وطن الحرف والحلم ... مرسى الأحلام

[أحلام مؤجلة]

[أحلام مؤجلة]

[أحلام مؤجلة]

لو تسمحين

لو تسمحين
افضفض الحسرة انين ..وابكي على صدرك قهر
وانزف على كفوفك حنين
من كم سنه وحدي هنا.. لا من طرا لي مامضا
اتبعثر وانزف وجع… لين الوجع
من حرّ دمعاتي يلين
لو تسمحين
اتوسد ايدينك وله… واقول وينك من سنين ؟؟
العمر قرب ع الرحيل … بالله لا تتأخرين
شفتي الغياب وجمرته
احرق ضلوعي من يسار وامتد للضلع اليمين
لو تسمحين
عودي هنا .. ماباقي غيرك لي انا من يوم راحوا الطيبين
تهنا على دروب العمر خطوة قهر وخطوة عنا
واللي ارحلوا عن حيّنا ماعاد يشتاقوا لنا
بالله لا تتأخرين …… بالله لاتتأخرين



احلام

[أحلام مؤجلة]

مجاراة جميلة بتويتر بيني وبين الشاعر الرائع عبدالله العساف.. اتمنا ان تنال رضاكم
ونقلتها هنا للحفظ والذكرى

قلت انا…



‏‎
@Ahlaami

نموت بصمت مافي حد يبكينا
………………………………… ولا عابر يمر فينا يدق الباب

ياعمر الـ راح من قبضة ايادينا
……………………………… كذا نرحل وحيدين وبلا اصحاب
‏‎
@alasaaf2

رسوم أثارهم داخل مآقينا ؟
…………………………… على رغم الدموع اتراود الاهداب

لقينا في شواطيهم منافينا ؟
…………………………… نروح وكل بحر لأبوابهم ينساب
‏‎
@Ahlaami

يادنيا ليه للفرقا … ..تركتينا
…………………………… خذيتيهم ولا همك وجع وعتاب

كبير الجرح يادنيا .. تشوفينا
……………………………… لنا موطن ولكن عدّنا اغراب
‏‎
@alasaaf2

سؤالك كم بكت منه اشافينا ؟
………………………… اذا مرت على بال الحكي الانياب

خطاويهم جفت سكة خطاوينا ؟
…………………………. وعلى جال السكك مامرو الغياب
‏‎
@Ahlaami

سكك ثكلى بلا وجهة تودينـا
…………………………. وشوارع خانت الخطوة بلا اسباب

مسافات البعد مبطي العبت فينا
…………………………… الين القلب من حزنه عليهم ذاب
‏‎
@alasaaf2

وظلينا هنا ..للاهنا فينا ؟
……………………………… مداراتٍ تدور ولهفةٍ ترتاب

نسا النسيان مامر ابأراضينا ؟
…………………………… وبقا ثغر الحنين لبعدهم يغتاب
‏‎
@Ahlaami

هنا وهناك .. وش تنفع امانينا
………………………….. وهذا العمر كم ضيّع لنا احباب

نعيش بصمت لو هالصمت يشقينا
…………………………… متى عابر حلم يفتح لنا الابواب
‏‎
@alasaaf2

شموع احلامنا اتذوب وليالينا
............................ تصافح طيبنا بنكرانها الماهاب

وينطر غيمة الاحلام وادينا
………………… ..ويسيل البعد ..بعد ويزهر الاسهاب


وسلامتكم

[أحلام مؤجلة]

لاتسلني ليه عيني لاحضر طاريك تمطر
…………………………… الحزن ضيفي وانا تدري بعيوني حاتمية

تنحر الفرح وتعزْمك كل ماعالبال تخطر
…………………… ارتكي فيها وتقهوا من سيول الهاشمية

********

عزاه لعيون الـ عشَقْ .. بالليل سهرانه
…………………………………… محدن سأل عن حزنهـا واللي نثر ماهـا
.
هم اتركـوها للسهر والبنـت عشقـانـة
…………………………….…… والحين قالوا :" للخلا هالبنت وش جاها"
******

كلٍّ يغني علـى لـيلاه … ياليلـى
……………………………… ويجر من مهجته صوت الوجع وينوح
.
واللي مفارق وطن ماظنتي يسلى
……………………………… لاصار في غربته ضايع ومابه روح

*****

لاتطري الحب .. وانت لعهدنا خاين
………………………………… خله لأهله .. وهم ادرى به وابخص

الغدر ماله عذر واضح لنا وباين
……………………………… ماعاد نبكي على من عهدنا ارخص

*****

لو كلّ طعنـة بالظهر منها تطيـح !!
………………………………………… ماكنت عشت اللي انكتب لك من عمر

تدري طعونك لو يجي الوقت الصحيح
………………………………………… أكبر مُحفّز لجل تـقـوا .. وتستمر

******


ياساقي الورد غابت غيمتك مبطي
………………………………… والورد عمره قصير ويذبل بسرعه
.
ماعاد هو همنا منهو بنا المخطي
……………………………….. بكرة نحل الخلاف ان كان لك رجعه

****

غربة خذتنا بدون دفتر عناوين
…………………………….… تاهت خطانا بين زحمة اوادم
وحلم الرجوع الـ مات من دون تأبين
………………………………..ماكان له احباب ناخذ عزاهم

*******

النوم للي خالي البال مرتاح
……………………………… ماذاق حزن وغدر او بات ضايق

ما همته دنياه والحظ ماطاح
……………………………… يحضن لحافه ماشقا بالخلايق

*****
سبحان منهو قسَمْ رزقه واعطانا
…………………………… من غير حولٍ ولا قوة كثير الخير

منهو خلقنا … أبد حاشاه ينسانا
…………………………ادعيه دايم عسا يرزقك رزق االطير

******
خايف بعد طول البطا لو لمحتك
…………..…………… انسا وجود الناس واركض واضمك

واقول اسف لو بصدري جرحتك
.............................. هاذي ضلوعٍ ناحلة … لا تهمك


*****
وش عذرهم داموا على الارض واحياء
……………………………… .. ليه احرمونا وصلهم واتعبونا
حنا فقدنا ناس واوطان واشياء
………..……………………… ياليت مرة نلقا ناس افقدونا

******


أشرق بالدمع واعجز اناديهم
…………………………………….. ابيهم يوقفوا لحظة اودعهم
وامد خطاي ملهوفة واباريهم
……………………………………..خذوني ماتصل لحدود مسمعهم
وذاك القلب المعلق باياديهم
....................................... يبوس ايديهم يحاول يرجعهم

******
واللي رفع بالكون سبع على سبع
………………………………… مااخون عهدن لك قطعته ولو خنت

ولو شال قلبك نصف طيبي او الربع
………………………………… ماكنت يوم بعين قلبي .. كذا هنت

*******
دخيل الله تخفف طعنك بصدري
……………………………………… ..نزف اخر عرق فيني وصلت الموت
.
تعبت اداوي جروح القلب وادري
……………………………… .… اذا تشافت يظل غدرك بها منحوت
.

[أحلام مؤجلة]

اذا صامل على الفرقا …. خذ شعوري عشان انساك
وخذ عيني اخاف ان رحت ... تستاحش وتتمناك

****

وبـ لحالك
تلملم باقي آمالك .. ترتبها برفوف الأمس
وتطفي الشمس بشمالك
تبي تغفا…ونومك ماتهيالك

وبـ لحالك… تموت بصمت
وترثي حروف أشعارك
ولاعابر حلم زارك
وتذبل بك الحواس الخمس
وتمد ايديك .. لـ ضلوعك … وتغتالك

******

مادامك تعرف الغيرة… وبك احساس
علامك تترك الـ حبك
يدور من يعوض عنك .. بين الناس!!!
ترا القلوب لا اشتاقت … تستاحش
من الليل…. ومن الوسواس

******
ودنيا تدور
وانا قلبي قلب عصفور
صغير الحجم .. لكنه كبير شعور
ابد مايحتمل صدمة .. ومجرد كلمة او ضمة
تعيث بعشقه المستور
تقيـّد له جناحينه… بأماني بور

*****

عساه .. يفارقك غالي … وتحس شلون
وجع من فارقه غالي … بلا سبّة !!
تحس بقيمة احبابك . ... ولو يخطون
يعلمك السهر الفراق ياصعبه
على ابواب الصبر … توقف سنة مغبون
وتدري قلوب احبابك ماهي لعبة

*****

صباح الخير … وردّت لي المراية بحزن "صباح النور"
وعيني قالت لعيني .. وحشتينا
ضحك وجه المرايا … وجاوب البلور
افا يااحلام … نحاكي بعض … جنّينا

****

ومرونا بدون احساس .. جرحونا وتعدونا
وحنا الناس… الـ ياما بكيناهم ... اذاغابوا
والـ ياما عذرناهم لو اخطو ولو صابوا
خسارة كيف مرونا …… ولا قالو الف لاباس

****

انت نايم ..ياعسا نوم العوافي..
ياسعد منهو بحلمك يوم عدّا
فدوتن لك.. كل من بالليل غافي وكل ساهر
ينظم الشعر ويعدّه
في غيابك.. حرمت ضمة لحافي
لجل ماازاحم طيوفك ع المخدة

****

وغني لي ... هدوء الليل يزعحني
احس الذكريات تصير اوادم ….تعبث بليلي
واحس الدمع يحرجني واكفكفه بمناديلي
غني لي … وعلى جرة مواويلك
احس الليل .. يدّ تطبطب على صدري وتدعي لي

****
تعبت انطر ... ورا شباك ذكرانا
ابيك تمر وترمي لي… صباح الخير كالعادة
يردّ القلب… قرب لي.. بقولك سر
صباحي انت مشتاقة ... كثر هالدنيا وزيادة

*****

هات يدك .. دفي احساسي بدفاها
من زمان احلم بلمسة… من يدينك ياحلااااااااها

****

هات صوتك تدري بصمتك اضيع
وقول أسمي .. لجل يسري في عروقي
الف معنى للربيع

******
واسمع يدّ تدق الباب
واقول الله يسعدهم ... لفوا احباب
اقوم افتحلهم بابي واحضنهم
والا مـ افتحه ... كنّي مخاصمهم
واسابق خطوتي والقا ..الهوا حرك غصن طايح ودق الباب


احلام

[أحلام مؤجلة]

كلمتك كالسيف تعكس للبشر نوع احترامك
ارتقي بالقول .. تفلح ماعلى الجاهل ملاما

مسلميـن اخلاقهم تظهـر اذا ردّوا كـلامك
لو يخاطبهم سفيهآ … مروا وقالوا سلامـا

*****

حسافة مابقا صاحب يايمة من بعد عينك
يجي ويمسح دمع عيني وبأحضانه يدفيني
.
كثير الناس من حولي ولكن ياالغلا وينك
عليم الله لو مليون غيرك… مايكفيني

*****

ليت الدروب اللي خذتهم قريبة
واسج رجلي كل ما اشتقت لقياك

ياعونة الله من يفارق حبيبه
وشلون يقوا نار شوقه وذكراك

****
ماسمعتك عيدها الفين مرة
وكل مرة مااسمعك واقول عيد
.
قول احبك قولها يكفيك شره
حب غيري من قريب ومن بعيد

***
يصير اهواك ماأسأل وش التالي !!
وهل عشقك مباح ومايجيب ذنوب
.
واظل اسأل واجاوب حالي لحالي
ولو به ذنب ماظني انا بااااتوب

****
تمر ببال احلامي .. و تحيـّرني
وامثل مع وجودك لعبة التطنيش
.
تعبت بحيل من ذكراك .. حررني
ابي أنساك و أنساني عشان نعيش

****

حب الوطن ماهو مجرد مظاهر
رقص وقصايد بالشوارع وتفحيط
.
الحب روح وصدق واحساس،طاهر
ينبع كذا من قلب من دون تخطيط

******
تكسر بيوت الشعر … كلـّن يهلل
كلـّن يقول الله ، هالروح صحـّت

ان غردت الفين "جاهل" يطبـّل
وشلون لو احيان غلطت وكحـّت

****
كثر ما منكسر فيني حلم واحباب
كثر ما قلت من قلبي مسامحهم
.
انا خاطر من الـ بكرة ابد ماطاب
يجون احباب مثل اول واصافحهم

*****

ان كان همك ياهوا البال مشقيك
عادي ياغالي لو تجيبه لصدري
.
فدوة لهمـّك صدر منهو يحاتيك
بدري عليك الهـّم ياشوق بدري

*****

لاتقول رايح صاروا الناس بالليل
ماتدري ان الليل "ستر العشاشيق"
.
لاتخاف حكي الناس والقال والقيل
محدن يشوفك وانت بين المعاليق

احلام

[أحلام مؤجلة]

احيان ... ينبت من حنيني " فم "
……………………… أبكـم وحلقي مابقـا به صـوت

يمـه .. واجفـل مابقا لي " أم "
…………………… واشرق بدمعي واعترض عالموت

اصرخ وادفـن فـ الحنايـا " هم "
……………………… واموت فينـي … والصبر تابوت

يمه ويجاوبني الفراق " بـ سم "
………………………. وآجوع شوفك والمواجع قـوت