ليلك غرام لـ جوهر الحربي ...!!!

ليلك غـرام الله يمسيـك بالخيـر=الله من اسرار(ن) دهتنـي بليلـك
ليلك نسيمه عطًر البيـت تعطيـر=وهبت ذعاذيع الشذى من جديلـك
وقفت لك رهبه ورغبـه وتقديـر=عزيز اكـرم مـن تعـز وذليلـك
وش هالجمال اللي تحدى الاساطير=وميزك بين الناس عن كل جيلـك
ساعة وجودك من عذاب الغناديـر=كل العيون تصد عنـك وتخيلـك
خلك لحالك لا تجـي للجماهيـر=دخيلك ابعـد لا تقـرب دخيلـك
ترى صدودك وابتعادك عن الغير=هو منتهى غاية رجـاي وجميلـك
لو انت ما تحتاج نظـره وتحذيـر=في كل ما يعنيـك عقلـك دليلـك
لكن بصبري لا تطول المشاويـر=بـرد غليلـي بـرد الله غليـلـك
في حضرتك ماقدر على كل تعبير=كلمة هـلا مـا كنهـا تستويلـك
خدرتني في نظرة العيـن تخديـر=هذا وانا ما ذقت مـن سلسبيلـك
لو شفتني قدم العرب سالم الزيـر=ياضعف والله موقفي يوم اجيلـك
كان الغلا يخلف اعقول المناعيـر=انا هبيلك واعـرف انـي هبيلـك
لكن تعال وخـل عنـك المعاذيـر=تشيلنـي وإلا احتفيبـك واشيلـك

الشاعر / جوهر العلوي الحربي