محمد العمري
سلام مني لكم يا طيبين الصدور=تسليم حده من الخوبة إلى الرافدين
في موسم ينتخي في طايلين الشبور=جرحه كليف ويشكي قسوة الظالمين
عبدالعزيز الفدغوش
فيك البقا يا منار المعرِفة وإمخبور= في طيب ذاتك وطرحك بالمواقف ثمين
الملعبة ودها رجل ٍ بوزنك جسور= ويطرق حديد الهدف حتى يطيع ويلين
محمد العمري
أشوف في مجتمعنا صار بعض الثعور=والحال في كل يوم أشوف وضعه يشين
صاروا عداة العروبة في تمام السرور=من سوء حال العرب ما بين وحين وحين
عبدالعزيز الفدغوش
يا صاحبي بالعرب بيّن كثير القصور = والناس تعرف ضعيف المستند والرزين
وضع العرب يا زميل الحرف جد مخطور= والله يعين العرب بأوضاع دنيا ودين
محمد العمري
الموت منا بلانا والخطر والشرور=وأكيد كل البشر باوضاعنا خابرين
الله كفانا من العدوان رغم الفتور=وابليس فينا بدأ يلعب بشكل مبين
عبدالعزيز الفدغوش
يا صاح والشر جانا من بعيد البحور= والله يكفي وطنا شر حقد دفين
من دور هرمز و قبله من قديم الدهور= وسدران وده لنا بالزعزعة يا فطين
محمد العمري
سدران يبقى بغيضه والرحى به تدور=وارض الخليج الأبية وجهة العالمين
حنا ترى في نهار الشر سم النحور=ما تنكسر شوكة الفارس ولو هو طعين
عبدالعزيز الفدغوش
يا صاح دمي ودمك من سببهم يفور= والدايرة مبرهزة تتجه للبدين
غاد القدا حاشر ٍ نفسه بكل الأمور= وزلزال ( فوكو ) غداله بالمضرة رطين
محمد العمري
أعطوه فرصة وصار اسمه بكل الصدور=لولا الحيا قالوا إن سيد المرسلين
الله عليهم ولا فيهم حكيم غيور=يحكم بعدل ويكسر شوكة الحاقدين
عبدالعزيز الفدغوش
أحفـاد شر ٍ وغدر ٍ من قديم العصور =والناس تدري بهم لكنّهم ساكتين
ترجمت يا محمد العمري بشعري شعور= والله يعز الخليج وينصر المسلمين
الإهداءات
رد: محاورة شهر مارس 2011 ؟
العرض العادي
المواضيع المتشابهه الموضوع: محاورة شهر مارس 2011 ؟ 
