الغــرام الراقــي

ياحبيبي لهفة الخافق طغت باشواقي=والغلا والشوق لك ياساكن الشرقيّه
كل ماهب الهوا مع طلعة الاشراقي=قامت الذكرى تقلب صفحتي المطويه
وكل عرق وكل نبض ينبضه خفاقي=ايتوقف لا قريت اسمك او اسمٍ زيّه
الصبر عيا يعزز خزنة المشتاقي=حافظ(ن) ماضي العهود وصادق النيه
واتحمل من غرامك حمل ماينطاقي=مايشيله كتف كيف تشيله الألفيّه
كيف اعبرها حروف ونزفها دفاقي=والحروف الابجديه عاجزه موليّه
انت ياللي تلتوي من حسنك الاعناقي=من يلومك لا سكنت ابراجك العاجيّه
خذت خفاقي وعقلي بعدها وش باقي؟=مابقى الا روحي اللي لاجل حبك حيّه
اخذها فدوه لعينك يالغرام الراقي=بس تكفى لاتجازي حسنتي بالسيّه
الله انه لايعود حزة الفراقي=حزة حطت وسط حدب المحاني كيه
حطني في وسط عينك واغلق الاحداقي=وضمني بين الضلوع بلهفه وحنيّه
واذكر انك منتهى الامال والاشواقي=والغلا والشوق لك ياساكن الشرقيّه