بصمة ناعمة ؟

ليت الزمن يرجع الخمس وثمانين =هجري مهو ميلاد يالعبدليه
يوم البساطة كل ابونا بسيطين =ما نعرف الشيخة ولا العنجهيه
يوم الغدا تمرات وبيوتنا طين =يوم الشقاوة والحياه الشقيه
ولعب مع الشارع بليا حذايين =ونفرح اليا جا الغيم هاك العشيه
ونركض اليا جانا المطر بالمواعين =وناكل من المثعب لا طاح ابرديه
واليا شرينا الثوب قلنا لبعدين =نبيه للعيدين ما فيه شيه
ما ناخذ المدة صغار عزيزين =من خوف لا تلحق اهلنا زريه
مانعرف الرحلات ولا على وين =ما قط فالرحله وصلنا الحوية
دايم بحارتنا على الزين والشين =وان جا غريبٍ جات فينا حميه
جهال كنا حافظين القوانين =نمشي كذا ما فيه هاذي وذيه
وينه زمان راح ياشين هل الحين =رغم التقدم والحياة الهنيه
اقراب لكن عن بعضهم بعيدين =حتى الاخو ما حس وش به اوخيه
ليت الزمن يرجع لخمس وثمانين =يوم الطفولة والحياة الشقيه