--*¨¨*-- ( مــوت أمـنـيــاتـــي ) --*¨¨*-- ‏

قالو سعيد .. وقلت ما من سعاده =وين السعاده وينها من حياتي
لا والله الا كل كلي نكاده = ومن وين ما وجهت " موت امنياتي "
فيني هموم ما تعرف الركاده= ووشلون تركد والرهق ذكرياتي
وفيني طعونن كل يوم بزياده = تحاضبن خفاقي الموجعاتي
بي علتن ماله طبيب وعياده = عله بباطنه العلل كاثراتي
طيبي وانا اللي منكوي من حصاده = وجرحي وأعرفه وابخص الخافياتي
يالله يا رب البشر يا أعتماده = يا جايب أمطاره .. ووقابل صلاتي
الطف بحال اللي رجاك بهواده = يرجيك يا سامع دُعاء الداعياتي
من غير جودك ما يقدي جواده = واللي رجاء جودك له الجود ياتي
يلوح لي منهو خبيثن مراده = وانا لها بالعز كلي ثباتي
ذيباً وأميز حيها من جماده =ولا التفت للخلف للمهملاتي
والله مابالذل "عز ورياده" = ولا يكسب الطامن سواء الطامناتي
والا الفعايل له "رجال وسياده" = صوارماً وأفعالهم عالياتي
والنادر النادر .. بعيداً هداده= والا الدويني دون .. للدانياتي
ولو كل رجالن تحقق مراده = كلن صعد لنجومه الموضياتي
والشاعر اللي من بحوراً مداده = عكس الذي دايم بيوته هتاتي
وكلن على ما قيل حسب أجتهاده = يا فاهمين رموزه المبهماتي
ومن يفعل السوداء " لبس له قلاده " = وانا البياض بكل دربي وذاتي
والمسلم اللي كل وقته عباده = يلقاه عند الله "عقب المماتي
ياهل القلوب اللي كساها سواده= العلم جاكم .. والخبر للرواتي
تمت وانا اخفي ما خفى .. والسعاده =هي وينها ... يا عارفين أمنياتي

رغم القساوه يصلنه حبالي = وعمر الغلا ما صار عقبه عداوه
الطيب يبقى والرداء للزوالي= هذا الأكيد وله بقلبي حفاوه
يا رسل رح يمه وشد الرحالي= وأهده وروداً مابه الا الصفاوه
القلب صافي والنوايا زلالي = وبنت النقاوه باقيه بالنقاوه
له قدر في قلبي يهز الجبالي= الشاهد الله ما كتبته شقاوه
مجلاسها فوق النجوم العوالي = والمدح به والله يجي له طراوه