هاته وهات عباته

العبوق · 01-28-2019, 01:49 PM

صبحكم الله بالخير النور والسرور وبداية اسبوع جميلة وسعيده تنتظركم ان شاء الله، شكرا اقولها لكل من تكلف وسأل سواء بالاتصال بالجريدة او عن طريق صفحتي على موقع التواصل الاجتماعي تويتر، فشكرا من صميم القلب لكم قرائي الكرام، فترة قصيرة اللي غبت فيها عنكم وعن حبيبتي القبس بس الصراحة اجذب لو قلت اني ما ولهت ولا فقدت هذرتي معاكم، علشان جذي شكرا للمرة المليون على تواصلكم وعلى تشجيعكم وعلى سؤالكم ربي لا يحرمني..
اصنف هذرة اليوم واللي عنونتها من مصطلح وايد عجبني من مقابلة السيد وليد النصف رئيس التحرير مع الإعلامي المميز غالب العصيمي في برنامج بالعربي مع غالب، وان شاء الله ما يزعل علي بوعبد اللطيف ويسامحني على البوقة البيضة، لأن «دهنّا في مكبّتنا» مثل ما يقولون، يعني المصطلح ماراح ابعيد، بأنها مهمة لأن لها ابعاد سياسية واقتصادية واجتماعية وتربوية وانسانية، هذا غير انها حديث الموسم الكويتي بهذه الفترة، علشان جذي قلت لزوم اني اهذر معاكم فيها بشكل موسع بعيد كل البعد عن العاطفة والمسكنة والعواطف اللي اموديتنا جفى، خاصة بوضعنا اسم الله علينا بوجود حكومة للأسف انها في اغلب قراءتها اتخاف من اضلالها ومجلس اغلبه ماعندهم لا شغلة ولا مشغلة غير يطالعون بعضهم البعض ويتناقزون على بعضهم البعض ويداحرون بعضهم البعض.
إسقاط القروض!
شعار ارفعه وايد ناس منهم اعلاميين وسياسيين وكتاب ومؤثرين وغيرهم، واقدروا للأسف انهم يخلون وايد ناس تنجرف وراهم ويرفعون شعارهم اللي اتوقع الهدف الرئيسي منه استمالة عواطف المواطنين وزيادة عدد متابعين وshow اعلامي وايد مليق، لأن الإسطوانة مكررة وقديمة، هذا غير التكسب السياسي للوصول الى اهداف شخصية بحتة، لأنه من وجهة نظري المتواضعة جدا ان اللي يوقف ويدعم ويطالب بإسقاط القروض هذا كلش ملش ما يحب لا ديرته ولا اهل ديرته.
ادري كلامي وايد صعب ووايد صريح ووايد منكم الحين مسك تليفونه وبدا مسلسل السب والشتم والقذف في حساباتهم في الطير المدلقم «تويتر»، لأن كلامي مو على هواهم، بس كلش مو مهم، لأن انا تعودت اقول الصراحه اللي وايد منكم ما يحب انه يسمعها ولا يقولها.
بتقولون انتو في القبس ضد اسقاط القروض وضد مصحلة المواطنين لأنكم اتحاتون البنوك وغيرها، وانكم متغطرسين.. ومصطلحات مالها اول ولا اخر تعودنا عليها وصارت روتين حياة يومي بالنسبة لنا، طبعا شرف لي ان رايي يقترن بـ القبس لأني بنت القبس ومؤمنة تماما بسياستها، بس للتوضيح فقط لا غير، انا اهني اكتب رايي الشخصي اللي القبس عمرها ما افرضت علي اني اغيره، لأنها تؤمن بحرية الراي والراي الآخر، وهذا اتوقع ما تأكد من كثرة اللغط والجدل والقيل والقال اللي صار عقب مقابلة رئيس التحرير التلفزيونية.
انا، والعياذ بالله من كلمة انا، قبل خمس سنوات وتحديدا بنفس هذه الصفحة، كتبت عن رأيي بالقروض ومسألة اسقاطها واللي اهو ما تغير ليمن اليوم، ولا راح يتغير بعد عشر سنوات اذا ربي عطاني عمر وياكم، تدرون ليش؟
لأن اللي اسمعه شي واشوفه شي ثاني، يعني انتو تطالبون الحكومة انها اتطيح قروضكم علشان انتو متعثرين بالسداد وعندكم مشاكل مالية، ووايد منكم عليهم ضبط واحضار وغيرها من الأمور اللي أدعو المولى عز وجل انه يفك عوقكم فيها. انزين كل هالأمور منو يابها لكم؟ منهو اللي حط على اضهوركم القروض؟ منهو شربكم بالديون وبكذا جهة؟ ومنهو اللي خلاكم اتوقعون كمبيالات وشيكات؟
أنا سبب نفسي بنفسي!
الإجابة وحدة على جميع تساؤلاتي، واهي انتو نفسكم، نعم انتو بكامل قواكم العقلية والنفسية والبصرية والحسية، رحتوا طلعتوا شهادة راتب من دواماتكم وحطيتوا ريل على ريل بالبنك وقلتوا حق الموظف عطنا الحد الأقصى اللي نقدر ناخذه، وطبعا هذا من زود الرهاة اللي انتو فيها، ليمن اهني عليكم بمليون تريليون عافية، معاشاتكم وانتو حرّين فيها، محد له شغل فيكم ولا احد له منة عليكم، بس عقب ما تاخذون بعضكم الأنواط واتروحون اتمردغونها بسفرة ولا سيارة ولا جنطة ولا ساعة انتو مو قدها، هذا غير بعض البنات المينن اللي من واحد يسبل لها بعينه ويقول لها ماني قادر اعيش من غيرج بس ما اقدر اخذج لأن عندي مشاكل مالية تروح من فجر الله البنك وتاخذ قرض وتعطيه اياه على صحن اموقع من خوفو الأكبر، وتقول له تفضل روح حل مشاكلك وانا ناطرتك، ومن عقبها تدق عليه تلقى الجهاز خارج نطاق التغطية، عاد اهي، خنت حيلي، تقبض من دبش.
وعقب شهر ولا شهرين بالكثير، تبدون عاد بالتحندب والتشكي والتبجبج واشلون ومالون وتعال يا عمي شايلني، وتعالوا طيحوا قروضنا ترانا معسرين وتعالي يالحكومه فكينا، واذا الحكومه ما مشت على هواكم تصير مو خوش ومو زينه، واذا احد عارض رايكم وقال لا تطيحون القروض يصير مو من ربعكم ولا ترضون عنه.
لا طبعا.. هذي لا عدالة ولا حكمة ولا رزانة من الحكومة اذا طاوعتكم ومشت على هواكم، لأن مو من حقها تقوم بهالخطوة الغير موزونه، واللي راح اتسبب وايد اثار سلبية اكثر من ايجابياتها، اولها سمعتنا جدام خلق الله بأن حكومتنا الرشيدة اتعالج الغلط بغلط اكبر منه، ثانيا انها راح اتعلم البعض من الشعب على الرباده وعلى مبدأ هاته وهات عباته، واللي طبعا احنا مو ناقصينه كلش، ثالثا انها راح اتعزز ثقافة تبي شي افتحلك حساب بـ«الطير المدلقم» صارخ وهدد وروج اشاعات علشان تاخذ اللي تبيه، لأن للأسف احنا شعب بعضه «يخاف ما يختشيش» على قولة اخوانه في مصر المحروسة.
شر البلية ما يضحك!
المضحك المبكي لمن الواحد يتمشى في «التايم لاين» ويشوف التغريدات المناهضة لحملة اسقاط القروض يقول هذيلة من صجهم؟ هذيله قبل لا يكتبون هالتغريدات فاجين ريجهم ولا من اليوع كاتبين هالكلام؟ لأن مستوى بعض التغريدات مخجل للأسف وما يرقى بمستوى شعب كشعب الكويت بكل صراحه اقولها، يعني على سبيل المثال لا الحصر من التغريدات اللي قريتها واللي تقدرون تقرونها بنفسكم لمن اتحطون هاشتاق اسقاط القروض، ان البعض يقارن منح الكويت قرض لدولة معينة مع اسقاط قرضه اللي ماخذه علشان يشتري سيارة يكشخ فيها جدام البنات في مروج ولا كاريبو الصالحية، ولا اللي تقول صندوق التنمية على اي اساس معطي الديرة الفلانية هالملايين واحنا ما يطيح قرضنا اللي ماخذينه علشان اشتري الجنطة الكروكو الهيرميز واروح اصيف في مونترو وافقع مرارة فلانه وعلنتانه.
الصراحة ما ادري انتو من صجكم ولا تتغشمرون، اتقارنون سياسة الدولة الخارجية مع اطاحة قروضكم اللي ماخذينها بكيفكم، والله العظيم ما عندي اي تعليق غير ربي يشافيكم ويعافينا من ما بلاكم فيه.
ندري والله العظيم ندري!
بتقولون حمدي ربج مو علشان ما عندج قرض ولا علشان انج مو محتاجه تقولين هالكلام، اكو ناس ماخذه قروض علشان حالات حرجه وانسانية، ردي راح يكون واحد ادري، ايه نعم ادري ان اكو ناس ربي يفك عوقهم خذوا قروض علشان علاج وعلشان حل مشاكل اسرية وقضايا خاصة، وامور تطلبت منهم انهم ياخذون هالقرض البنكي، بس سؤالي اللي اتمنى اتجاوبوني عليه: جم عدد هالحالات اللي اضطرت انها تاخذ قرض علشان علاج بالخارج ولا علشان مشاكل شخصية وقضايا وامور خاصة؟ وجم نسبتها بالنسبة حق اللي رافعين شعار اسقاط القروض؟
وحتى هذي الحالات الإنسانية الخاصة اللي اضطرت للاقتراض البنكي وتعثرت بالسداد، المفروض بدال لا اتسوون حملة اسقاط القروض، اتسوون حملة الشعب يريد تحريك بعض النواب اللي من عقب ما وكلوكم الشاورما ايام الانتخابات ونجحتوهم وخليتوهم يتسمتون على الكرسي الخضر ما يدرون عن هوى داركم، المفروض كلكم تنتفضون وتسوون حملة اتطالبونهم فيها انهم يفسرون عن ذرعانهم ويبدون انهم يحصرون هالحالات ويتشاورون مع الحكومه علشان يشوفون لهم حل ومخرج يناسب معيشتهم ويفك ضيقتهم، مو ان احنا انداوي المصيبة بمصيبة اكبر.

آخر الكلام:

ان شاء الله هذرتي اوصلت حق اعقولكم قبل اقلوبكم، لأني احبكم وما احب ان الناس تضحك عليكم، ولا احب ان احد يقص عليكم ولا ارضى انكم اتصيرون تابعه قفة، لأن اللي قاعدين يشيشونكم ويقولون لكم كتبوا وقولوا ويخلونكم تشتطون، ترا ما راح تلقونهم يمكم لمن ادارة الجرائم الالكترونية اتناديكم راح اتشوفون اغبرتهم صدقوني، بعدين لا تضيعون وقتكم على الفاضي الحكومه ماراح اتطيح القروض ولا هي صوب اي شي في تطييح فلس حمر من القروض، اتمنى ان الرسالة اوضحت واوصلت.

ihji ,ihj ufhji

عبدالعزيز الفدغوش · 01-01-2020, 12:41 AM

الله يعطيك الصحة والعافية

وبوركت كل الجهود الوافية

للإتصال والإستفسار		أرشفة شبكة الشموخ الأدبية
الكويت	0096599579965	yahoo	RSS	htmlMAP	HTML
فاكس - الكويت	0096524579965	msn	MAP	XML	sitemap.php
البريد الإلكتروني	[email protected]	feeds.xml	sitemap	google	tags
اقسام شبكة الشموخ الادبية
منتدى الإسلام - منتدى العام - منتدى الإعلام والأعلام - منتدى الترحيب والمناسبات - منتدى الشعر الشعبي - منتدى المواهب الواعدة - منتدى المحاورة والألغاز - منتدى التراث والمنقول - منتدى المقالات والنقد - منتدى الشعر الفصيح - منتدى الخواطر والنثر - منتدى القصص والروايات - منتدى الأسرة - منتدى الطب والعلوم - منتدى الفن - منتدى الرياضة - منتدى التسلية والترفية - منتدى البرامج والإتصالات - منتدى التصميم والجرافيكس - منتدى مرايا القضايا - دواوين الشعراء - مدونات الكتّاب - مجلة الشموخ الثقافية - مكتبة الشموخ الإلكترونية
كلمات البحث
الشعر الشعبي الشموخ الثقافة التراث الأدب النقد الشعر الفصيح المحاورة الالغاز قصائد صوتية قصائد كتابية دواوين شعرية اخبار الشعراء قصائد صوتية القصة الرواية الشاعرة قصص البادية مقالات مهرجانات صحافة شعراء الخليج شعر غزل مسجات أبيات شعرية المواقع الادبية لقاء الشاعر الخواطر النثر شاعر المليون القنوات الشعرية المجلات الشعرية مهرجان الجنادرية هلا فبراير youtube الشعر وكالة انباء الشعر أنباء الشعراء شعراء ليبراليين الشعر الجاهلي العباسي المعنى سمان الهرج قصيدة الشاعرة دواوين الشاعرات صور الشعراء البادية التراث القبائل بنات الكويت بنات السعوديه بنات الرياض بنات الخبر بنات جده بنات الامارات بنات قطر بنات البحرين بنات عمان بنات لبنان بنات سوريا بنات العراق بنات تركيا بنات مشرف اكسسوارات ازياء عطورات ملابس نسائية مجوهرات قصات شعر صبغة شعر بنات المغرب بنات كول بنات كيوت بنات حلوات جميلات العرب بنات مصر بنات الاردن موضة بنات الخليج صور بنات خليجيات عربيات ممثلات طموحات هاويات داعيات شاعرات مواقع بنات منتديات بنات مواقع نسائية منتديات نسائية دردشة نسائية دردشة بنات الحب حبي الحبيبة قصائد عشق قصائد غرام حبيبتي معشوقتي المحبة بنات للتعارف بنات للزواج بنات للصداقة كتابات نسائية مقالات نسائية مهم للنساء قصص عاشقات روايات حب فقط للنساء مجلات نسائية تاجرات عالمات بائعات مبدعات مغنيات بنات المدينه بنات الجهراء بنات الخالدية بنات الجامعه بنات الثانويه بنات مدارس مشاغبات مشاكسات بنات المجتمع نساء المجتمع بنات الدوحه بنات المحرق بنات المنامه شيخة البنات مكياج عرائس ليلة الزفاف ليلة الدخله اغاني بنات رقص بنات فيديو بنات مشاعر بنات احاسيس بنات رغبات بالزواج بنات google بنات yahoo بنات msn بنات massenger بنات انمي بنات توبيكات جمعة بنات جلسة بنات قهوة بنات حقيقة البنات دموع النساء جوالات بنات
الوصلات والروابط الخاصة بـ : شبكة الشموخ الأدبية ( www.alshmo5.com - www.alshmo5.net - www.alshmo5.org ) جميع المشاركات تعبّر عن وجهة نظر الكاتب ولا تعبّر بأي شكل من الأشكال عن وجهة نظر الإدارة جميع الحقوق محفوظة لـ : شبكة الشموخ الأدبية

يتصفح الموضوع حالياً : 4 (0 عضو و 4 زائر)

اعلانات المنتدي

الإهداءات

هاته وهات عباته

منتدى الإعلام والأعلام