شيخة القصيد للفارس مشعان الهذال ؟

يا الله يـا مديـر الهبايـب والأدوار= شانك عسى تصريف شانك لنا خيـر
يـا الله ياعالـم خفيـات الأسـرار= يا معتني بالخلـق والـي المقاديـر
قلته ونوم العين عـن جفنهـا طـار= والقلب كنه فوق حامـي المجاميـر
من هاجس ٍ بالقلب مانمت سهّار = ( أنده) نذيرات الهواجيس وأدير
أدير حيلات ٍ بالأريا وتبصار = وأرجي من الباري عساها مسافير
لولا شفاتي فيك يا نجد ما أحتار = فكري ولا كثرت علي التفاكير
نجد العذية دارنا ما بها أنكار = لو حدنا عنها المحل والمداهير
جانا الخبر يا لابتـي وليـت الـدار= حلّوا بها الأجنـاب هـم والبقاقيـر
كنّا بنجد ديارنا مثـل الأسـوار= نأمر وننهي نحمـي الجـار ونجيـر
نأمـر وننهـى مانـداري بهـا أدوار= ونهدي العاصـي بقو ّ الطوابيـر
حامينها في لابـةٍ تسقـي الأمـرار= عدوهم شـاف النكـد والمخاسيـر
حنّا بنجد المجد كنّا كمـا النـار= نقطع بها شـرٍ وناصـل بهـا خيـر
حنّا الذي ترجع لنـا كـل الأشـوار=لاصـار بالقـالات شـوار وامشيـر
حنّا شبات الحرب وان شبـت النـار=وتوايقـن بيـن الحنايـا الغنـاديـر
حنّـا بنـي وايـل بعيديـن الأذكـار= إليـا تناخـوا بالجمـوع المشاهيـر
حنّا هل الجمع المسمى اليـا سـار= مركاضنا يشبع بـه الذيـب والطيـر
سارن بنا الزرفـات باقبـال وادبـار= من غوطة الفيحا إلى غشلـة الديـر
مابيـن مسنـاد ومابيـن مـحـدار= ياما قطعنـا بدربنـا مـن مشاويـر
وياما تعلينا على قـب الأمهـار = وعيرات الأنضـا كنهـن السنانيـر
يهومنّ هومات ٍ بعيـدات واعسـار= وكم ذيرن من غافـل مابعـد ذيـر
وكم فاجن العدوان غـرات واجهـار= يا ما تنحّوا عـن نحاهـن مدابيـر
ظعايـنٍ حطـنّ مـلـك ٍ بسنـجار= وبنّن على الخابور زيـن الدواويـر
وتواهلن الزور حصن ٍ لهـن كـار= ومن البطين إليا الرهـا و المعاميـر
وكتن مع الحاوي وداجن بالأمصـار= وجابـن خفارتهـن بفكر وتدابير
حطن على السلمان طيحات الأمطار= وصارت لهن لينة وخضرا مصاديـر
ومالن على رجم الهيـازع وسنّـار= ساجن ولاجن ثم داجن على ضميـر
وراجن على الشنبل وداسن الأخطـار= وهدنّ به العاصي بعسـر ومخاسير
ثم انتحن مـع كفـة الشـط عبّـار= وهاجن وماجن فوق رووس العناقير
وأقفن وكالن من شثاثـا بالأسعـار= وحطن لملـوم المسمـى مسابيـر
بقطعان ينّـون الخطايـط والأقفـار= وأيطيّرن جول الحبـارى المخاميـر
نروم مـن زيـن المنـازل ونختـار= ونستـارد الخـوة بحـدب البواتيـر
نلقى بدال الدار كان الزمن جـار= دويد العسل فيهـا تعيـش المفاقيـر
دارٍ بهـا بالقيـظ غـدران وأنهـار= والتمن المجروش ملـي الجواخيـر
مثل المسوح اللي ترزم على حـوار= دارٍ مريـة بالشتـا تسمـن الضيـر
قطعاننـا ترعـا زماليـق نــوّار= الياما غدا فـوق الأباهـر قناطيـر
حتى نخونا اللي على نجـد حضّـار= وجانا كتاب ٍ مـن زبـون المقاصيـر
من ماجد بن عريعر حـرّ الأوكـار= يقول وليـت داركـم يـا المناعيـر
الشيخ اللي حيف على البيض بالغار= يقول حل بداركم (حرب) و (مطيـر)
وجيناه مثل السيل طمـام الأوعـار= الياما غدت عنه البـوادي شعاثيـر
أولاد عـم ولابنـا قـول شبـشـار= شيخ ٍ لنـا عنـده معزّة وتقديـر
قرايب ٍ واللـي إحذاهـم لنـا جـار= وحنا عليهم نحمـي الجـار وانجيـر
لابــد مانـأتـي لابـانـات زوار= حولة وصولة من شثاثا وأبا القيـر
والعايل اللي ضاع فكره و الأبصـار= جيناه بأسلاف الجهام و مظاهيـر
قامن ّ على الحيرا وداسن ّ بالأشوار= وحلّ القضاء في موسم الشر والخير
خلنّ فوق الشبك عج الرمـك ثـار= وأحلو هاك اليـوم خـز المعاشيـر
أركن على ورد الدجاني لهب نـار=وغدويها الويـلان مثـل المداويـر
و( أبا ذراع ) أصبح مقيم ٍ ولا ثار = وجابن حلال المحمرة و( المسامير )
وشدن وحطـنّ الثمامـي بالأيسـار= وصبن على( المطران) مثل المعاصير
نبغى يصير بنزلهمٍ مثـل مـا صـار= ذبـح الشفايـا واغتنـام الخواويـر
كسيرة ما قط ذكرت بالأذكار = فيها القلايع مثل رؤوس الخنازير
صحنا عليهم صيحة ٍ باللقاء الحار = حتى جبرناهم عن الدار تجبير
صيحة غضب تجلي عن الدار الأمرار = من أبواب للحيرا السبايا مغاوير
وهج ( الحريبـي ) مالقينـاه بالـدار= زبن على الحـرة وذيـك الشناخيـر
وصلاة ربي عد ما بالسمـاء طـار= واعداد ما وردت ظوامي على البيـر
على الرسول المصطفى سيد الأبـرار= نور العبـاد اللـي يشيـع التباشيـر