله بالشده يكون عوني
من كثر ما خفاقها بالدعاء ذاب
صارت تحس إن زملاي اكرهوني
بشرتها:يمه معي ربع و أصحاب
ماني لحالي واجد اللي يبوني
من يوم ما حاز قلمي كل الالقاب
قلطتهم في دفتري و احفظوني
الله وهبنيهم بني عم و أجناب
من يوم جيت اعجبتهم و اعجبوني
و اعجابهم فيني ما هو بأيه اعجاب
باسلوبي بشرحي بطرحي بلوني
لو قلت عن نفسي( بشر) صرت كذاب
لو قلت 
دمي من ذهب) صدقوني
لو بكيفهم كان ازرعوا دربي أعشاب
لو بيدهم يتشبهون اشبهوني
من كثر ما صاروا من طبوعي اقراب
حتى بلبسة شمغهم قلدوني
واجد دعوني و اغلقوا دوني الباب
و اكثار ناس أبكي لهم ما بكوني
لو طالوا لهدمي مناسيب و أطناب
كان و غلاتك من زمان اهدموني
ما دام حطوا فيني عيوب و سباب
جنبت عنهم مثل ما جنبوني
أصلا لو أن بخوتي شي ينعاب
ذبحت نفسي قبل لا يذبحوني
أنا يدي لو ما كست متني ثياب
نذر ٍ على لقطع يدي من متوني
مو عيب أجي مدعو و لا أشوف ترحاب
العيب لو إني رجعت إن دعوني
ما دمت اجي و لا يحسبون لى حساب
حرمت اروح اذا يبوني يجوني
21/غرام أحباب....
على ذاك الطريق اللي يسمونه غرام أحباب
وطت رجلي على دربه و لا أدري وش نوى فيني
تبعته لآخر دروبه ألين أن القمر قد غاب
تعب قلبي و لا تعبت مسافاتٍ توديني
لقيت الليلة الجردا هدب ظل و سما و اعشاب
بعد ذاك الظلام اللي يتوهني عناويني
صدفتك معجبه فيني و ياليت الغرام اعجاب
و تراك انتي الهنوف اللي هقيتك تستحقيني
عطيتك عشق من قلبي وسلمت لغلاك رقاب
و غيرك يحترق قلبه و لا يقدر يحاكيني
أنا قبلك صدفت عيون لكن ويش جاب لجاب؟
ترى كل العيون اللي لقتني ما تكفيني
رماني حظي العاثر عليك وجيت لك طلاب
و لا أنتي اللي عشقتيني و لا انتي اللي عتقتيني
تعالي و اعتقي ذاك الخفوق المولع المرتاب
مهب لاجلي عشان الله يجازيك و يجازيني
تعدي في سما عشقي و لو عشقي خراب أصحاب
و صوني بالهوى نفسك قبل لا انتي تصونيني
و شيليني على متنك خفوقٍ باريٍ منصاب
و من فوق الغرام العذب شيليني و حطيني
و لا منك هقيتيني شجاع و ما يطيق يهاب
أنا لك بالهوى و الله مثل ما انتي هقيتيني
أنا ما أمشي ورا غيرك و لو أنه يطق الباب
و ترى عيبٍ عليّ أطعن و لو كثرت سكاكيني
زهودٍ ما يطيق الدم لا داين و لا طلاب
شجاع و عارفٍ نفسي و أظن أنك تعرفيني
غيورٍ ما عرفت أضحك مع الغدر ببّرود أعصاب
أبيع عيوني الثنتين قبل أنك تخونيني
إذا شد الغرام اترك خفوقي بين ناب و ناب
لفرقى تكسر ضلوعي و لا عشقٍ يوطّيني
أنا رجلٍ و لي غيره و إذا شفت الهوى كذاب
تثور بقلبي الفزعه و لا تهدى شياطيني
سؤالك لو يزعزع بي كياني ما قبلت عتاب
اجي لك و أسالك نفس السؤال اللي سألتيني
عن العشق القديم أبواب تقفيها كثير أبواب
بعد ذاك الحبيب اللي خدعني و انخدع فيني
أبي عشق تحسب له كل نظرات العيون حساب
و ابي قلبٍ علي قلبي و ابى دينٍ على ديني
و ابي نظرة عطا توفي و لا تخلف بدون أسباب
و ابي منك قبل لا نتي تصديني توديني
و ابي دربٍ على العذال صعبٍ و متعبٍ و غلاب
و ابي نفس الطريق الصعب يبعدهم و يدنيني
ترى لو للقلوب عيون و لدموع العيون أهداب
حشى ما تنزل الدمعه لغيرك لو تركتيني
أنا أول من عرف قدرك و أنا توي صغير و شاب
و ابي منك ما دام أنك عرفتيني تحبيني
ما دام أني لقيتك في طريق أسمه غرام أحباب
دخيل الله و بعد الله دخيلك لا تخليني
ما دام أن كل من يحيا على وجه التراب تراب
عسى تنساني الدنيا مادام أنتي ذكرتيني
22/الذيب والراعي....
انا قلبي على الفرقا نوى روحه بدون رجوع
مثل طير بلا سبق و بلا وكر و بلا راعي
تهيا للجفا خطوة يبي بقصى الطريق هجوع
يدور للعنا ملجا طريق قلوب جزاعي
فديتك يا لخفوق بحب و جرح و قطرتين دموع
قبل لا يجبرك خلك على و تلوي ذراعي
تعنيت و سبقت الوقت و لا عشت الغرام اسبوع
انا مابي من الدنيا هبوب تطرح شراعي
لعبت بدوري العاشق و كنت التابع المتبوع
و تلعب عيني ادوار الرسالة في يد الساعي
رقيت الحب من ساسه الى راسه ولع و خضوع
و رجل ٍ تصعد الهامه و رجل ٍ تحتضن قاعي
عرفت ان الهوى ظالم مثل ظلم العطش و الجوع
و أظني يوم انا عاشق شبيه الغافي الواعي
غفيت بعشقي الخاين و وعيت بعمري المدفوع
و اشوف القلب لأيامي غدا ناعي و أنا ناعي
و انا بقبل على الفرقا و بضوي للظلام شموع
و لا لي بالشقا حاجه و لا به للسفر داعي
و ببدي رحلة الفرقا و بأرحل و انهي الموضوع
ما دام ان العذول اللي لبس ثوبي مع قناعي
ابعرف ياترى بعدي من اللي يقطف المزروع
و انا مالي بها الدنيا سوى خلي و مرباعي
سطا ذيب على المرعى و سلمت بخافق مفزوع
و فدوة لو يموت القطيع و يسلم الراعي
23/الثريا....
ليه تطعني و انا ميت بليا
ما كفاك الي حصلّي قبل ساعه
كن بين همومي و بينك حميا
جيتكم واحد و جيتوني جماعه
انت منا و المصايب من هنيا
كلكم ضدي ترى ما هي شجاعه
ما ابشع من جروح طعنات القفيا
غير سكينٍ تصيب بهالبشاعه
لا تتوب و لاتذوب و لا تريا
جرحها جرح و فظاعتها فظاعه
ترتوي من فيض دمي و التفيا
و صار قلبي مثل اخوها بالرضاعه
و انت ليل لو ضويته ما يضيّا
ضعت فيه و شفت نفسي في ضياعه
اتهيا وين ما اشوفه تهيا
و ارسي بمرساه و شراعي شراعه
من عرفته و المحيا بالمحيا
و مايروح الا ذراعي في ذراعه
ان رضيت ارضيه و ان عييت عيا
و ان طلبني قلت له سمع وطاعه
ما عشقت من النجوم إلا الثريا
و ما ملكت من الكنوز إلا القناعه
و انت و جيوش الموادع و الجفيا
كيف اوقف ضدكم و انتم جماعه
لو بجيكم بالشجاعه و الحميا
البلا ان الكثره تغلب الشجاعه
24/التمثال.....
عفا الله عن خطا غدر الخناجر و الضلوع ابطال
باسامح و اتركك تحت الظلام الحالك لحالك
دخيلك وفر دموعك ترى هدر الدموع اذلال
و ترى ما فيه احد يصبر مثل صبري بغربالك
انا عيب علي انقض كلامي و الرجال افعال
و اذا قلت اقطع حبالك تراني بقطع حبالك
عشان اكسب هدب عينك تجرعت العذاب اشكال
و ليتك تراف بحالي علشان اراف بحالك
مسوي في حياتي شي مايذكر و لا ينقال
حتى العدو و اهو العدو ما يعمل اعمالك
تمسيني على الهم و تصبحني على الغربال
تقلطني فناجيلك و تقصر عني دلالك
تحملت التعب لاجلك و انا حملي يهد جبال
رحلت من العذاب و ما وقفت الا على جالك
علامك كلما اجيك متواضع جيتني تختال
معاك اليا متى باصبر و صبري معك يحلى لك
مثل ما اقبلت لعيونك لزوم تلدلي باقبال
و مثل ما قد حشمتك حس و احشم قلبي اشوالك
انا محد بجابرني اساير معك هالمنوال
ترى ماني تبيع لك و لاني اصغر عيالك
انا حبيت اعشقك نبض و مشاعر ما اعشقك تمثال
انا جيت اسكنك و احياك و ابقى فيك وابقى لك
انا جيت اب ظمى عاشق تعب يطرد سراب اللال
انا جيت استفز رضاك من فرقاك و الجا لك
انا ما همت بك عاقل انا كنت اعشقك بخبال
انا ما كنت احبك حي انا كنت اعشقك هالك
تخيل من كثر ما خفت تلقى للزعل مدخال
اخاف اخطي على طيفك و ادوس برجلي ظلالك
تبعتك و العرب تتبع رعود البارق الهمال
و انا شفت المطر يتبعك في حلك و ترحالك
كأن الي خلق حسنك خلقني مع جسدك ظلال
و صرت اقرب جسد يمشي معك باقفاك و اقبالك
ابي قلبك يحس انه فقد بمحبته رجال
ملكته من هدب عين و خسرت ارضاه باهمالك
صحيح ان الفراق اقسى ولكن الوصال محال
و انا صعب على ارضي غرورك و اضعف قبالك
بعد ما حققت عيني فبعدك للرقاد امال
اعود للسهر يا خوي فال الله و لا فالك
ببدل نظرتك فيني و اجي لك كل يوم بحال
باكون اقرب من ثيابك عليك و لا اتهيالك
بالمك و انثرك و اجمعك و ارجع انثرك باهمال
باخونك و ازعلك و ارضيك و ازعل منك وارضى لك
ابرسم بالثرى وجهك و ابدفن صورتك برمال
ابشكي للعرب فرقاك و اضحك عند عذالك
ابهديك الوصال فراق و اهديك الفراق وصال
با سوي مثل ما اشوفك تسوي و افعل افعالك
عشان تعرف من فينا الزعول و من وسيع البال
ابيك تذوق فنجالي و انا باذوق فنجالك
نصيحه و احتفظ فيها قصر معك الزمن او طال
ابي تسمع كلامي زين و تحطه على بالك
اذا حبك هبال اطفال لك عندي هبال اطفال
و لا و ابشر بعد بهبال حب ما هو بهبالك
و اذا قصدك تهين اسمي عشان تشمت العذال
ترى لا انت و لا غيرك و لا عشره من اشكالك
25/السفينة.....
ضاقت وساع الفيافي و الوعد متن السفينه
للطريق اللي دعاني بعد أمان الله و أمانه
لا تناديني و صوني قلبك الله لا يهينه
لا يراهن في رجوعي لجل ما يخسر رهانه
ليه ما أرحل عن غرامك بعد ماذقت الغبينه
أذكري لي شي واحد يستحق أقعد عشانه
قلب ماحن لوصالي ماني بحاجة حنينه
و أشهد أنه ما يعزر بالرفيع الا هوانه
الهوى الغدار حد الله مابيني و بينه
و الرجل لاخير فيه إن ما حفظ قدره و صانه
واحدٍ مثلي اليا من حدته عوجا سنينه
ما شكى لقرب أبن ادم لو هو أغلى من أخوانه
يوم قلبي ما عصاك و ماقدرتي تذبحينه
ليه خنتي فيه و أنتي معه من نفس الديانه
كان ذبحي بيدك أرحملي من اللي تفعلينه
و أن طلبتك تذبحيني ما ذبحتيني لعانه
كل جرحٍ من جروحي تذكرينه تنكرينه
كن مالك في نزيفه يد خانت بالأمانه
ينزف الخافق تواضع لين لطختي جبينه
و الا أنا ما كنت أبيها توصل لحد الأهانه
قلت من باب الميانه صاحبك و تعذبينه
لعنبوك إرخي معاي أشوي ما صارت ميانه
طعت عقلك يوم قيل إن العقل للبنت زينه
لكن الشرهه علي اللي كنت أحسب إنك تكانه
من بعد ما كنتي أنتي في حشاي أغلى سجينه
بوعدك بطلق سراحك و أتهميني بالأدانه
وين رايح ؟ لأي دربٍ ما يرجع للمدينه
ليه رايح؟ لان قلبك ما ترك قلبي و شانه
كيف أبنسى ؟ ربي اللي ملهم القلب السكينه
مثل ماعانه بقربك لا نوى فرقاك عانه
كان قاسي يجرح أطراف السكاكين السنينه
ما يطيح و بنتٍ مثلك حبها هزت كيانه
و الا أنا خابر خفوقي ما يمد الا الثمينه
و إن بغى يغيض الثريا قعد القمرى وزانه
مزعلٍ لجلك هنوفٍ رجت عقول رزينه
و إن تهادت بالطريق الجرهدي تزهر جنانه
جادلٍ كن الجمال قبالها كتف يدينه
و القمر لو شاورت له ينزح و تقعد مكانه
كانت أول من تحكم في فروع الياسمينه
وأن تعدتهن تثنن خيزرانه خيزرانه
بعتها لجلك و صارت لأصغر أطرافك رهينه
و ألا هي لفتة هدبها تغمرك ثقل و رزانه
و الخفوق اللي تغذى من معزة والدينه
مشكلته إنه تعلق في زمن ماهو زمانه
كل مازادت جراحه و أكتشف غلطة ضنينه
صدقيه أن قال مابه شخص يستاهل حنانه
يوم نادى يا فلانه ما رضيتي تسمعينه
لين صوت يافلانه يافلانه يافلانه
كنت أشوفك زعفرانه تقرض الورد و تدينه
يمكن أني ماقطفتك بس أشوفك زعفرانه
كنت أهاب البعد عنك و أطلبك لا تذكرينه
كان خوف من الفراق و خطوت الفرقا جبانه
و ماقتنعت أن الخيانه للرجل تلوي يمينه
لين ما ربي بعثك و ذقت من طعم الخيانه
إسمحيلي ما بقى فيني مكانٍ تطعنينه
و أقبلي من جوف قلبي كل عطفه و أمتنانه
و الله الله في عذابك بتركك عينك بعينه
دلليه و لايرده عن شقاك إلا لسانه
و الا أنا قررت أسافر و أمتطي ظهر السفينه
لأن مابه شي واحد يستحق أقعد عشانه
26/الأم....
قصيدتي زاد بعيوني جمالها
و اخذت أنقي بالمعاني جزالها
و اكتب معانيها من الشوق و الغلا
لأمي و أنا اصغر شاعر ٍ من عيالها
كتبتها في غربتي يوم رحلتي
لما طرالي بالسفر ما طرالها
امي و انا بوصف لها زود حبها
و ان ماحكيت لها قصيدي حكالها
امي لها بالقلب و الجوف منزله
مكانة ما كل محبوب نالها
اقرب من ظلالي و انا وسط غربتي
و انا تراي اقرب لها من ظلالها
ما شافت اعيوني من الناس غيرها
و لا خلق رب الخلايق مثالها
اغلا بشر في جملة الناس كلهم
و اكرم من ايدين المزون و همالها
اتبع رضاها و أرتجي زود قربها
و اللي طلبته من حياتي وصالها
الصدق مرساها و الاشواق بحرها
و العطف و احساس الغلا راس مالها
اهيم فيها و ابتسم يوم قلبها
يسأل و انا قلبي يجاوب سؤالها
و ان اطلبتني شي فزيت مندفع
اموت أنا و احمل تعبها بدالها
و اصبر على الدنيا و الاحزان و التعب
و احمل على متني فطاحل جبالها
و اسهر اعذب راحة القلب بالشقا
و اعيش اعاني بس يرتاح بالها
تربية ابوي اللي على الطيب بذكرة
اللي وهبني الحياه و مجالها
نور لي ادروبي و انا طفل مبتدي
حتى تركني واحد من رجالها
الوالدين اولى بالاحسان لجلهم
و أولى بتكريم النفوس وعدلها
اقولها و انا على الله متكل
و الله عليم بقدرتي و احتمالها
يا كلمة اغلى من الناس كلهم
يا شمس بقلبي بعيد زوالها
يا فرحة تملي لي الكون باكمله
يا شجرة تكبر و يكبر ظلالها
تضحك لي الدنيا ليا شفت زولها
مثل السما تزها بطلة هلالها
و البعد عنها يا أهل العرف ما قدره
لاشك ناري زايدة بشتعالها
ما أعيش ببلاد و لاهيب بأرضاها
و لابي عيوني كان ما هي قبالها
أرض ٍ تدوس امي بالاقدام رملها
اموت فيها و اندفن في رمالها
27/الحلم....
بوقت من البطا و بليل تترقص شياطينه
بعد شفت الضيا ينزع من ثياب المسا ثلثين
تحايلت المنام اللي مثل بيتك تمرينه
و انا اللي من تفارقنا و أنا ما غمضت لي عين
غريبة كل حلم يمر في رقادي تزورينه
و الاغرب كيف أحلم الحلم و ارجع و احلمه بعدين
قبل يومين شفتك بالمنام و قمت من حينه
و نمت أمس و أرجع نفس المنام اللي قبل يومين
أنا اللي قبل اسافر شلت قلبي من شرايينه
تركته في يدك مثل الأمانه و احفظيها زين
ترى حفظ الأمانه دين مجبورة تردينه
أجل ما فيه أحد قد قال لك حفظ الأمانة دين
مرد المقفي بيلفي و يستوفي و توفينه
بعد ليله ثلاثه أربعه عشره شهر شهرين
إذا انتي ما انتي بقد الكلام اللي تقولينه
حرام استامنك حاجة و إذا جيت اطلبك تنسين
تخونين و تبين أرضى و احد يرضى تخونينه
أنا لاجيت أخونك مع حبيبة ثانيه ترضين
من أول مارجعت من السفر ماشفت لك بينه
و أنا اللي كنت أحسبك قبل ادوس ارض المطار تجين
تكونين أنتي أول شخص عيني تحتضن عينه
وكنت أتخيلك من زود فرحة رجعتي تبكين
و أشوف بدمعتك حكيك و أعرفه قبل تحكينه
و اجيب أحلى من اللي بتحكينه و أتركك تحكين
تقولين : الوطن نور و أقول : بنور مضوينه
تقولي لي : غديت أحلى و أقول : عيونك الحلوين
كلام نام بشفاهك و خفتي لا تصحينه
ذخرتيه لغرام للي ينام و يترك تصحين
تغانمتي غيابي لين رجحتي موازينه
تعلم من يدك لمس الكفوف و علمك تجفين
و ليتك لاقيه به شي فيني ما تلاقينه
مهو بغرور لكن خابرك مالك أمل تلقين
تغافلك بغلا و الا الحلا مهوب من زينه
تزينه الصور بس الصحيح ابن الحلال زوين
و أنا ماني بنقاص عنه يوم أنك تبدينه
نصيبي هو نصيبي لو يسددها من الصوبين
قنوع بمظهري و السم ما يذبح ثعابينه
على قول المثل ماني حلو لكني ماني شين
إذا أهداك الزهر مره فأنا اهديتك بساتينه
و إذا ألهاك بفرح ليله فانا تهت لبكاك سنين
وإذا استضعفتك أملاكه و شتتك ملايينه
أنا حتى فتات الخبزة أقسمها معك نصين
طموحي بس أجي و أظفر بشي تستحقينه
تدينته تسلفته سرقته مو مهم منين
كأني من كثر ما ارضى بكل اللي تمنينه
لو انك تطلبين الله يعنيني بقول آمين
أنا ما العب على الحبلين وقت الطيش و سنينه
تبين الحين يوم أني كبرت العب على الحبلين
ترى عند البدو بالذات عيب اللي تسوينه
حلاتك لا عشقتي تعشقيني ليوم الدين
غرامٍ نسكن ضلوعه حشيمه من مجانينه
جفا يجمع معزتنا و لاعشق يذل أثنين
كثار اللي تحدوني و قالولي : تحبينه
امانه لاتخليني صغير بعينهم تكفين
لاني كل ما قالوا تخون اقول : مسكينه
عليك الله و أمانه علميهم منهو المسكين
أنا خايف لياطاح الجمل تكثر سكاكينه
وأنا ماعاد بضلوعي مكان لطعنة السكين
مثل ماقالوا المكتوب واضح من عناوينه
لو ارحل منك للغربه بسافر من ظلامك وين
كفايه كل حلم يمر برقادي تزورينه
كفاية من تفارقنا وأنا ما غمضت لي عين
قبل يومين شفتك بالمنام و قمت من حينه
و نمت أمس و أرجع نفس المنام اللي قبل يومين
28/الأولي والتالي....
جا نهار ما رحمتني جيته و قدومه
شفت فيه الناس واجد واقفين اقبالي
كنت احسب انها حقيقة و العرب ملمومه
و قمت افضفض عن همومي و اشتكي غربالي
ويوم زال الحزن عني وانجلا بغيومه
واثرني ما غير اسولف بالخلا بلحالي
من عذابي قمت اعزي قصة مرحومة
ولعت بيدين خلي و انطفت بهمالي
قصةٍ لدت عيون صويحبي من نومه
يوم شلت الموت بيدي و ابتلوا عذالي
ما رضيت اكسر غلاي و ما قدرت ارومه
و عاذلي ما صد عني و ما قوى منزالي
إبتليته لين جتني خنجر مسمومة
و ابتلاني لين جاب الاولى و التالي
و الله انه ما عذلني لين شق هدومه
و لين خانتني عزومي و انكسر تمثالي
و الا انا ما كنت ابين لا أمطرت ديمومة
بالمدامع من فراق المخلصين امثالي
كنت اوقف و اتذكر نفخة اليشمومة
و اذكر اني كنت غالي في عيون الغالي
و احد كانت نسايم سيرته بسمومه
و كان كل ما شاف ظلمي بالهوى يلجالي
ذاك و الله كل ما أرسل في حشاي سهومه
انتهى ليل السكينة و أبتدا زالزالي
و الله اني كل ما اسمع سيرته و علومه
قمت اشوف الموت الاحمر و اقف بظلالي
و اشهد اني كل ما اسهى و افتكر برسومه
و ما وعيت الا و انا ارمي غترتي و عقالي
ليت ربي يحتميه و يحرسه و يدومه
يومه اقرب من عروقي للجسد بوصالي
و ليتني لما عرفته ما عرفت خصومه
و ما وقعت بظلم ناس ما وراهم والي
العذول اللي حرمني حاجة مقسومة
ليه يحرمني قهوتي و الدلال دلالي ؟
و ليه يسأل في غرامي و ان بغيت اسومه؟
دام صار الجيب جيبي و الريال اريالي
و الله ان العشق شي يستحق القومة
و اشهد ان عيون خلي تستحق افعالي
يكفي انه لا نظرلي نظرة محشومة
يرتجف كفي و يوقع من يدي فنجالي
و ان لمحت بطرف عينه دمعة مكتومة
جيت كلي من عذابي عالي متعالي
و ان تبوسم لي بعينه و الشفا مضمومة
و الله ان مدري وش اللي بعدها يجرالي
ليت يومي قبل يومه أو معاه بيومه
و ليت حاله غير حالي دام هذا حالي
إن غفيت الليل جتني بالمنام حلومه
و ان صحيت الصبح ناسي سيرته يطرالي
و الله ليبطي و عيني تسهره و تقومه
و الله ليبطي عذولي ما يفك حبالي
دامني لا زلت احبه و اعشقه بهمومه
بذكره مع كل خطوة حللت ترحالي
بذكره مع كل ليلة مظلمة مشؤومة
نزلتني في حشاه و رفعت منزالي
و بذكره مع كل دمعة نوخت بكمومه
و علمتني بان قدري في غرامه عالي
و بذكره مع كل نظره بائسة مظلومة
حسستني بانه اخر من نوى يصفالي
و بذكره كا ما نسيته و ان ذكرت سلومه
قمت اشوف الناس واجد واقفين قبالي
و ان حسبت انها حقيقه و العرب ملمومة
ما تحكمت بسكوتي لين طال جدالي
و يوم زال الحزن عني و انجلا بغيومه
و اثرني لا زلت اسولف بالخلا بالحالي
29/الأسطورة.....
ما تقبلت الفراق و ما ليدي فيه حيله
آه لو أن الظروف المقبلة تكشف قدرها
لو يعرف الشخص منا وش مع الغيب اب يجي له
كان جنبنا المشاكل من قبل يوقع ضررها
ما هقيت الليلة اللي جابت الفرقا طويله
لين صارت ليلة أمس بعيني أطول من شهرها
و العذاب اللي يذوب بعين من يفقد خليله
عندي أكبر من عذاب العين لو تفقد نظرها
و الحبيب اللي صدوده مثل مداته جزيله
صد عني و أعرفه لا صد عن حاجه هجرها
كأن روحي يوم حست في جفاه و صعب نيله
بشرتني بالضياع و شدت العزم لسفرها
ما رحمها من هلاك و ما تقبلها دخيله
تحتضر قدام عينه لين ماتت من قهرها
عاد ليت اللي ذبحها و أرهب الموت بوسيله
ما دفن وجه الضحيه و السكاكين بنحرها
ليت قلبه يوم طاوع فعلته كمل جميله
لو غسلها من عروقه و بكفن صدره قبرها
من حفر بضلوع قلبه حفرةٍ تكفي قتيله
ليه ما يدفن قتيله بالضلوع اللي حفرها
اشتكيته للرفوف و للبراويز الهزيله
و انذعرت من النياح اللي سمعته في صورها
رحت أسولف للجبال الصم عن قصة رحيله
ما تركت متونها الا ينحت الدمع بصخرها
30/حد علمي....
حد علمي بالغلا يوم كنت أسوى كثير
يوم كانت ضحكتي طبع و عنادي سمه
و حد علمي بالغلا يوم خفاقي ضرير
قبل أهدم العشق و أبنيه و أرجع و هدمه
و حد علمي بالبكاء يوم لي قلب و ضمير
قبل أشوف المسلم يموت بيد المسلمه
إيه عدّت من يدي بس ماعدّت بخير
ليلةٍ عيّت تجيني و جتني مظلمه
من عرفت إحساسها كن في قلبي نذير
و النهار المكتئب باين ٍ من مقدمه
ليلةٍ حسيتها لاتجور و لاتجير
مثل طفل ٍ ماحقرته و عيّت إحشمه
و أصبحت مثل شعره و أقصمت ظهر البعير
و أبتدى في موته الجرح من حيث إختمه
صار لي بالعشق مالا هقيت أنه يصير
أنظلمت بعشرت أنسان ما كنت إظلمه
العشير اللي تبرى من ضلوع العشير
الحلا عزّز خطاياه و الحظ إخدمه
لا تبسّم يكسر النور بعيون البصير
وكن شمس المغربيه تبات إبمبسمه
معتدل في قامته لاطويل و لا قصير
ممتلي بالزين من معصمه لي معصمه
فيه بلوان الهدب لون غير ولون غير
مثل ما للرمش بالعين قصه مبهمه
كنها نكس البيارق على شط وغدير
و مثل لملمت الشتات بشتات اللملمه
مع سواد مجدّل ٍ ما يثور إلا يثير
كنه اللي ينهم الريح ثم ٍ تنهمه
ما تجمع لين قيّد حرير ٍ مع حرير
في ضلام ٍ علّم الليل مالم يعلمه
ما هقيت إن الهدب صلف و أجفانه تغير
لين سلهم لعنبوا جد ذيك السلّهمه
ماعتقني لين ساق البشاير للبشير
يوم صد و جاه قلبي بشحمه و لحمه
و الله إنه حط قلبي تحت رحمت شطير
في يديه و كل ما راد يقسمه قسمه
يا عساني ماعدم إرضاه في برد و هجير
و لو عدمت مروّته يا عساني معدمه
إن طلب عيني رضا قلت ما غيره نظير
و أنشرب دمي غضب قلت يستاهل فمه
و اهنيّه يرقد الليل مرقاد الغرير
كن نومه لابغى يهزم الجفن إهزمه
و إلنا من صفرة عصير الى صفرة عصير
و السّهر يا يلزم العين و إلا تلزمه
لو صحيح إن الحبيبين يجمعه مصير
كان نفس اللي حرمني من النوم إحرمه
و الله إن مروّتي ولّعت فيني سعير
يوم شفته تل قلبي و داسه بقدمه
ما رحم زهرة شبابي و أنا توّي صغير
لين ضيّق خاطري ضيّق الله إنسمه
إيه عدّت من يدي بس ما عدّت بخير
ليلةٍ عيّت تجي بس جتني مضلمه
حد علمي في عناها عذاب و زمهرير
يوم قمت أوحي بالاضلاع صوت و همهمه
و حد علمي بالرجا من نصير اليا نصير
يوم شفت النّفس تذبح و هي مستسلمه
و حد علمي بالبكا يوم لي قلب و ضمير
قبل أشوف المسلم يموت بيد المسلمه
31/عاتبوها....
بعد ما قابلتني عاتبوها
على شوف الحبايب حاسبوها
خذوها و ابعدوها غصب عني
و عن وجهة طريقي جنبوها
و شالوها عن عيوني غصيبة
عواذل و اغصبوني و اغصبوها
خذوها من يديني شوف عيني
و عن عيني تعدوا و احجبوها
كلام و صدقوا بالبنت كذبة
و هم اللي من أول كذبوها
و هم وش دخلهم في مال بين
لابوها و الخلايق طالبوها
وفية ما تخون و لا تعاند
جسورة و المواعيد ارعبوها
ملاكٍ كاملة و الكامل الله
و لكن العواذل عذربوها
و هي كل ما دعتني تشتكي لي
عن اللي سالفتنا سربوها
تخاف و تلتفت مع كل كلمة
تظن أن العواذل راقبوها
تلفت من عقب ما هي جريئة
شجاعة ما تهاب و هيبوها
و اهديها و انا حاير و ثاير
مصيبة يا عذابٍ عذبوها
و هم كل ما خذوها عن طريقي
تراهم صوب قلبي قربوها
و أنا ما تعبت قلبي خيانة
خيانة رتبوها و حسبوها
و لا يعجز خفوقي لا يقابل
جفا من حاربوه و حاربوها
و أنا لي عزةٍ تفرض علي
أخاطب بالجفا من خاطبوها
و أكسر لوحة الماضي و أزيله
و أخربها مثل ما خربوها
و أذوقهم ندم ما صار فيها
و أشربهم من اللي شربوها
و أدلعها و أولعها بنفسي
و أشرقها بعد ما غربوها
و أعوضها عن اللي راح كله
و عن ذيك الليالي كل ابوها
غلاها بالحشا لا زال ثابت
و لو حتى بغيري حببوها
و غلاي بقلبها مر و تعدى
غلاها لأمها و الا لأبوها
32/انتي ولا شيّ .....
والله وصرتي تستهينين فيني
وانا الذي سويت لك قدر بيديّ
تدرين وش كنتي قبل تعرفيني ؟
ان قلت لك كنتي ولا حاجة شويّ
انا الذي فرشت لك رمش عيني
وعملت منك شي وانتي ولا شيّ
جيت اعشقك ما جيتك لك تحقريني
جيت اسكنك بسمة ما هو بسكنك غيّ
لا صرت عامل لك قدر قدريني
ترا الكرامة صفحة ما لها طيّ
ما دام ما جيتي غلا لا تجيني
نار الجفا عندي ولا الذل بالفيّ
والله لاهجرك قبل لا تهجريني
اجل تبيعيني واجيلك برجليّ
يا تتركين الكبر يا تتركيني
لأن المحبة شي والمهزله شيّ
إن كانت الدعوة غلاي وحنيني
يمكن يزول الحقد ويشعشع الضيّ
لكن حكاية ينحني لك جبيني
في ذمتي ما ينحني لك وانا حيّ
33/أهل الجنوب ....
وعيني اللي كل ما ذعذع من الغرب هبوب
يحلا لها لون الغروب اللي يذوب قبالها
ويا ويل حالي كل ما يحلالها لون الغروب
تطري لي الريم اللعوب وسالفة ترحالها
وعز الله اني كل ما تطري لي الريم اللعوب
حرمت امد ايدي على حاجة وانا ما اقوالها
من سافرت ريم الفلا صديت عن كل الدروب
ما هو قصور بالعذارى بس ذيك لحالها
من فارقتني ما خطف قلبي من الحور محبوب
ولا لقيت الجادل اللي تستحق احيالها
لأن القلوب ان ما وفت لأحبابها ما هي قلوب
والعشره اللي ما ترد الروح ما نسعى لها
إما الوفى اللي يستر الرجّال من كل العيوب
والا الجفى اللي يستر عيوب العرب في رجالها
ما اقسى من فراق الجنوب الا فراق اهل الجنوب
ويلي على اللي كل ما تزعل تشد رحالها
اللي مذيره العتب لا شبت بصدري شبوب
عييت اراضيها وهي عيت تطول بالها
كانت معي مثل النصيب يحدني من كل صوب
كانت دروبي من متاهات الظلل لظلالها
كانت هروبي لا شعرت اني بحاجه للهروب
كانت سماي اللي ليا ضاقت علي ألجالها
ليه اتحداني وانا في كل الاحوال مغلوب
ليه حرمتني من قهر عذالي وعذالها
ليه اتجاهلني وانا لاني جبان ولا كذوب
ليه ارخصت دمعي وانا اللي ما بكيت الا لها
ما ترحم اللي له سنه كأنه على النار محطوب
ما هزها دمع الفقيد اللي بكته أطلالها
ما خافت تهدم السنين اللي بنتنا طوب..طوب
ما فكرت تشفق على حالي وترحم حالها
قولوا لها لو ما تذوب انا بخليها تذوب
قولوا لها لو ما عنت لي مستعد اعنالها
إليا ادمحت لي هالخطا بدمح لها كل الذنوب
وإن جابت الحسنى معي تبشر بعشر أمثالها
أفرش لها صدري وطن وأجمع لها ضلوعي شعوب
وأرقى لها المكانه اللي ما حد(ن) يرقى لها
إن كاني مخطي فأنا ماني خليّ من العيوب
الذنب يغفر والبشر تجزى بقدر أعمالها
البعد قاسي والفراق يضيق الصدر الرحوب
وانا تعبت ادور الحيله وارد احتالها
قولولها ترجع ترا ماني على الحزن مغصوب
وإلا ترا نذر(ن) علي انه ماهو ب أشوالها
إما تجنب هالهبال وتترك البعد وتتوب
والا بتبشر بالهبال اللي ما هو بهبالها
كافي زعل ترا الظروف مقفله من كل صوب
وأنا حملت من الهموم انواعها واشكالها
يكفيني اني كل ما هبت على صدري هبوب
تحن عيني للجنوب وتلتفت بلحالها
والمشكلة اني كل ما حنت عيوني للجنوب
تطري لي الريم اللعوب وسالفة ترحالها
وعز الله اني كل ما تطري لي الريم اللعوب
حرمت امد ايدي على حاجة وانا ما اقوالها
34/قرم وفقير ....
منك العذر وعلي المعذره
لا تحسب حساب هجر ولا هجير
كل ذنب بتذنبه بستغفره
واحد(ن) ما يعذرك ما فيه خير
دور بصدري وطن واستعمره
عندك من الضلع الأول للأخير
عيش فيني وادمر اللي تدمره
واعتذرلي واعتبر سرك ف بير
لا تبشرني بجرح وتذخره
لا تعشمني بفرح وتستخير
ولا تنومني بليل وتسهره
ولا تنام الا وانا جفني سهير
خلني مثل النجوم مبعثره
عيش فيني لا شهيق ولا زفير
لا تقول العفو عند المقدره
خل قلبك صلب وحسابك عسير
المسامح والزعل للمبزره
والا انا لاني زعول ولا صغير
ودي ادري ليه للحزن ثمره
ودي اقطف من قساوتك العبير
ودي اجفل من فراقك واحذره
ودي اعرف لو زعلت شيب يصير
لو تقدر خاطري صدق اكسره
لو صحيح تحبني لا تستشير
ازرع بقلبي سبب يستنفره
اثبت انك غير وان الناس غير
شاعرك ما كل بنت تجرجره
حارت ابه عقول ناس(ن) ما تحير
النسا ما حركوا فيه شعره
ثار عشق وما لقى شي يثير
لو سكت شفت الوقار بمنبره
وان تكلم زمهرير بزمهرير
ما يحضر إلا القلوب مجمهره
وما يغيب الا وعشاقه كثير
إن هجرته تستقر بمحجره
وإن تبعت رضاه ما عينت خير
إعشقه لكن بعد ما تقهره
إبتسم له بس لا شفته كسير
حن لكن حن لا جبت خبره
حب لكن خل حبك بالاخير
لو عطيته وجهك أعطاك ظهره
صد عنه ويتبعك مثل الضرير
لا تحاول تكسبه ما تخسره
صير ثلج يصير لك مثل السعير
ما تميل الا الغصون المثمره
وما يسيل من الجروح الا الغزير
من قبل ما تنقهر منه اقهره
قبل لا يستحقرك خلك حقير
اسكنه حرك جموده بعثره
اعشق اكره عاتب اشره حن غير
انثره لملمه.. لملمه انثره
صد.. ياخي طير لو تقدر تطير
من متى وانا اتحرى لي مره
تثبت اني لا وقعت اوقع كبير
ابك انا مقطوع من غصن شجره
لا صديق ولا رفيق ولا عشير
بدوي(ن) شيب الصبر شعره
ما عرف ريش النعام ولا الحرير
إن غفا كأن السحاب يدثره
وإن صحى يفرش من الرمضا حصير
ماخذ(ن) من قسوة البيد أكثره
ومن شموخ البدو شر(ن) مستطير
جنته صحراه والشوك زهره
والسراب بنظرته مثل الغدير
إن فزع يا مشجعه يا مظفره
من خلقه الله وهو قرم وفقير
كان ما تقدره قل ما تقدره
صير غالي صدق والا لا تصير
الغلا اللي ما تزعزعه اهجره
دام قلبك لا يجار ولا يجير
شوف لك رجل(ن) بليد استحقره
واجد اللي يعشقون بلا ضمير
بس انا لو جبت لي مية مره
ما تحرك فيّ شعره لو تطير
35/الشعــــراء.....
مابقى الا سود الايام تحرمك الرقاد
كيف الاوهام اتجرأ اتسريك مغبون
من متى تجزع من الدمع وتخاف البعاد؟
من متى تقفي بك ظنون وتجيبك ظنون؟
صرت تاخذ كذبتي صدق، ومزاحي وكاد
لو بقول اني بخونك تحسب اني بخون
ماتعرف ان كل شاعر يهيم بكل واد؟
وانهم دايم يقولون مالا يفعلون؟
ابك انا لاقلت ابنساك وانكرت الوداد
والله اني مانسيتك وولاهم يحزنون
من جزع من صفعة الشمس يطمع بالبراد
ومن فقد وجهاته الخمس يلقى بك ركون
اعتبرها هفوة انسان او كبوة جواد
لو بتسمح فانت غالي ولو تجرح تمون
عد صداتك مروة وطعناتك ضماد
خلهن لاراحن طعون ولا ردن طعون
خنجرك يستاهل الطعن ومتوني شداد
ومنك يازين الخناجر ويا بخت المتون
ردلي حنية المزح باحساس الجماد
خلنا واحد يجي صلب والثاني حنون
موت فيني واندفن فيك بثياب الحداد
وان حييت أموت لرضاك واحيا بك بهون
مره ارقد بالكفن وانت ترقد بالمهاد
ومرة ارقد بالمهد وانت ترقد بالكفون
ادري ان شجونك شجون واعنادك عناد
والبلا ان عنادك عناد وشجونك شجون
ربك اللي سخرك لي تقود وما تقاد
والله الخالق ولله في خلقه شؤون
ازرع ضلوعي من رضاك وابشر بالحصاد
لعنبو من جيت ترضيه وترد امحزون
بس تسوالك بلد ؟ قول تسوالك بلاد
انت كل العالم بكون ولحالك بكون
مابعد محبتك حب ومرادك مراد
غير كونك سيد حشاي تدري من تكون ؟
نعمتين اختصوا الخلق من جود الجواد
كافل الأرزاق من حيث مالا تعلمون
البنون ونعمة المال بعيون العباد
زينة الدنيا بلا شك في كل العيون
مثل زينة دنيتي بس عندي شي زاد
من عرفتك صاروا المال وانت والبنون
انتشي بك نشوة التيه لعناق الرشاد
وافزع الك فزعة القرم لشهاب الزبون
واحصنك تحصين الأرزاق عن درب الفساد
واعشقك عشق المظاليم لفراق السجون
لو تزيد الشوق جمرة تحولني رماد
لو يزيد العشق شعرة بوصل للجنون
خل هقواتك كبيرة ونظراتك بعاد
كانك انت بكبرك تهون من اللي ما يهون ؟
ازعلك وارهن حياتي تحت رحمة زناد
تهبى لا والله الا انت والموت تهبون
عاد اذا ما ارضاك هرجي ولا اللي قلت فاد
اننا لله وانا اليه راجعون
وانت باكر بتعرف على ناس جداد
والكلام يجيك من كل شكل وكل لون
لاتحسب ان كل كلمة بتسمعها وكاد
ولا تصدق هرج شاعر وتخدعك الظنون
دايم اعرف كل شاعر يهيم بكل واد
وان هم دايم يقولون ما لا يفعلون
حتى انا اللي قلت اعشقك وما اطيق البعاد
يمكن اطلع ماعشقتك .. ولا هم يحزنون
36/وش اللي يجبر الشاعر .....
انا والليل والعبرة وجرح وخاطر ٍمكسور
ونفس من هجير البعد والحرمان مقهورة
وقلب ظامي لشوفك ولايروى ظماه بحور
وعين تحتري لحظة غياب الطيف وحظوره
ونار تنطفي مره ومره تشتعل وتثور
واقول النار مقدورة وهي ما هيب مقدورة
حسبت الليل بغيابك يمرن الليال دهور
وكني شايل بقلبي ليال الوقت وشهوره
تصبرت وتقدرت وبنيت من الخيال قصور
إلين ان الجفا شد الركايب وانتهى دوره
تحريتك على درب القصيد من ثلاث شهور
وحشا ما مات لك غصن يشف الماي بجذوره
تخيرت الغرام وجيت لا راضي ولا مجبور
وجيتي تسبقين خطاك مرضيه ومجبوره
وانا ما كان لي رغبه أبين واكشف المستور
ولكن الجمال أكبر من الخفاق وشعوره
جمال وود وعيون ودلال وكبرياء شعور
وفتنة تخذل عيون النهار وينطفي نوره
ولك في خافقي صوره تلاشت بين ضي ونور
وأخاف اسكت من الفرحة وتنطق باسمك الصورة
عرفتك وانتهت رحلة قساوة دربي المهجور
والا يا جملة أيام الجفا والصد مشكورة
خذتني للجفا عزه واخذني للعناد غرور
واخاف اكون بعنادى حبيب ومات بغروره
وإذا كانت مسافات الخيانة للغرام قبور
وش اللي يجبر العاشق يخون ويحفر قبوره؟
وش اللي يجبر الشاعر يدور للشعر جمهور؟
مدام انتي محبينه وعشاقه وجمهوره
37/هموم بهموم .....
من يوم فرقانا الى يومنا اليوم
مافات يوم الا وهي مشغلتني
إليا غفيت اشوفها في حلا النوم
واليا صحيت بكل الافكار جتني
عشقتها من قلب ميس ومحروم
وتركتها يوم انها عاندتني
نار تشب بداخل القلب بسموم
حاولت اطفي ضوها واحرقتني
دنيا ثقيلة كلها هموم بهموم
كني حملت جبالها فوق متني
38/الجريمة.....
يوم ثارت في جنون من جنون الجاهليه
عاتبتني لين شبت في شراييني لهبها
واستفزتني وفزت وزعلت مني عليه
وستضاقت من كلامي يوم زعلني عتبها
من بعدها ما بقى لي في محانيها بقيه
اسدلت دمع المحاجر للبكا ورخت هدبها
والله اني مانويت ابدي معاها بالخطيه
بس هي اللي تعدت حدها لحظة غضبها
والله اني كنت اكابر بالعتب بحسن نيه
بس ابدري هو صحيح اني الوحيد اللي عجبها
يمكن اني كنت قاسي بالعتب معها شوية
كثر ما كانت تمنى راحتي واعشق تعبها
جرحتني بالكلام وكبرت حيل القضية
واخسرت بي كل عرق من شراييني كسبها
ولا هي ماكان فيها للموادع مقدرية
والجفا كانت تعافه بس مدري وش قلبها
ليتني مارحت اقياس قيمتي عند بدوية
رجعت لي كل عرق حبها ولا نهبها
وعلمتني كيف بالجفا وانتصر وابقى ضحيه
وعلمتني كيف قلبي لو غلبها ما غلبها
وعلمتني يوم صدت عنفوان الاجودية
ماتلوح للمقفي لو سلبها ما سلبها
رابية بين القبايل والعرب واهل الحمية
عاقله ماتبذر إلا نخلة تعرف رطبها
إن تهادت ذكرتني في خفوق العامريه
وإن تمادت تركب ابليس الرجيم وماركبها
جفنها لا سلهمت به ما يطليق السامرية
تسحبه برضاه عينه وان سهت عينه سحبها
وان حكت تعطي مكانه للحروف الابجدية
كن كلمتها تلفت للكلام اللي عقبها
والحروف اليا تعدت بالشفاه النرجسية
كنها صارت قصيدة بس ربي ماكتبها
وش بوصف من حلاها وش بخلي للبرية
مابها بالحسن عيب واكشفته الا حجبها
شعرها فيه الخوي اللي تبرى من خويه
والشفا لو تشرب الما واختلط فيها شربها
كن في ضمة شفاها جمرتين بنار حيه
كل من حس بدفاها وحترق صد وقربها
شفتها مثل الجريمه وابتليت ابها بليه
غلطة ٍجيت اتحاشى ظلمها قلت ارتكبها
كل شي شفت فيها فيه نبره جاذبيه
موهبة من فضل ربي واشهد ان الله وهبها
كلها لله بلله فاتنه ها لآدميه
عاجبتني من بداية راسها لا سفل كعبها
لو تبادلني شعوري والهدية بالهدية
ماوفت لي لو تبيع ثيابها واغلى ذهبها
هملتني والقلوب الجرهدية جرهدية
وحرقتني والمحبه نارها تاكل حطبها
ولا انا ماكنت اكابر والليالي السرمدية
يمكن ان اللي غصبني للولع فيها غصبها
ياخوفوقي وادري انك منت في حاجة وصية
شف مكاني وانت تدري وين هي يمة عربها
رح لها وان كان فيها قلب يطمح في مجيه
شف طلبها في عروقه وان حصل تمم طلبها
وانشده وان قال عنها من هدر دمي بريه
قله ان اللي حصلي بالمحبة من سببها
ولو يقول اني تعمدت الخطا لجل الأذية
قله اني ما تحمل بالعتب قله ادبها
ولو يقول اني انا اللي كنت بادي بالخطية
قل هي اللي تعدت حدها لحظة غضبها
39/كحيلان .....
يا شعر تبقى في نظرهم كحيلان
وبنظرتي تسوى عيال الحمايل
حنا الاثنين اخوان واكثر من اخوان
لو ما اجتمعنا بالنسب والسلايل
لو نختلف بأسماء وعروق وأوطان
يبقى التشابه بيننا بالخصايل
وانا ليا مني نويت أكسب إنسان
أسعى له بكل السبل والوسايل
أعرف كيف ارد الاحسان باحسان
وكيف احصد بذور الفضايل فضايل
عايش زمن عاصرت به كل الازمان
ما اعيل بس انطح ثمانين عايل
اكسب عدو واحرق به قلوب عدوان
اشعل فتيله بس أطفي فتايل
إن خفت ضعف أخاف من ضعف الإيمان
وإن عفت حمل أعاف حمل الجمايل
ما أضمى على الساحل ولو مت غرقان
لو مركبي تابوت والموج هايل
أغرق شهيد أرحم من أموت عطشان
طيحة شموخ ولا وقوف متمايل
ودك ليامن جيت في كل ميدان
لو ما انت الاول بالصفوف الأوايل
خلك ليا عودت خسران خسران
ينقال عنك عامل(ن) لك عمايل
لا صرت تحلم احلم تكون سلطان
وان جيت تقنع اقنع بحلم زايل
الوقت غربة وآخر الدرب عنوان
والعمر رحله والتجارب رحايل
وانا كثر مالي من الناس خلان
اللي صفولي بالشدايد قلايل
شايف حسد.. قل شايف اشكال والوان
قابلت ظلم.. الا لقيت الهوايل
وإن عشعش بصدري من الغبن شيطان
وتسددت دوني جميع الوسايل
بلقى من عيال الحمايل كحيلان
اللي يكفي عن عيال الحمايل
مرات ربك يرزقك خوة إنسان
واحد ويسوى في عيونك قبايل
40/أفة العصر .....
إبتدا للشعر مبدا وانجلا ليل وضباب
وانصتت لاجلي مسامع وانظرت فيني عيون
وانتخت في القصايد من على صدر الكتاب
واعتزي بالشعر شاعر والخلايق يسمعون
وما بديت الا بمثل للسؤال وللجواب
واسألوني من بعدها لو بغيتوا تسألون
بطرق ابواب القضية كلبوها باب باب
واعرض اسباب الحقايق وانتم اللي تحكمون
من تحررنا وحنا عايشين في سراب
إنجرفنا مع متاهات الهتايف واللحون
وانسجمنا بالسعادة في عيون الاكتئاب
ومانبالي في مصير الكارثة حتى تكون
آفة الإدمان شاعت في بلدنا بالخراب
واستقرت في جسدنا مثل ما انتم تعرفون
حطمت كلمة عزيمة داخل قلوب الشباب
وزعزعت مبدا الشجاعة والقناعه والظنون
عاندت قلب البطولة في مرونة وانسياب
بدلت عقل التطور بالسفاهة والجنون
حاربتهم حرب ظالم من ورا سترة حجاب
واغرقتهم من ديون في ديون في ديون
لو دعت قلب الهونة هام فيها واستجاب
كنهم يوم استجابوا يدركون ويشكرون
مايبالون بخطاها من وراها ويش جاب
اولتها يلعبون وتاليتها يتعبون
إرشدوهم للسلام وللطريق وللصواب
ذكروهم في خطاهم يا عساهم يذكرون
آفة حطت عليهم ياعساها للذهاب
إبتلوا فيها وعاشوا من عناها يشتكون
من سبايبها فقدنا كم بنت وكم شاب
وكم هنا وكم لنا بيد ناس يجرحون
ليش نبقي تحت ذلة ورحمة انياب الذياب
نظحك بوجة الاعادي وآخرتها يضحكون
ننظر الشر بنواظر يأسنا ونقول غاب
ننتظر كلمة عساهم يصلحون ويفلحون
يستبدون ببلدنا ما يخافون العقاب
وان تجاهلنا تمادوا وان حكينا يزعلون
شجرة الزقوم تبقى لجلهم يوم الحساب
شجرة تشوي القلوب وتمتلي منها البطون
وارتكاب الذنب وسهوا عكس عمد الارتكاب
ومن يطيحون بخطاها عمد حتما يندمون
وانت ياللي تمتحنا بالخفية والغياب
يوم تاجرت بسمومك في وطنا من تكون؟
من يجيب لنا المخدر خايب والسم خاب
وكل ناسي يتبعونه بالتجارة يخسرون
نحظر التاجر وسمه من تحت قاع التراب
ونجعلة عبرة لمن لايعتبر وسط السجون
للسما عز وثبات وللسحاب الانسحاب
والرفيع يدوم عالي والوطن والدون دون
وياوزير الداخلية يارفيع للجناب
لاتهون وجعل كل من يستمع لي مايهون
قدها ولك البطولة وانت كفو للثواب
ومايزعزع كبرياء محمد الخالد حصون
واصل دروب المسيرة والبس لنصرك ثياب
دامنا عشنا نصون ترابنا لامانخون
ومانفرط بالكويت ولو على قطع الرقاب
والأعادي لاتعزووا يعتزون ويعجزون
ومن يعيشون بثراها مايشوفون العذاب
ولا حصل خوف عليهم بل ولاهم يحزنون
في ظلال الشيخ جابر حكمنا بالعدل طاب
قادنا وحد هدفنا والخلايق يهتدون
الزعيم اللي يهيب المعتدين ولايهاب
من سلايل حكم ناس ويحكمون وينصفون
وانتهى شرح القصيده وسط مضمون الخطاب
وان خطيت بشي فأنتم خير من هم يعذرون
وهذي ابواب القضية كلبوها باب باب
قلت انا كل الحقايق وانتم اللي تحكمون
41/الجمهره .....
إي بالله أخطوا والخطا اللي جابهم عين الصواب
مبطي وأنا أشوف الطمع يكشف رداهم وأستره
مايملي عيون الحسود بهالزمن غير التراب
ومن لايتوب من الخطا تحرم عليه المعذره
اللي من أولها خراب أكيد تاليها خراب
والبندق اللي ماتثور في هدفها تذعره
ودك اليامن جاتك الغلطه من الناس القراب
الصاحب اللي ماكسبت محبته ماتخسره
مشكلتي إني ماعرفت أحسب لصدتهم حساب
قلطتهم صدري على ذكرى قصيد وحنجره
صوت ٍ يصول بمنبره واخطاب مامثله خطاب
والطيبه اللي زعزعت صوت الخطيب ومنبره
مافيه دمع ٍ صوبوه أحبابي بوجهي وخاب
ولازرق حزني على غالي ولافج انحره
كل الزهاب اللي معي ذكرى من أصحاب الزهاب
واللي بقالي من عذاب اشرس طريقي وأخطره
لأني تجنبت الغرق.. عديت من فوق السحاب
لأن أكثر أصحابي ورق..ماشفت للطيب إثمره
والله ماحطيت بين الحقدوالخوه حجاب
حتى غدوا ربعي يحدوني على الضيق أشكره
البارحه ثارت علي رقاب وأوتني رقاب
البارحه ياثقل دم البارح ويامحقره
أثر المصايب ماتجيك إلا من الناس القراب
وبهالزمن حتى الخوي اللي تثق فيه أحذره
أهب ياوجه الحسد وشلون جمعهم وغاب
كيف السنين اللي عطتني بعثرتهم بعثره
لابارك الله في رفيق ٍ تزعله كلمة عتاب
ولاجمع الله الرجال اللي تفرقهم مره
الصاحب اللي مايجي من صحبته غير العذاب
نذر ٍ علي إن ماهجرني وإلا أنا اللي ب أهجره
من يفتح لفرقاي باب أفك له عشرين باب
وأذا خويي مايقدر خوتي ما أقدره
عو ّدت نفسي كل ماشددت لليمّه ركاب
مأصد وجهي عن طموح إلا لياجبت خبره
أن روّحوا فأنا بري منهم ليوم الحساب
وإن جرحوا قولوا لهم ماحركوا فيّ إشعره
شفهم لهم حول السنه ولا خذوا مني جواب
أحسن دوا للي يحاول يستفزك تحقره
ماكنت أحاتيهم صغيّير ..عاد أحاتيهم شباب
الصاحب اللي ما أذخره لليوم الأسود ما أذخره
شفني جمعت أوراقهم بكتاب وأغلقت الكتاب
ياوقت لم اللي تلمه وأنثر اللي تنثره
اللي يخاف من الظما يترك لنا طرد السراب
واللي ماهو بقد الظلام ووحشته لايسهره
عقب أكتئاب البارحه ماعاد انا حمل إكتئاب
الطيب جرجرني وانا ماني بناقص جرجره
انا تجرعت الظما لين أحترق وجهي وذاب
انا كسرت بخاطري قبل الصداقه تكسره
انا خسرت اللي غيابه غير عن كل الغياب
انا غفرت لعالمٍ ماتستحق المغفره
انا أكثر (أنسان) تعلم من كثر ماأخطأ وصاب
انا أخر (لسان) يتكلم في زمان الثرثره
انا القصيد اللي فزع من دفتره مليون ناب
وانا الوحيد اللي جمع مليون ناب بدفتره
جفني وجرّحه السهر ، حيلي وهدّته الصعاب
دمعي هدر،ضحكي ندر،عمري وضيعت أكثره
شيبت بعقول العرب..هيبت روس ٍ ماتهاب
جمهرت ناس ٍ عمرهم مايعرفون الجمهره
ماصرت ذيب إلا لأن اللي تحدوني ذياب
ما كنت أغيب إلا لأن العفو عند المقدره
ترى حلاتك لاحملت لصاحبك كلمة عتاب
أن مانطقت بها بوجهه ماتذمه بظهره
في هالزمن مايملي عيون الحسود إلا التراب
والا الحظيظ.. الطلقه اللي ماتصيبه تذعره
ودك اليامن جاتك الغلطه من الناس القراب
الصاحب اللي ماكسبت محبته ماتخسره
42/القدس.....
تخيلوا لو يفزع الجار للجار
في مجتمع حاقد و غاضب و مشحون
و تخيلوا لو تلتفت كل الانظار
للمشهد اللي وقفت دونه عيون
وتخيلوا لما رحى الحرب تندار
ما بين حكام العروبه و صهيون
اليا متى نستقبل ذنوب بأعذار
و اليا متى نستنزف جروح بطعون
نتبع خطأ تيار و نصد تيار
نبعد و عدوان المسلمين يدنون
لو كان بقلوب العرب صبر و اصرار
ما كان سووا فيكم اللي يسوون
بهمالكم بدلتم الثار بالعار
بعتم تراب القدس و انتم تشوفون
حنا كذا بمعارض الراي شطار
لين أستوى بالمجد عالي و مطمون
من كثر ما كنا نجامل و نحتار
صرنا نخاف نعارض اللي يقولون
لقدس تصرخ و السما تحصد أعمار
و الدم ينزف و الارامل يموتون
و ارواح تسلب سلب و اعصاب تنهار
و اطفال تعدم و البشر ما يحسون
خمسين عام نحارب الشرك بأحجار
و بسكوتنا نبني عمارات و حصون
ننسى و كن اللي حصل شي ما صار
نسكت وكن ما بيننا شخص مغبون
لين أشربوا من دم الاسلام كفار
و بعروقنا صاروا يروحون و يجون
استضعفوا لين اضعفوا كل الاقطار
ساقوا غضبهم و الاوادم يصلون
يستدرجون العزل للسمح الابرار
يستمتعون بقتل الاطفال بالهون
ما كنه الا شعب مخلوق غدار
في قلب لا ساكن و لاهو بمسكون
بالذل ماتلقى على صيته غبار
كبارهم واطين و صغارهم دون
لا بارك الله فيهم صغار وكبار
و لاجمع الله شملهم وين يسعون
و ما تنطفي شمس الحقيقه و لو جار
فينا زمان الذل و الضعف و الهون
و دام الفشل و الضعف ثلثين الاضرار
لابد ما نضحك و لا بد يبكون
و أنكانت قلوب العرب تنذر انذار
ليش انتجاهلهم و اهم يستبدون
الناس قالت حارب النار بالنار
و مالله خلق للادمي عمر مضمون
و ان كانت الفزعه من أحرار لأحرار
حنا البروق اللي غدت سحب و مزون
و حنا السكوت اللي سبق عصف و اعصار
و حنا سباع الكون يا لعنة الكون
و حنا عرب و العرب ما تترك الثار
بافعالنا ماهي بقولة يقولون
نزعل و لكن بالزعل دمنا حار
نفزع اليا شفنا العذارى يصيحون
عقالنا معهم من العلم مقدار
و مجنوننا ينطح ثمانين مجنون
ياشعب يا ثاير و ياشعب مغوار
هون من اسباب المعاناه و تهون
أصرخ على كل البشر و أجهر أجهار
و خل اليهود إن مادروا عنك يدرون
و أجمع شتات الوقت تذكار تذكار
و أذكر مواقف كل طاعن و مطعون
حارب بدين الخالق النافع الضار
و استذكر الرحمن و ابليس ملعون
و اطرد من ارض الله عدوين الاذكار
و ان جوك و لا جعلهم مايردون
و رح قلهم حنا على كل مشوار
و ذوقوا مرارة نصف ما تستحقون
و اذا رضيتم قولوا الوقت دوار
و اذا زعلتم سووا اللي تسون
43/كـحـيـلانــ ....
يا شعر تبقى في نظرهم كحيلان
وبنظرتي تسوى عيال الحمايل
حنا اثنين اخوان، واكثر من اخوان
لو ما تجمّعنا عروق وسلايل
لو نختلف باسماء وعروق واوطان
يبقى التشابه بيننا بالخصايل
وانا ليا منّي نويت اكسب انسان
أسعى له بكلّ السبل والوسايل
أعرف كيف اردّ الاحسان باحسان
وكيف احصد بذور الفضايل فضايل
عايش زمن عاصرت به كل الازمان
ما اعيل بسّ اكسر ثلاثين عايل
أكسب عدو، واحرق به قلوب عدوان
أشعل فتيله، بسّ اطفّي فتايل
إن خفت ضعف..اخاف من ضعف الايمان
وان عفت حمل..اعاف حمل الجمايل
44/مـلـعـونــ أبـو الـعـشـق .....
ملعون أبو العشق دام العشق دلّعها
لاصارت البنت تامرنا وتنهينا
تجزم على الراي والكلمه وتقطعها
وحنا الرياجيل لارحنا ولا جينا
45/أربــع جـهـاتــ .....
يالحبيبه خفوقي مايبيك ويبيك
أشهد أنك حبيبه غير كل البنات
وين ما ألد وجهي بالطريق التقيك
صرت أخيلك واشوفك في جميع الجهات
الإهداءات
ديوات الشاعر حامد زيد 
العرض العادي
المواضيع المتشابهه الموضوع: ديوات الشاعر حامد زيد 
