وينه حبيب القلب

وينه حبيب القلب والله لاجيه = والقلب يلقى بعد غربه حبيبه **

القاه واهديه المحبه وأسقيه = وادفع له ايامي وعمري ضريبه **

والقلب ما له غير حبٍ ينجّيه = من حال دنيا في أساها عجيبة**

يقول : محبوبي ، وانا اقول : لبيه = لبيه كل اللي تبيه استجيبه **

القلب في وصلك تميته وتحييه = واحلام عمري في غرامك رحيبه **

وين انت ؟ حارت خطوتي بعالم التيه = وايامي امست عقب صدك كئيبه **

انا لك وقلبي وكل اللي ترجيه = والدنيا من غيرك حبيبي غريبه**

الحلم من دنيا الهنا غسل ايديه = لانك مناه وأنت وحدك نصيبه **

اقرا بعيون الناس يمكن الاقيه = واسأل شفاه البدر وارجع بخيبه **

واظل في عين الوله ساهر ابكيه = ولاهل الهوى والحب دوم اشتكي به ***

واتعانق بطيفه واحبه واناجيه = واتخيله يطفي بقلبي لهيبهْ ***

واعيش ميت ما له عيون تبكيه = واموت حي وللمسرات غيبه **

عيشٍ بلا حب وهنا وأنس ما بيه = والموت للمحروم اجمل طليبه ***

يا الله واسعد كل عاشق وهنيه = يكفيه نار الحب أكبر مصيبة