بين العجمي .. و .. الطومي ؟

قصيد أبو برجس وإن سمعه الخفوق ارتاح = وتصغى له الخمس الحواس بجوارحها

مفتاح الحكم عنده إذا ما لها مفتاح = أقوله وأنا لا أديب الأمة ولا أفصحها

لكن أنبسط لا من قريت البيوت اصحاح = بوزن ٍ ومعنى ما تخامل جوانحها

أقول إن مبارك صار دكتورها الجراح = عوج المعاني تنعسف له ويسمحها

على مستوى جيلي وجيله وجيل ٍ راح = أبيوته من أجمل واحة الشعر وأشرحها

أرى الشعر يا مبارك على ضجة ٍ وصياح = سبايب بشر وجعل الولي ما يسامحها

كل ٍ دخل في الشعر من فارس وفلاح = ودخل به مهابيل ٍ تفرّك مسابحها

عثوبة وكل ٍ قال أنا الماهر السبّاح = هذا جابها عوجا وهذا مشلّحها

ما عاد البلالي وابن هذال والقرقاح = وكثير من الشعّار تعرف مرابحها

وسلام وتحية عد ّ برّاق ليل ٍ لاح = خياله على الديرة وسيله مسنحها

بيوتك يا أبو راكان مثل الذهب واصحاح = عن النقص ذربات المعاني منقحها

أنا أحس في معنى مثايلك عطر ٍ فاح = مثل فوح بكر ٍ صاحب الصنف فايحها

شذى عطرها يقعد خواء الرأس بالمرواح = تزيل التعب والروح تنعش جوارحها

تعيش وسلمت ودمت بالعز ّ والأفراح = أديب ٍ معانيك الجزيلة تملحها

تصيب الهدف لا صار لك بالهدف ميلاح = توضح مواضيعك وتشرح ملامحها

أثنيت ومدحت وزدت في حقي الأمداح = وحنّا مثل شرواك نقبل مدايحها

وحكمت الكلام المعتبر ما طلبت أرباح = وأنا أثني عليك بسبكها يا موضحها

تبي من بعض شعارنا الجد ّ والإصلاح = لعل وعسى جملة معانيه يصلحها

وأنا أشوف بعض أربوعنا ناتجه ضحضاح = ولو تنصحه ما يطيع توجيه ناصحها

عنيد ٍ على رأيه ولا يقبل النصّاح = ومعه شلة ٍ مثله بيوته إترشحها

ترى بعضهم لو ترفعه للثريا طاح = ما ينفع كلام النصح في قلب طايحها

وأنا شايف ٍ ما شفت واضح بدون إيضاح = وأغض النظر بأسلوب وأضحك وأصافحها