ديوان الشاعر بندر بن سرور العتيبي

الا يا نديبي _ بندر بن سرور



الا يا نديبي فوق دوج عليه شراع
ما قال انفخ التشريق جا في مواصيره

ليا هبّت العليا و قام العجاج و راع
يهيضك مع السكة تثاوع معاصيره

صنايع يهودٍ لا يبدّل ولا ينباع
يقربك من دار و يقلعك عن ديرة

بعد طلّعوه مجَيّكٍ ما يبى المرجاع
سمع من وراه الفوج غنّت مواطيره

ليا دق سلفه قام حسّه يرجّ القاع
ما جاه المعاون يشتغل في مساميره

عطاه الثنين و زاد له بالأبنص و فاع
رزيمه رعد مزنٍ تهلّع دناقيره

خرط له بثالث عقب نشّه بعزم و زاع
و شتل له برابع ما يضيّع تغاييره

ليا شال عزمه ريّحه وامنٍ مارتاع
مسك مع يمين الخط و يلدّ لانبيره

يا أهل الونيت - بندر بن سرور



يا أهل الونيت اللي على دنقله ميم
نقل الرياض الخط ما توصلونه

ما رهمو له في الكراجات ترهيم
ولا قط فك أديتره ينفخونه

والله لو أمسك طارته يالمغانيم
ما عاد أقلد دولة يصنعونه

صناعته مخطين ملة أبراهيم
حمران روم لونهم مثل لونه

يفتل عموده - بندر بن سرور



الله على اللي يوم يفتل عموده
يطلع ثرى ارضٍ بعَد القيض ماها

ليونس ثقيل الترس يرخي عضوده
شيهانةٍ ترخ المتون العشاها

عَده على اللي ما يدرهم قعوده
من صار زيزوم المشاكل حماها

ثم قل لابن دهره يحضر شهوده
للرفقه اللي باعها ما شراها

وقتٍ ركض كلبه ونامت فهوده
مما تشوف العين طوَل عماها

المال سالم والوجيه أمعبوده
برق التيوس اللي تواما لحاها

راعي صلاة الفرض بيَن سجوده
وراعي غرابيل النمايم لقاها

يا منير _ بندر بن سرور



يا منير عمر لي من التتن معمار
يبر الغليل اللي على القلب سالي


ولا رفعت الصوت وأبديت ما صار
من شان تدري ويش ولا بحالي


ما كفاك مني سجتي بعض الأمرار
أنهج جنوب وحاجتي بالشمالي


أركض مع الدنيا كما ركض دورا
يا ما كسب زندي ويا ما غدا لي


الله على اللي عايروها بالأمتار
أطراز بنجٍ شغلت بالعدالي


زادوا هواها وأطعموها من النار
حتى النبير المنجضع صك عالي


نشت سماء ما جربوها مع القار
طارت مطير الطير ضبع الكحالي


تلفي على اللي في طرف نجد سنجار
يشدي جبل سنجار بين ألجبالي


بأطراف بيته للمواجيب شنكار
معلاف كبشٍ عند راعيه غالي


ثم قل أبو بندر ترى الوقت دوار
يفطن تراني منفعة لو شكا لي


إن زان وقته صار بالسلك يندار
وإن شان قص مروبعات ألحبالي


قومه عتيبة شيوخهم مالها أمرار
أنسور حومٍ يتبعن التوالي


والله يا لولا الخوف من بعض الأشرار
لا عد شيٍ شفته أول وتالي


كم واحدٍ بين العماهيج هذار
مغترته نفسه بكبر الضلالي


يبلس على ربعه ويدنس بالأسوار
ويعد نفسه من حساب الرجالي


كفه بخيل وقلبه أنجس من الفار
أسود طرف وأدغم من السرمدالي


هذاك بعده خير ما كنت أبختار
أجزاه بالصدات وأبعد مجالي


ابعد مجال الرجل عن كل عقار
وأصبر على الصكات والعمر بالي


وليا وطني غبر الأيام بازوار
غيري جماعه ما وطني لحالي


شفت ألوزا وشتلت لي منه قنطار
وليا عدلته شرق للغرب مالي


عبرٍ على الدنيا من العسر ليسار
ما ظنتي فيها حرام وحلالي


حرام للفنجال سوقه ليا فار
ألا على اللي يرخصون الريالي


وأنا الذي ما قول في نجد شعار
وإذن به شعر ما حدٍ حكا لي

الأخ مشعل الفدغوش
سلمت يداك على النقل الرائع