عرش المحبه ...!!!

حبيبتي انتي على عرش المحبه والفخار=لك المكانه عاليه سوا سمحت أو ما سمحت
انتي الوحيده غايتي من بين بيض ٍ أو سمار=انتي المنى كل المنى هذي مناتي وما برحت
ياما زرعتي بسمتي أقولها بالإختصار=ياما سقيتي مهجتي من مهجتك لين استرحت
ياما نثرتي طيبتك على دروب الإنتظار=ياما فرَجتي ضيقتي بهمسة ٍ لها انشرحت
صوتك يهدّي ثورتي بكل جداره واقتدار=والنسبه دايم عاليه بالقسمه لو لها طرحت
البعد والله مهلكه يكوي خفوقي مثل نار=والقرب والله مملكه تروي عروقي لين سحت
حياتي يا نهر الغلا يا أغلى من نور النهار=انتي وربي مكسبي وآنا بدونك ما ربحت
حقيقه ماهي زائفه يا مزنة ٍ تهمي حدار=ديمك يرطّب خاطري يوم شافني بواديه طحت
والمسأله مع إنها لها وضوح بلا غبار=بدت للبعض غامضه رغم اني للغامض شرحت
رسمت لك صوره بخيالي من ضمير ٍ بآستتار=موسومه بوسم الهيام منحوتة ٍ بالقلب نحت
كأنها فوق الخيال والوصف عالي كالمنار=مرسومه بطرس الغرام وبشكلها لا ما لمحت
فيك الصفات النادره يا زهرة ً مع ازدهار=من أجلها هاضت لها قريحتي وللحرف بحت
خمسه وخمسه مع عشر مدبولة ٍ بالإعتبار=طول العمر كل العمر في بحر حبك قد سبحت
أخذت من نهجك دروس معنى الوفآ لين استدار=ولما انتهى شرح الدروس فهمت درسي ثم نجحت
جربت كل الأمنيات ما غير زولك له مزار=انتي السعاده الكامله وانتي اللي من وصلك مرحت
سبحان من زادك حلا وعلى الحلا عز النمار =يكفيني إنك ملهمه واني من احساسك نضحت
وآنا دعيت ربنا رب السمآ رب الديار=إنه يسدد خطوتك يحفظك من فوقك وتحت
ياليت الجيّه تعتمد يوم السعاده والعمار=لآجل إني أعلن فرحتي تراني مبطي ما فرحت
وآغوص في بحر الحروف اللي على الرغبه يغار=ومن بعدها قولي كما تمنينا هلاّ نفحت

’،
جوهر الراوي