آآآه ياقلب العنا

آه يا قلب العنا ويني ووين الراحه= ضعت ما بين الدموع وروحي المجروحه
مات قلبي من شقاه وما عرف ذباحه= في وسط بركة دماء وجثته مطروحه
جاه مع هم السنين السود شي اجتاحه= قدّم عيني وانتحر صبري وهد صروحه
ما قدر يصمد على وقتٍ عصف برياحه= قال أو ما قال والله ما يفيده بوحه
آه وهمومي سكاكين وأنا التفاحه= وآه من هم عذابي غايته وطموحه
شيب عيني من زمانٍ جاب كل رماحه= وقام يتفنن بطعني ثم يعد جروحه
الفرح ودع وورثني العنا وأشباحه= والخطاوي ضيّعت درب المجي والروحه
كنت أحسب اني أبا أقطع هالمحيط سباحه= قلت يا بحر الظلايم جاك صوتي أوحه
ما دريت أنه يبي يشهر عليّ سلاحه= ويلعب بحسبات هقواتي كما الارجوحه
دنيتي لوحة عذاب معلقه في ساحه= والحزن ثبّت مسامير الألم باللوحه
النهار بنون عيني منطقي مصباحه= والليال دموع تبكي هالعمر وتنوحه
ول ياعمرٍ توارى ما جنيت ارباحه= راح من قبل اتبين عتمته ووضوحه
وآه يا قلب العنا وينك ووين الراحه= والسعاده شوف عينك تنتفض مذبوحه

الغريبه شوق