بين الفدغوش وشاعر الجزيره ...!!!

بين القحطاني والفدغوش
هذا النص جادت به قريحة شاعر الجزيرة الشاعر/ علي بن محمد القحطاني
موجهة الى زميله الشاعر الكبير / عبدالعزيز الفدغوش :

صديقي اللي غرنـي بالوعـودي=يوم ابتدينا الجد ضاعت علومـه

امسى يقول اعتز ورقى سنـودي=اسمي يجي في البنك بعد الحكومه

يبي يجرب وين توصل جهـودي=ولا ارتخى المحزم وخارت عزومه

الجود يالفدغوش عند الهنـودي=وانا افتكرت إنّا حماتـه وقومـه

فاصل حدود الاصدقاء عن حدودي=محدٍ شريك الادمي فـي همومـه

وعزّلت عن رفقة عريب الجدودي=وشهرٍ بدال المـدح لله اصومـه

ولولا محمد بن عبـود العمـودي=كاسي عرى اللي ناشزات عضومه

سماه تهمل ماه قبـل الرعـودي=وراتـب وزاره مايكفيـه يومـه

فتـح زنازينـي وكسـر قيـودي=جزاه عند اللـي تسبـح غيومـه

صّحيـت ياعبدالعزيـز الرقـودي=وغنيت يوم الفن ولـت نجومـه

واخذت مسباحي وغلفت عـودي=وماشيت من طّول وقصّر هدومـه

وجاء الصدى من الشاعر الكبير الأديب العلم والناقد الملهم الإعلامي
الأستاذ / عبدالعزيز الفدغوش حفظه الله .

من درّ منظوم المثـل والعقـودي=جتني بيـوت ٍ وافيـة وامحكومـه

نوادر ٍ من فيض فكـر امحمـودي=طرق ٍ لابن قحطان جدد رسومـه

جدد وجّد وجاد رغـم الحسـودي=حتى صنع له نهج كـل ٍ يرومـه

حـرّك بقـوّ المفـردة للركـودي=وعلى نجوم الشعر غطّت انجومـه

نبراس شعر ٍ والتميـز اشهـودي=ومما كتبت باحساس وضّح همومه

غرّه صديق ٍ باللـوازم جحـودي=اللي بوقت الجـدّ ضيّـع يمومـه

مابه على الشدات عزم وصمـودي=لو له رصيد ٍ مـا تعـدد ارقومـه

لو ان ماله عـد ّ رمـل النفـودي=برج المعالي والثنـا مـا يسومـه

صحايف المخلوق بيض ٍ وسـودي=وبين الردا والطيب حرب وخصومه

يفنى التطبـع والطبيعـة تعـودي=وكل ٍ يابو ميسون يتبـع أسلومـه

كـل ٍ علـى ماقيـل وده يـزودي=مير العلا يحتـاج وقفـة وقومـه

بحر الفخر والطيب صعب ٍ يكودي=الا علـى نبـراس عـزّ ٍ يعومـه

مثل العمودي في تواضع يجـودي=اللي بسماء الامجاد بانت وسومـه

على صنيع ايديه ترفـع ابنـودي=شكر ووفا وعرفان حـزة لزومـه

أبديت لك وأهديـك باقـة ورودي=وابيات شعر ٍ بالسـلام امختومـه