...جاني مرض صعيـــب و طحت في الفراش ايّامـات

ما نفعني قول الطبيـب و لا نوّضوني ذوك الـدّواوا ت

اللّي يحوّس يفهم يخيــب و مـا فهموا فيّــا العلامـات

الوجه مصفار و شحيــب و لا تونسـيون سيس سات(7.6)


جا بابا وثرن مجـــرّب وقاللّي يا وليدي عندي إحسـاس

هذي حاجة ضربت في القلب و عندك رسمـي الستــراس(stress)

قل لي شكون اللّي راك تحب و اعطيني إكزاكــت لا دراس(adresse)

نروحوا انشاللّه تخطـــب و تولّي كـي بكري لا بــاس

قتلو يا الشيخ والله غير هي و هـاذ الشّـي اللّي متعبنـي

شفت نهـار واحــد البنيّة حبّها طغــى عليّا و غلبنــي

مـا علاباليش واش بيّــا خيــالها ديمــا متبّعـــني

واقيـــلا يلزمني رقيـة الشيخ البشـــير يرقيـــني

مـرّات نقـول نخطــبها و خطــرات نقــول خلّيـني

و الشي الأساسي في القضية ما نعرف إذا الشعـور تبـادلني

هـذي هــي الوضعـية و هذا هو التّخمــام اللّي مرّضني

قالّو يـا وليدي شوفــها مليح و شوف انت قبل روحــك

إذا عزمــت روح اسألها قول لها هل نقـدر نجي لأهـلك

الفــاميليا (famille)نتاعي نجيـبها باش انشــالله نخطــــبك

والحاجة غير ربّي يكتبـها و كي تستخير ربّي شي ما يضرّك

لسّيــد تم تم صحا تقــول مــا كان عيّـان

وجهـو نوّر مالفرحــة بعد الكــدرة ولّى زهــوان

و كأنو ما ادّى ذيك الطّيحة و ما كان مهمـوم و ديخان

قاللّو يا بابا يعطيك الصحّة و كيفك ما يوجد في هذا الزّمان

من اشعارنا الشعبية