شبكة الشموخ الأدبية - قصائد لشاعر السور الشاعر سليمان الهويدي

لا واهني اللي رصيده ملايين

لا واهني الي رصيده ملايين *** وامضاه في راس القلم يقبلونه
وبواخره تمشي بكل البلادين *** ومصادره من كل شكلٍ نمونه
وعنده عيالٍ صالحين ورشيدين *** لا غاب والدهم هم يمثلونه
بيته يعانق شاهقات الضلاعين *** تلقى الحمام مبيضٍ في ركونه
وديوانه اكبر مابنى بالدواوين *** مفتوحٍ واجواد العرب يدلونه
فيه الخدم متكاملين ومطيعين *** من جاء لهالديوان بيباشرونه
ولا صارت الريضان مثل البساتين *** ماطاب من ريضانها ينزلونه
تلقى الخزاما والنفل والرياحين *** تطرب له الورقه وتزعج فنونه
مع لابةٍ تنطح وجيه الشياطين *** عزٍ لهم وهم يتفادون دونه
هذي الحياة الي لها الناس شفقين *** من غر منها يا حياة المهونه
اشوى من الي ياخذ الدين بالدين *** وطّلابته راس الشهر يبلشونه
ومع الفقر عنده بزور ونساوين *** يبون حاجتهم ولا يعذرونه
يقضي معاشه مامضى الشهر يومين *** الفقر شيبّه وشيب عيونه
عايش ولكن عيشة الفقر مسكين *** كنّه مصخن وهو مابه صخونه
يا الله ياقابل صلاة المصلين *** انك تقوم بعوننا ثم عونه

قال الشاعر في مدح وطنه الكويت:

ياربنا تحسن اخلاقي مع اعمالي *** واعوذبك من هوى النفس ومخاطرها
اكرمتنا في نهوض كويتنا الغالي *** دار الاجاويد رب البيت ناصرها
دار يجي ذكرها دايم على بالي *** ماهي بخيله ولا ننسى برايرها
والفخر برجالها ذربين الافعالي *** هم سورها اللي حموها عن مخاطرها
في ظل شيخ عريب الجد والخالي *** ابومبارك اليا كبرت محاضرها

وقد قال الشاعر هذه القصيده عند زيارتة للمملكه:

جيت الرياض اللي لها طيب الاذكار *** دار الملوك اللي بعيد نظرها
دار السعود اللي تحامي عن الجار *** هذي عوايدهم ولا أحد نكرها
يانعم بالمقرن الياصار ماصار *** كل يعد افعالهم ويخبرها
عبدالعزيز ارث طويلين الاشبار *** عقبان نجد اللي يداري خطرها

وقال الشاعر في الغزل الكثير.. منها هذه الابيات:

صاحبي يلبس البرقع ماهي عادة له *** مير اخذ سلم جيرانه وصارت طبيعه
مثل من قال لاجيت الوطن خذ دله *** اتبع الناس وان ماطاعك الوقت طيعه
هيه ياللي اكلفكم على برقع له *** وسعو قرضته ترى عيونه وسيعه
فصلو له حرير ناعم مايمله *** حيث بشرة خدوده بالتأثر سريعه
صاحبي لاهرج تشفق على هرجتله *** من حلاوة كلامه كن هرجه يبيعه

وايضا قال في الغزل:

ليت من يدري عن الزين وشلونه *** فاقده من مدة ايام ماجاني
طمنوني عنه ياللي تمرونه *** جعل سيد البيض ماهو بمرضاني
أن نشدكم يابعد عيني عيونه *** خبروه انه بلا قلب خلاني
خبروه اني اقاسي من طعونه *** لاتشاوى الجرح الأول ظهر ثاني

ومن غزله ايضا:

ياهيه يابو شعر فله *** اللي على المتن نثاره
وقذيلتك بالهوى هله *** وعيونك الشعل جباره
بالعون وقتك على حله *** حلوه وتسوقين سياره
ماني معاتبك بالزله *** يومك تموحين بالطاره
تركت لك سايدي كله *** فوتي عساها لك اسفاره

وهذه القصيده قالها في مرضه:

يابوعلي ماني بضامن حياتي *** والموت من حاتاه يابوعلي مات
عسى ما اموت الاكبار بناتي *** يمشن سعيدات ولاهن يتيمات
ان مت قبلي صفوة الخلق ماتي *** ماتو مشاكيل وماتن عفيفات
مافات من عمري فلاهوب ياتي *** والحي لابده يعود للاموات

وقال الشاعر ايضا هذه القصيده يرثي نفسه فيها:

انا ارثي الناس والا ارثي على حالي *** عزي لنفس ماهو مرتاح راعيها
قولو لسالم تراني شفت الاهوالي *** والله اعلم يابو باسل بتاليها