Hapy-Birthdy

يا زين ياللي وسط قلبي تربيت=في عيد ميلادك كتبت القصيده
ميـّـزتها وأفرزتها بيت عن بيت=حتى تـنـقـيت العـقــود الفريده
لو كان تنسى يالغضي ما تناسيت=العيد عــيدك جعل ربي يعيده
وجيتك على ميعاد حسب التواقيت=والله يـبارك في خطاي السديده
أنا أدري إن مالي تجاره ولا صيت=وما عندي من الجاه ما تستـفيده
لكن في حبك سميت و تعـلّـيت=حتى تطاولت النجــوم البعيده
أستشعر حروفك ليا جيت وأقـفيت=غصب ٍ على بعض الظروف العنيده
شرحت حبي للبشر والعفاريت=إلين فهّـمـت العـقـول البليده
في هرجة العذال ما اسمع ولا أوحيت=خــلّ الحديد يفــل ّ باقي حــديده
وأشكي لك الاحوال لو ما تشكّيت=يوم انت وضّاح الليال الزهيده
ومن غصنك الزيتون أوقدت لي زيت=يدفي الضلوع من الغرام و جليده
شعلة غلا ما ولّـعت بالكباريت=من جذوة العشاق تبقى وقيده
ياليت بيدي الأمر يا قلب يا ليت=لا أرجّـع سنيني القديمه جديده
و أغيب بك لا نيب حي ٍ ولا ميت=ونحقـق من الملتـقى ما نريده
وإن طابت الايام طبت وتعافيت=وغنيت لك كل اللحون السعيده