الشاعرة فتاة نجد تزيد الشموخ إشراقا

ياعاذلي فكرك عن الواقع بعيد =وأكبر من اللي في خيالك رصدته
تجاوز المألوف من دون تأكيد =ومن غير داع له وأنا ما نشدته
عكس اتجاهات المشاهي مشى السيد =بي والقرار اللي عقدته.. عقدته
ومعالم النسيان سطوة وتنديد =ولو ما تندد باسمها اللي فندته
اكبر دليلي صادقات المواعيد =تغيرت والصدق فيها فقدته
تعبت اهدي ضيقة البال وازيد =جرح مع كل المنافذ وجدته
ولا للجروح ببعض الأحيان تضميد =نزف المشاعر في خفاها شهدته
واللي يزيد بفايت فات ويعيد =عليه مضمون الخبر ما عمدته
عيني على عد الرهى للمواريد =العز في جم القراح ووردته
اقطف زهر ما ناف لي من عناقيد =واخذ براي المنصف اللي عهدته
من عادتي والعدل.. سلم الأجاويد =اوفي.. بميعاد الوفا لا وعدته
مبداي واضح.. والمبادي شواهيد =وزرع الوفا من فضل ربي حصدته
وان ضاقت بعيني وساع الجراهيد =ما غير علام الخفايا قصدته
نجواه مشفاة الجروح الملاهيد =سبحت له في كل حال وحمدته

غلاف الديوان

للخيل مجد بالفخر صيته انذاع =في عالم التاريخ نبراس وشموع
الخيل روح للأصالة والإبداع =إنجازها في قمة العز مطبوع
وأطباعها تفرق على كل الإطباع =وأمجادها وافعالها نادرة نوع
شمس الوفا فيها مع كل مطلاع =علامة للخير في كل موضوع
وميزة عطاها الجزل في شد الأوضاع =أعطت لها حق بالأفعال مشروع
هي مجدنا اللي ما تغير ولا ضاع =عراقة فيها أجود الجود مجموع
من حبها كل المشاعر والأسماع =صارت لها نبض.. وأحاسيس.. وسموع
وفي كل شبر في وطن وافي الباع =أفخر بها واعتز والراس مرفوع