مصافحة أولى - الصداقة

الله يرحم ما مضى من صداقه =مع السلامه جعلها لك تساهيل
روّح فمان الله وانسى العلاقه =درسك عرفنا منه كل التفاصيل
انا عطيتك من وفاء القلب باقه =يفوح منها ريح صدق التعاليل
انا احترق قلبي وزاد احتراقه =من شان ينور لك دروب المقابيل
مثل الأخو.. لو ما إجمعتنا البطاقه =ولو ما اجتمعنا بالجدود الحلاحيل
أبيك لا شان الدهر في مذاقه =ألقاك عن دربي تزيل الغرابيل
أغنم صديق الضيق وقت المضاقه =أزبن عليه ان ضقت بين الرجاجيل
لا واخسارة كيف ما بك شفاقه =يا (لعنبوا) حيّك تخاسر بي الكيل
اثر الصداقه بس وقت الرواقه =ياعونة الله كان هذي المحاصيل
ماعاد لك قلبي يزيد اشتياقه =وفّر على نفسك كثير المراسيل
ماعقب طعن الغدر باقي صداقه =إلا لمن يرضى على نفسه الميل
من لا يبيني فرحتي في افراقه =ما تشبه الا فرحة البدو بالسيل