الــمــعــانــــاه

أعاني معاناةٍ عجز عنّهـا الشعـر =يكم نهتةٍ بالصدر ماهيـب منهوتـه
تلهّب بصدري لين تجمر على جمر =ولاهيب تسمد جمرة الصدر مكبوته
تحوّل بعد فتره بصدري كما الحجـر =والى حجّرت طلعتها تقـل ياقوتـه
أجيب المعاني عاطفيه كمـا الـدرر =انا اعرف حلاة الدر لافارق بيوتـه
أجيب المعاني عذبةٍ كنهـا الزهـر =بروضٍ ربيعي مامشابه سوى نبوته
أجيب المعاني قبلها يفلق الصخـر =يحسبونها من داخل الصخر منحوته
بعضهن هلالي لاربطته طلـع بـدر =يشع بمداره منه الافكـار مبهوتـه
أجيب القصيده وسطها النجم والقمر =واعوّد بها ليننها تصيـر منعوتـه
ولكن شلل نفسي تطوّر شلـل فكـر =قتلت القصايد والعلاقـات مبتوتـه
دخلت بقبر دخل قبـر داخـلٍ قبـر =كما درةٍ في قوقعه في بطن حوتـه
اذاً الأمل متى ؟ متى ينشف البحـر =على شان كلٍ يستقر ابـه تابوتـه
انا والله اني عايشٍ عيشـة القهـر =فلاني بحيٍ حر ولا موتتـي موتـه
انا كل يوم أتوقـع بلحظـه أنفجـر =غدا الضغط عندي قنبله غير موقوته
أليمه أليمه لنهـدم راعـي الصبـر =تخيّل جبل لندك طولـه وجبروتـه
إلهي طلبتك عونةٍ تشـرح الصـدر =بفضلك نزل للعسر يسرين مثبوتـه
عليم وقدير وقـادر ومالـك القـدر =جميع الملوك وملكهم فـي ملَكوتـه