أسطورة العصر ؟

يا نادرٍ ترثي بالأمثال نادر=لاهنت يا موفي مضامين الأشعار
صغت الدرر وأحكمت نظم النوادر=يا معلّم الشعّار تجديد الأفكار
لوّ الأدب يا أمير يطلب كوادر=على صدى معناك يحظى بالإقرار
لك بالحدث والطيب سبق وبوادر=وشعرك رسخ في خدمة الدين والدار
بوح الأخوة من سنا الروح صادر=ومجسّدٍ معنى الرثاء رغم الأكدار
إليا رثيت سعود يا أمير قادر=وإلا الشعر بإسطورة العصر يحتار
مرحوم يا اللي يوم الإعصار هادر=له موقفٍ مشهود بالعزم وإصرار
حيدٍ يُصّد عن الوطن كلّ غادر=وبالموزمة له تتجه كلّ الأنظار
يا صار بالأفكار صايب وحادر=ترجع له الأشوار بالموسم الحار
يا بان عيٍّ في سماء الغيّ سادر=زلزل حماه سعود وأسقاه الأمرار
في خدمة الإسلام دايم يبادر=وحبّ الوطن والدين له رمز وشّعار
سيرة سموّه ملهمة للمصادر=وحتى رحيله مشغلٍ كلّ الأقطار
بين القدوم وبين حالة مغادر=وضع الورى في كلّ الأحوال وأدوار
لوّ قلت له يا دايم السيف غادر=حلّ وسكن بقلوبنا صغار وكبار
صوت وصدى حزنٍ على فقد نادر=عسى مقرّه جنةٍ بين الأبرار