صوت ..و.. صدى
بين الفدغوش والطومي

سر يا قلم وأكتب شعوري بالأشعار = لمبارك الطومي حفيد المناعير
يا الوايلي يا الحر يا واف الأشبار= لك حشمة ٍ عندي وهيبة تقدير
شاعر حكيم وللتماثيل بيطار = وتسخر القيفان بالعرف تسخير
وجدي دعاني ساهر الليل محتار = ضايق وبالي منشغل بالتفاكير
على حبيب ٍ غادر الحب والدار = سافر وخلاني ولا أبدى معاذير
مدري وش اللي مبعده نور الأنوار = مدري زعل وإلا تغلي غنادير
شب الولع في داخل القلب والنار = وأتعبت رجليني بكثر المشاوير
وشربت كأس ٍ ممتزج هم وأمرار = بغياب سيد البيض ورد النواوير
وخنجر غرامه داخل القلب تذكار = وعندي على الحالة شهود وتقارير
أشوف قصر الحب بالعين ينهار = إنهر ودمّر قصة الحب تدمير
وبينت مكنون سدي والأسرار= وصوّرت لك حالي والأوضاع تصوير
وقبلي كثير من الهوى صابه أضرار= فرسان مع شعار ناس ٍ مشاهير
عنتر لأجل عبلة مشى درب الأخطار = وقيس الملوح والعواجي مع الزير
وكتاب عشاق العرب فيه الأخبار= فيه الحقايق واضحة دون تزوير
وأخذت أنا من الوقت حكمة وتعبار = طير ٍ بلا جنحان لا يمكن يطير
مدري متى دورات الأيام تندار = وعقب العسر تصبح حياتي تياسير
نظمت قيفاني ورتبت الأفكار = وكتبت لك كل المعاني بتفسير
وأبغى النصيحة منك قول ٍ به أثمار = كيف العمل بالله كيف التدابير ؟
أرجوك ترشدني على درب الأخيار = وسطرت لك قافي بالأوراق تسطير
يا مبدع القيفان من عمق الأبحار= أبغى مردك عاجل ٍ دون تأخير

باسم الذي ينشي مراويح الأمطار = عالم خي الغيب رب المقادير
المالك الوهاب علّام الأقدار = رب الملا رزاق عكف المناقير
منجي سفينة نوح مطلع هل الغار = هو عون من ضاقت عليه المعابير
رد ٍ على اللي ما على قوله إغبار = ومعناه واضح ما يبي زود تفكير
أرسل يشاورني وأنا أقوله صار = شوري عليك تمرر الوضع تمرير
خذ كلمة ٍ مني بها بعض الأشوار = معنى كلام ٍ فيه حكمة وتنوير
إحذف ورا المقفي عدد سبعة حجار = وخله مهف مقيط في قاعة البير
ترى حلاة الثار في ساعة الثار= عند العرب يوم النقار والمثاوير
إترك طريق اللي ضرب درب الأسفار = لا جاب عذر ولا حصل منه تبرير
يا سعود خلك من بعيدين الأنظار = وإعرف طريق الواردة والمصادير
إصبر على ميلة زمانك اليا جار = وإسمع كلام أهل الوجيه المسافير
الحرّ مثلك يتبع دروب الأحرار = اللي لهم بالموقف الحرج تأثير
يا سعود لك عندي معزة ومقدار = حيثك عزيز ومن رجال ٍ بهم خير
خلك حكيم وفي مواقفك صبّار = ولا تكشف أسرارك لناس ٍ معاثير
إكتم خبر سرّك ترى الحبل جرّار = وإحذر من اللي للسوالف مداوير
أبيك دايم في مواقفك جبّار = تدق في قلب المعادي مسامير
لا لا تضيم يا ولد مكرم الجار = ما أرضى عليك البهذلة والمخاسير
إحلم وعدّ اللي مضى تقل ما صار = وإصحى ترى مبدأ العواصف معاصير
وارجع وأقول الحب مابه لكم عار = ولا في كلامك يا أبيض الوجه تقصير
والخير في ما جاب ربك وما اختار= الله يدبركم على خير تدبير

صح لسانك والسان شاعر المستقلة

فقيد العلم والشباب سعود الفدغوش

وشكرا على هذا الإبداع وأتشرف بمتابعة جديد روائعك

نص فـــي غــاية الــروعـــة والجمال
وفــي منــــــتهى التـميز والكــــمـــال
لله درك شاعرنا المبدع في نظم الأمثال

الشاعرمبارك الطومي
صح السانك مليوووووووووووووون
ولا يكفووووووووووووووووووون
وأبدعت وجــــــــملت بشعرك وأمتعت
وكذلك صح الشاعر سعود الفدغوش

نصوص تمثل أصالة الشعر
وجودة الصور وروعة
المفردات والمــــــعاني

الشاعر الكبير مبارك الطومي

صح السانك ولا فض فوك

ولله درك للقصيدة الرائعة

وقصيدة المرحوم سعود الفدغوش رائعة كذلك

قصائد تسـتحق التصفيــق

إعجابا واستحساناواحتفاء

لله درك وصح قلبك ولسانك ولسان

وقلب الشاعر سعود الفدغوش

لله درك وصح فكرك و قلبك

وصوت وصدى اكثر من رائعين