يالله يالي يطلبك كل سائل ( شقر )
 

بسم الله الرحمن الرحيم
هذي القصيده للشاعر عبدالرحمن بن سعد بن صغير القريني يسندها لابنه نايف وهي مليئة بالنصائح و الحكم وهي من نوع الشقر وقد وضعها على ثلاث مواقف
____________________________

يالله ياللي يطلبك كل سايل
طالبك نو والمطر منه سايل
يعم كل الدار ماعنه سايل
سحابة بالخير تنثر مطرها

يانايف اهديلك من الكيف دله
والقرم مثلك لابغا الدرب دله
ياشوق من يعجبك زينه ودله
أفهم معاني كلمتي واعتبرها

عدو شرع الله والاسلام عادوه
مريض واصحابه بالأمراض عادوه
لو كان يمشي قدم للخلف عادوه
عميا البصيره والعمى في بصرها

خل الردي يا طيب الساس خله
الخاسر اللي يجعل النذل خله
يشوف في نفسه مع الوقت خله
النذل لامن حل الدار دمرها

طرا على بالي من الشعر طاري
والشعر ينفع لا حصل ظرف طاري
والشعر ماهو دق طبل وطاري
حسان ينظم في محمد دررها

هذا الزمن يكثر حلوه ومره
أوقف لشيء وشي اشوفه وأمره
والله كريم وفرصة العمر مره
والله يعلم سرها مع جهرها

واللي يحوش الطيب من فعل كفه
يرجح به الميزان في كل كفه
يالله زده خير وعن الشر كفه
وعسى حياته سالمه من كدرها

مايرتكي لحمولها الا جملها
كتبت من زين القصايد جملها
شعر جزيلات المعاني جملها
واخترت لون الشقر لون لبحرها

العلم نور ويعطي العلم دوره
واتعب على الطيب وادوره دوره
والخايب اللي فيه لفه ودوره
عن شوفته نفسي تزايد حذرها

ترى ثمرة الشعر لاصار حله
ياكم من امر صعب والشعر حله
والشاعر يمثل قبيله وحله
يرسم لجزلات القصايد صورها

الصبر مر وتالي الصبر حالي
والله له التدبير في كل حالي
يالله عليك اتكلت أنا أمري وحالي
ياخالق الدنيا ومحصي قدرها

الناس كل فيه مدحه وسبه
كم جاهل يصير للشر سبه
وكم عاقل من كثرة الهرج سبه
لوكان من قوم ينومس خبرها

اهدي الورود وياسمينه وفله
لك واخبرك بأن الوضع صار فله
عذرا كحيلة عين والشعر فله
خطابها كثرو وزادو مهرها

الصاحب اللي رغبتي في سلامه
يشبه لابو زيد الهلالي سلامه
ياجعل له عن كل شر سلامه
والله يجيره من مشاكل خطرها

كل فرح من بعد صومه بعيده
وجات التهاني منديار بعيده
وأنا سلامي لك كثير وبعيده
عدة حصى نجد وعدة شجرها

الرجل مايبدي على النذل سده
كم جاهل لا من مشى الدرب سده
يعجبني اللي لابدى النوب سده
اهديه باقات الورود وزهرها

لاتبخس المكيال صاعه ومده
وافطن لموج البحر جزره ومده
وحبل التواصل بين الأقراب مده
والله لخلقه بالتواصل ومرها

نرمي الهدف نخطيه والا نصيبه
وكل بها الدنيا يحصل نصيبه
ومن مات حطو فوق قبره نصيبه
والخاسر اللي طاعة الله خسرها

وترى حقوق الجار تلزم على الجار
قال المثل لاتزعل الجار لو جار
ادمح له الزله وبالطيب له جار
علوم الوفا للجار كلن ذكرها

الروح تيار المشاعر شبكها
ونوره مع اسلاك الكهارب شبكها
والحر مثلك ماتصيده بشبكها
فاهم وتعرف برها مع بحرها

واللي لهم في ماضي الوقت شاني
دارت بهم الايام والوقت شاني
ماباقي الا قوم ببسي وشاني
متخالط عمي الحكي مع عورها

دارت سنين العمر والدهر دوار
وكل لكسب العيش والرزق دوار
أحد نجح واحد نشب له بدوار
وأهل المكارم نفتخر من فخرها

وغيب الليالي ماحد عنه داري
اشوم عن بعض الموقف وادراي
الله يعم الخير في كل داري
ويرد كيد المعتدين بنحرها

ولغير رب الكون مارخيت رأسي
والضلع تصفق به الريح راسي
ولي مركب في بحر الإشعار رأسي
وترا النعم تدوم للي شكرها

رد: يالله يالي يطلبك كل سائل ( شقر )