ديوان الشاعر احمد الناصر الشايع رحمة الله عليه

[مشعل الفدغوش]

ابتدي باللي - أحمد الناصر

ابتدي باللي عليه اعتمادي
عالم بالبينه والخفيه
كل شي مرجعه النفادي
غير والي العرش ورب البريه
دارنا الزلفي لياجا الوكادي
مربع الأجناب والآهليه
دارنا اللي يوم وقت الطرادي
دونها نارد احياض المنيه
كم طردنا من عدو معادي
ما يجبيها دام الروح حيه
جعل وبل السيل مع كل وادي
من حقوق المزنه العقربيه
يسقي الزلفي نفود او حمادي
والجبل يمشي شعيب وشغيه
فعل اهلها عند حضر وبوادي
يشهد الرجلي وراعي المطيه
ربعي لو ينادي المنادي
يظهرون اهل الوفا والحميه
ما حد منهم وقف بالحيادي
من ذكرهم فزعته واهنيه

[مشعل الفدغوش]

يامل عين الى جا الليل - أحمد الناصر

يامل عين الى جا الليل عيت لاتنام
تكثر عليها الروابع يامعين الصابرين
من عقب ما استبشرت بالنور وانجال الظلام
شافت من الغيظ مايملي نظرها مرتين
لا وهني المعافى مايلوم ولا يلام
مستانس لو يزين الوقت ولا مايزين
ماذاق مر الفراق وفارقه حلو الغرام
والولف ملاك ما يحتاج عراف وظمين
الصاحب اللي هدب عينه مثل ريش النعام
ما يلتفت مع طريقه من يسار ومن يمين
اكبر مصيبه ليا سلمت ما رد السلام
مدري وش اللي خطر في بال وضاح الجبين
إن كان لك يا اشقر المجدول في هجري مرام
صبرت صبر الجمل بارضاك لو ضلعي متين
الموجب انه ملكني حب مردوع الوشام
لا خير في عشرتن ما هيب في حرزن مكين
هو حق ياللي تعرفون الحلال امن الحرام
يسهر عيوني ويدعي سري الخافي يبين
العشرة الصافية تقود أهلها بالخزام
ما تختلف عشرة الغالي على طول السنين
وان كان عقب البطا فك اللحام من اللحام
ما عاش أبو نية وحدة مع أو نيتين
ياصاحبي ما تساون الغوارب والسنام
من خف ميزان قدره لو قلبه ذهين
لو شفت منك الجفا مارضى على عيني تضام
قطعت منك الرجا كنك مع الميتين

[مشعل الفدغوش]

بأسباب زول نطحني - أحمد الناصر

وارجلي اللي تبين ضلعها من غير ساموح
حار القدم يالله الخيره ولافيها اروايه
بأسباب زول نطحني بالطريق وشاحني شوح
اودعني امشي والد خلاف واقصر في خطايه
زول نطحني وأخذ عقلي ولالي منه مصلوح
خلاني اركض واغني من خلايه في خلايه
اللي خذا القلب اظنه مخطر يلحق على الروح
الموجب انه مريض خاطري حد النهايه
هذا وانا عن طريق المنتحي منهي ومنصوح
مير المقادير جابتني على حسنى وعلى سايه
مادام باب الهوى لأهل الهوى بين ومفتوح
ابين من الشمس عقب الظهر في وجه المرايه
يامن يودي سلامي والهوى راعيه مفضوح
ويخبره بالمصيبه كلها والراي رايه
إن كان لد النظر يمي عن اللي فات مسموح
وإن كان قفى وخلاني فانا سبة عنايه
واعين ياللي من الفرقا بكت والقلب مجروح
مانيب عازي لعل الله يجبر عزايه
الصاحب اللي ليا شفته عجزت اقعد ولا اروح
ماهو طويل نشاش ولا قصير الجرم غايه
يامن سميه على اسمي الناس به زود وبه نوح
ثلاثة اشهر ينزل نصف ثالثهن كفايه
واثنين يكمل بهن اسمه اوله حراس وشبوح
كم لي وانا ارجيه جعل الله مايقطع رجايه

[مشعل الفدغوش]

هذه القصيدة قالها الشاعر الكبير أحمد الناصر الشايع في رثاء ابنه محمد رحمه الله الذي توفي قبل شهر أو أكثر بحادث مروري فقال هذه القصيدة الباكية


يا بعد نوم الليل عن حجر عيني
صبر على ما صار من وال الأقدار
صبرت صبر باح منه الكنيني
أضحك مع العالم وكني على نار
ما غير أهوجس بين نفسي وبيني
يعلم بها العلام في كل الأسرار
تقل اتحرى لي علوم تجيني
مع الطروش اللي يجيبون الأخبار
فهمت رأس العلم من كلمتيني
من يوم قالوا جا محمد ونصار
تكسرت عقبه جرايد يميني
عز الله اني عقب ما صار صبار
من عقبها ونيت لي ونتيني
ونة غريب بالخلا ضاع واحتار
لولا الله أبرك ثم قوة يقيني
لا طير مثل الطير من كف صقار
تخنقني العبره وأفرك يديني
واحترت مثل مصالي النار والغار
علم يخلي كل قاسي يليني
كنه على قلبي رصاص أم كرار
الى ذكرت عياله المصغريني
هذا يعزيهم وهذاك زوار
احد على جنبه واحد له ونيني
جتني هموم القلب من كل الأقطار
قلت اصبروا والله مع الصابريني
الله يكافيكم صواديف الأشرار
عسى عوضنا الحي بالميتيني
ناصر ونايف ذخرا سر واجهار
وأحمد وعبدالله ذرانا الحصيني
صغار سن وان بدا اللازم كبار
يجبر عزاي اللي بخلقه ضميني
محيي العروق الميته عقب الأمطار
مالي عن المكتوب فوق الجبيني
لو رحت شرق وغرب ويمين ويسار
صليت نصف الليل لي ركعتيني
أطلب له اللي للخطيات غفار
خفف ذنوبه يا أرحم الراحميني
في ماقف ما ينفعن فيه الأعذار
جعله برضوانك من الفايزيني
بالماقف اللي به يضيعن الافكار
في ماقف به كل خافي يبيني
تمت وصلى الله على سيد الأبرار

[مشعل الفدغوش]

ألا يا ونتاه اللي من الفرقى - أحمد الناصر

ألا يا ونتاه اللي من الفرقى برت حالي
كما بري الدبا الغصن الوريق اللي على حله
على اللي من ثلاث إسنين هو همي وغربالي
ولكن ماحصل لي منه ساعه تبري العله
إلى مني بغيته في محله ما تهيا لي
والى منه بغى ياصل محلي صار به ذله
وإلى مني بغيت انساه وادله عن هوى بالي
بلاي النفس ماهي عن صخيف الروح منحله
والى منه نطحني قال ياستار الاحوالي
عجب لله كيف الخل ما يشفق على خله ؟!
يطيح اللي بكفي واذهل الدنيا وهو سالي
والى منك نظرت اللي توده بان بك خله
واناللي طول ليلي مع نهاري بالخلا الخالي
أصايد رغبته واتبع طريقه وآتبين له
الى من غاب عني ماتبي حالي ولا فالي
أعود في عماي الاول اللي مابه إشكله
انا وياه مثل اللي ورد مطوية الجالي
برى حاله ظماه ويوصف الما له ولا دله
كذوب اللي يقول اقوى فراق الصاحب الغالي
وانا لامن نظرته تقل حكم الروس لي كله
إلين اصبحت انا المطلوب بالأول وبالتالي
انا المطلوب والطلاب راع القذلة الهله
ولاني قاعد أرجيه لين إيجيبه الفالي
وانا ما ودي العذال والعدوان تفطن له

[مشعل الفدغوش]

سهرت البارحة - أحمد الناصر

سهرت البارحة واشغلت بالي على الله اعتمادي واتكالي

أهوجس والهواجيس أتعبتني وأعد اللي جرى ليه أو مني

هواجيس تفيد الناس عني أبين للبعيد أو للموالي

ولا به راحه إلا بعد شده ولا أحد يفتخر في ورث جده

ترى كل له أمن العرف قده وأنا مثل العرب من قد حالي

خلقت بديرت من ذاق ماه لو أنه غاب عنها ما نساها

حشى والله ما نلحق جزاها بها جيرانها مثل الأهالي

وهي دار الحميه والمعزه وهي دار الوفاء في كل حزه

لها من شرق ضلع طويق بين وعنها من جنوب القاع لين

هو الزلفي لعل السيل فاله إلى منه نشا وامطر خياله

تزين أيام راعيه أو لياليه سقاك السيل يازين المفالي

بلاد الخير ياهاك البلادي تعيش الحضر فيها والبوادي

والى جاهم بعيد الدار عاني يبا الفزعه وحاديه الزماني

عطاياهم العانيهم جزيله ولا قد مدوا المده قليله

ولا بايمانهم يمنا بخيله ولا يعطي الجزال الا الجزالي

[مشعل الفدغوش]

محاوره شعريه بين الاب احمد والابن محمدرحمه الله


احمد:
سلامي رديه عدد مانشى وامطر صدوق السحاب...........رديه سويتها يوم جانا وقت ميعادها
من لايفكر في زمانه وياخذ لليالي حساب.........تلعب به الدنيا وهو مادرى والنفس مافادها

محمد:
يامرحبا والله اعلم بالخطا والله اعلم بالصواب................اقولها والناس تقدح نهار الحرب بزنادها
من لايحسب في زمانه يبي يصبح عشا للذياب..............يصبح عشا للسحم والسحم يعرف كيف مرصادها

احمد:
كم واحد ظميان في القيظ قد غره لميع السراب...........يصبح مثل ماقيل سرداد رجله مثل مردادها
لي عادة ماتختلف لو يشيبني شيش ولد الغراب..............ون كان لك فزعة يابو مدفع روسي معك نادها

محمد:
مافيه شك وكل بيت يعمر فيه طاقه وباب..........والمركبه من صبح فوق القمر طلعت بروادها
اللي يهاب من الخطر ماحضر واللي حضر مايهاب...........واللي يشوف المعركه في عيونه راح ماعادها
.
احمد:
راسي مضر للتعب والمشاكل وا***ا والعذاب......مالي حزامي بالفشق والذلول الصبح بشدادها
حاربت يوم الحرب الابيض وحرب اهل العصا والحراب.......ومن لاعرف مصدارها ماعرف وشلون ميرادها

محمد:
الحيه الرقطاء قطع راسها مابقيا غير داب............واكثر عباد الله معك يايبه تاريخ ميلادها
قد قلت لي بالك تعلق على الجربا صميل او جراب.............ماربح سايقها ولا ربح ياهل العرف من قادها

[مشعل الفدغوش]

نهار ثالث عقب عيد رمضاني - أحمد الناصر

نهار ثالث عقب عيد رمضاني
ناس عطاها الله وناس محرومه
أحد قضى عيده سلام وتهاني
وأحد توصله الكواكب همومه
صادفت صدفه من صدوف الزماني
منها قوي الحيل تفتر عزومه
هذا زمان الهم والامتحاني
وقت على قلبي تعاقب سهومه
الأوله كامل جميع المعاني
مزبن المضيوم شرع الخصومه
(محمد) اللي بالقسا واللياني
عقبه سمايه غايبات نجومه
والثانية بأقرب قريب وداني
خامس عيالي يوم جتني علومه
قالوا ما بين (الخاصرة وحلباني)
ولدك مات اللي ترجا قدومه
جا يومه الموعود بأربع ثواني
قلت السبب؟ قالوا دنا منه يومه
علم على الكبد الصخيفه كواني
كية عطب ماتنشكي للحكومه
تهشمت كل الضلوع المحاني
مفجوع والمفجوع محد يلومه
أخذت لي ساعة وأنا في مكاني
حسبت لي عشرين طيحه وقومه
إلى بغيت الهرج ييبس لساني
والذاكرة عندي تقول معدومه
قمت أتلفت وأتسمع بأذاني
من شاف حالي ماتهنا بنومه
مما بقلبي رحت بالليل عاني
للموتر اللي مابقى إلا رسومه
عن روحتي ياليت ربي نهاني
ولا شفت دمه سايح في هدومه
قمت ودفنته والله المستعاني
في خرقة بيضاء عليه محزومه
يم القويعيه بلاد قحطاني
والحر غير لون وجهي سمومه
وأقفيت من عنده وعشري ثماني
مثل المصبح والبلاد محكومه
والله يا لولا إني وسيع البطاني
لا أصكها مثل أشقر الريش حومه
طاوعت نفسي مير عقلي قواني
عن الخطا مافيه نفس معصومه