لا جيت أفكر بالوجيه المفاليح ؟

لاجيت أفكر بالوجيه المفاليح=وفرقت بين الناس عالي وواطي
فكرّت بك ضمن الوجيه المشافيح=متقلطن ببساط ماهو بساطي
علاقتي وياك تحتاج توضيح=من شفت في بعض الاموراختلاطي
مثلك خطا يحتاج وقفه وتصحيح=بيّن مثل تفريق ماخذوعاطي
ربيت من صغري على هبة الريح=ولبست لي ثوب ٍكمومه اخياطي
يوم أنت تلعب في يدين المراجيح=أنا أنطح الضيفان وأفرش سماطي
ماعابني لاصرت ضمن المجاريح=أغلا جروحي بين الأضلاع ساطي
العيب لاسقت القدم دون تصريح=وخليتها بدرب الرديين تاطي
والمشكلة انك تحرث الناروتصيح=اركد قبل لافك عنك رباطي
خابرك ماتبعد قريب المراويح=زايد عن العالم بكثرالهياطي
أكبر طموحك لاتعطرت بالريـح=تطلع تمشى بين شاطي وشاطي
عندي سؤال وخابرن فيه تجريح=لكن ضروري تسمعه بأنبساطي
أرفعك بيدي للسما ترجع تطيح=قلي شسوي فيك لاصرت واطي.؟