هجوس السهر

دكت هجوس السهر والنفس عيت تهيد=والعين تشره من البارح على أهدابها


والصدر حلت به الضيقه وقامت تزيد=لين إرجحت كفة الضيقه على إنصابها


حاولت اجنب همومي عن سكون القصيد=لكن عصاني هواي وطير إسرابها



الله على الوقت والحاجه وكف الزهيد=والله على اللي حياته ماتقابابه



وعزي لرجلٍ يضده من زمانه ضديد=في ساعةٍ تجحد الأصحاب بصحابها


.وعزي لرجلٍ على الشدات ماله عضيد=ولاله عزومٍ تشيله وتهقوى بها


بين الجماعه ولكن في ظروفه وحيد=ودنياه من دون وجهه قفلت بابها


كل مابرى من قديم الجرح . تله جديد=لين اكشفت سدة الحاجه وغنى بها



ياصاحبي ماورى دنياك علمٍ وكيد=متناقضه مثل اهلها واحسب إحسابها



.والناس أجناس واكثرها ترى مايفيد=وياكثر ناسٍ تعرف ولاتعزوى . بها



وياكثر ناسٍ على الدنيا نفعها البعيد=وياكثر ناسٍ مصايبها من اقرابها



ياقل ناسٍ لها عقلٍ ورايٍ سديد=ناسٍ يقدي سنعها وتقدى بها



وياقل ناسٍ بوقت اللازمه ماتحيد=وياقل ناسٍ إلحاها تكرم اشنابها



والناس من لايداهمها بمتنٍ شديد=تدوسه الناس دوستها على ترابها


وراعي الردى والمذله في حياته فقيد=لو كان عايش على الدنيا ويسعى بها


والموت اقرب من انفاسك وحبل الوريد=ولابد ماينتزع روحك من اجنابها


وترى الرجال العزيزه بالشدايد رصيد=أهل الوفاء اللي جذبها طيب مجذابها


وترى النخل مايهز أقصاه مير الجريد=يبقى شموخه بوجه الريح ماهابها


ولو الليالي تعلمنا على اللي تريد=كان ابتعدنا عن الضيقات واسبابها



ولو الليالي تقرب كل خلٍ بعيدٍ=كان الحبايب تحمل غيبة احبابها


تصغر كبار المصايب في عيون العنيد=وتكبر على اللي طمان النفس يرضى بها