اتصلت بست الحبايب نورة بنت راشد ودردشنا
وبعدها قالت وش عندك؟
قلت ابي استزيد منك يا امي
قالت بس هذا انت وماعندك الا زيديني يا امي عشقا زيديني
شفيك هون على قلبك.....قلت يمه احب.....قالت خلك بس من هالسوالف
والله ماتدري عنك هاللي تحوم في ذكراها
لكن اسمع هالبيتين وروح دور على السالفة
قلت يالله قولي يايمه العوض ولا الحريمة
قالت
والولد لاطاب طيبه من خواله
وان تردى فعرف انهم خايبيني
قلت وش هالبيت يايمه
قالت والثاني يقول:
قولوا لابن الذيب عندي له رساله
عندنا مثـلك ربــــــوع(ن) طـيــبـيـني
روح يابوك دور اصل وقصة هالبيتين بدل ماتحوم حول امثلة العشق والغزل
رحت ودورت ولقيت هالقصة
هذه قصة رجل اسمه عبد الله بن حسين رجل يسكن الرياض
وعنده نقليات ( سيارات لواري ) تنقل بضائع خاصة لنجران واليمن ،
وكانوا الناس ذلك الوقت في حالة والحمد لله والمنة ماعندهم شي ،
فالذين على طريق الجنوب مثل نجران ووادي الدواسر والأفلاج والخرج ،
يقفون على الطريق ويؤشرون للسيارات المارة ليركبوا معها لوجهتهم ،
سواء سيارات عبدالله بن حسين أوغيره ،
وكان عبد الله بن حسين يركب الناس في سياراته بدون مقابل ،
بل أن المسافرين معه يتقهوون معه من قهوته
ويتزودون من زاده حتى يصلون وجهتهم ،
وفي الرياض كان المسافرون للجنوب ينتظرون سيارات النقليات
لتحمل بضائعها ويركبون معهم في الصندوق حتى يصلون .
وبالنسبة لعبد الله ابن حسين كان يرافق نقلياته
إما يركب إحدى اللواري أو يرافق الحمله على ونيت له مع سواقه .
وفي إحدى المرات كان يركب في إحدى لواري ابن حسين
مران بن قويد المساعره الدوسري، ومسعود بن عنبر المقابله الدوسري ،
متجهين من الرياض لوادي الدواسر ، وكان المسافرون يغنون قصيدة
ابن الذيب العجمي التي يقول فيها :
لا لقيت اللي على السكه لحاله
يلتفت ويقول وين الطيبيني
اوقف الموتر حيا وابغي الجماله
يوم ولد اللاش وجهه مايليني
حالف(ن) ماخذ على الرجلي رياله
بالثلاث محرم انها ماتجيني
والولد لاطاب طيبه من خواله
وان تردى فعرف انهم خايبيني
,,,وهي طويله :..:
فتحادث مران ابن قويد مع مسعود بن عنبر
في أن الذي يستاهل المدح ايضا هو ابن حسين ،
لان من وجهة نظرهم ابن الذيب ينقل الناس على سيارة شركة أرامكو
حيث كان يعمل فيها بينما ابن حسين ينقل الناس على سياراته الخاصة
وهذه وجهة نظرهما الخاصة
وزيادة على ذلك ياكلون ويشربون من زاده طيلة الطريق .
فقالا القصيدة المشهورة على وزن قصيدة ابن الذيب ، ومنها :
قولوا لابن الذيب عندي له رساله
عندنا مثـلك ربــــــوع(ن) طـيــبـيـني
عندنا ابن حسين يفعل ماطراله
يكعم العايل وهيف(ن) للسميني
كم جماعه شلهم من حر ماله
لا لقــاهم بالـبلد متعـطــليـني
ضوهم ضوه ودلـــتهم دلالــــه
شوف عيني واشهدوا يالحاضريني
وانا والله بعد كلام الوالدة نقلتها كما قرأتها من دون تمحيص ولا تدقيق
وربما لقصور مني
_____________________________
ومن وجهة نظري المتواضعة
ان الاثنين ابن الذيب وبن حسين رجال طيبين وخييرين وجزاهما الله خير على ماقاما به
وانا ناوي يا جماعة ان اقرأ هالقصة على نورة بنت راشد واشوف هل هذا ماكانت تقصده وترمي اليه
ام ان هدفها ان تشغلني بأمر يبعدني عن هوى القلب
وانتم بارك الله فيكم وش تقولون؟
وش كان مقصدها امي في ظنكم؟
الإهداءات
رد: طرح فوضوي
العرض العادي
