مجنون الهوى

قالها اللي ضاق به صدره وجافاه المنام=يا عسى ربي يكون بعون مجنون الهوى
لي طرت له ليلةٍ عدت بها لقيا غــــــرام=انقضى ليله وهو ما بين آهات ونــــــوى
ساهرٍ والنوم كنه صار لعيونه حــــــرام=والفرح والحزن صاروا كلهم عنده ســوى
ما يهمه ينتهي لجل المحبة والهيــــــام=أو عن دروب السعادة للأبد حظه غــــوى
لجل من هو صار عنده غالي وعالي مقام=ما يهمه لو شرب من لوعته لين ارتـوى
لو يعرف إن الأجل موجود بكفوف المرام=ضل يسعى للطموح اللي بتحقيقه نـوى
للورى ما يلتفت لو ساق خطواته أمــــام=بالوفا ما ظن بالدنيا معه شخص استـوى
كيف يستغني عن عيونه ويرضى بالظلام=كيف يرضى عيشةٍ فيها سروره ما ضوى
قال يقتله العطش لو فارقه وجه الغمـــام=والمطـــــر ما لاح له برقٍ ولا رعــده دوى
صادقٍ ما يخلفه عن نيته كثر المــــــــلام=عاشقٍ للصبر عن شوفت حبـيبه ما قوى
ما بقى منه سوى حالٍ يطيح ليا استقام=بالمسير بخلف حلمه صار مهدود القـــوى
قلتها وأنا الذي ضايق وعيني ما تنام=يا عسى ربي يكون بعون مجنون الهـــوى