وش لي بحبك

لا تبتكر لي يـا حبيبـي تعابيـر=ما عاد قلبي والهـوى يفهمونـك
قلبي تعذب في هـواك ومقاديـر=لا شفتني غرّقت دمعـه عيونـك
كتبت رفيع الشّان مالـي تدابيـر=كنت أنتظر تمطر سحابة شجونك
كنت أنتظر والشوق بأقصى معايير=وخيبت ظني يوم بانـت مزونـك
يا كبر حظك لك بقلبي غلا غيـر=والناس من كثر الغلا يحسدونـك
مقدر على دمعك وكثـر التفاكيـر=ياخذني الهاجوس داخل سجونـك
أهديت لك قلبي ولك كـل تقديـر=وأسقيتني من كاس صافي مهونك
مع الأسف لجـاك منـي معاذيـر=وش لي بحبك دام الأحزان كونـك
ما جاك مني يا غـلا أي تقصيـر=يومك بكيت العين والحزن لونـك
صدي وبعدي مالهن غير تفسيـر=ملّيت أكذّب كل مـا فـي ظنونـك
أنت الذي حبـك دواي وتصابيـر=قلبي على فرقـاك ملتـاع هونـك
ودي على محيّاك بسمة تباشيـر=مهما يطول البعد قلبـي يصونـك
يا قلب كانك ما هنيـت القواريـر=والله عذاب لصار بس يشغلونـك
تجري وراهم ما ينوبك رجا ميـر=غير الشقا في عشقهم ما يبونـك
ما همّهم ليلك وتصبح على خيـر=ما ودهم ترتاح لو فـي سكونـك
تصبر وكم في الحب ناسٍ مكاسير=والله يكون بعوننـا ثـم عونـك