قصة " شوق " بقلم رهف الأنصاري

[الشـ شمس ــموخ]

عوده حميده ومتابعه شيقه بس لا تتاخرين علينا نحن في الانتظار

[رهف الأنصاري]

الغالي بوسعد

الغالي سامي احمد

الغالي الدهمشي

الغاليى جوهر

الغالية شموسه

الله لا يحرمني هالتواجد والتفاعل

دمتم بود

[رهف الأنصاري]

الحلقة 3


شوق : يعني كان اكثر كلامه يدل على انه ناوي يسافر ويكمل دراسته
بس قبل ما يسافر ويتغرب يبي يتزوج علشان يحافظ على نفسه ..

العنود : حلو ...

شوق : شنو اللي حلو ؟؟؟

العنود : حلو انه يكون تفكيره منصب على هالشي ومخه نظيف جذي
مو مثل باجي الشباب اللي مخهم كله بال..... ما علينا ..

شوق : اي والله يالعنود .. بس انا خايفه من شي واحد !!!

العنود : شنو ..؟؟؟

شوق : انا (( بدون )) وهو كويتي .. يعني تتوقعين ما راح يكون هالشي
عائق في علاقتنا .. وممكن انه يوصلها لطريق مسدود..؟؟؟

العنود : شوفي شوق بقولج شغله حطيها بأذونج وفكري فيها عدل ...
اول شي لازم تعرفين انتي شنو تبين من هالعلاقة ؟ شنو هدفج ؟؟
ثاني شي لازم تحطين في بالج كل الامور اللي ممكن ترفعج فوق والشغلات
اللي ممكن تنزلج سابع ارض ؟؟؟

شوق : امبييييه .. شنو قصدج يالعنود ؟؟ ليش انزل سابع ارض ؟؟

العنود : انا اقولج يا عمري .. الحب ما يعرف المنطق ومثل ما قالو انه عمي
واللي يقوده مجنون .. بس لا تنسين انج الطرف الضعيف .. وممكن اي شي
يصير عكس اللي تبينه يحطمج ..فخليج واعية من البداية .. لا تنهدين كلج
وبعدين ما تنفع الحسافة .


شوق : والله خوفتيني يالعنود ..
انا كنت افكر وايد بس انتي جذي خليتيني اخاف وانا ما ابي اتعب ..

العنود : ليش ما تشاركينه هالكلام قبل ما تصير علاقتكم شي لا يمكن التخلي عنه
وتصير عقب مصدر للالم اللامنتهي ... انا مو قاعده اشجعج يا شوق .. وتاكدي بانج تهميني
واني ما ودي تتعبين وتشيلين هم وانتي صغيره ..
وتاكدي من هدفه من علاقته وياج .. وشنو ناوي وكل شي كل شي ..
علشان لا تندمين في النهاية ..

شوق : انا يتني فكره العنود .... بس تكفين قولي اي ..

العنود : اقول اي على شنو ؟؟ لازم اعرف اول ...

شوق : شقلتي يالعنود ؟؟؟

العنود : بشنو ؟؟؟ مو لازم ادري شنو تبين ؟؟؟

شوق : انا .. ابيج … انه … انتي …

العنود : ( وهي تضحك ) وراس امي بصكج كف على عينج ..خلصي

شوق : ايشرايج …انتي اتكلمينه ؟؟

العنود : شنو ؟؟ لا طبعا !!!
استخبلتي انتي

شوق : تكفين العنود لحظة لحظة بس سمعيني اول العنود !!!!!!!!!

العنود : لا يعني لا !!!

شوق : انا لما كلمته قلتله انه محد يدري بس لما انتي اتكلمينه راح
يعرف انه السالفه مو لعب ..
ودام اني قلتلج معناها اكيد مو ناوية العب واهوه بعد راح يحسبلج
حساب وما يقدر يلف ويدور عليج مو صح ؟؟

العنود : صح بعينج..وان قال شي ما ينقال ؟؟؟

شوق : والله انه مؤدب وولد ناس تكفين العنود....(وهي تحضنها)

العنود : اوووف .. قومي قومي دقي عليه وخلينا انشوف اخرتها معاكم

رفعت شوق السماعه وبدات بطلب الرقم .. وبعد التحية طلبته من اخته
وما هي الا لحظات حتى جاء صوته يقول …. الو …

العنود : مرحبا ..

وليد : يا هلا .. هلا اختي من معاي ؟؟

العنود : انا من طرف شوق انا العنود ..

وليد : يا هلا وغلا خير ..شوق فيها شي ؟؟

العنود : لا الحمدلله ماكو الا الخير بس حبيت ادردش معاك شوي عنها ممكن ؟

وليد : اكيد اختي اتفضلي .. بس منو حضرتج ؟

العنود : انا بحسبة امها ..

وليد : والنعم فيج آمري ..

العنود : انا بجيك من الاخر يا خوي وما ابي اسئلك ..شلون ووين وليش..
بس بعرف شنو نهاية المطاف بهالعلاقة ؟؟

وليد : صدقيني يا اختي اني غرضي شريف ..
وانا مو من الناس اللي تلعب على بنات خلق الله ..
انا عندي خوات وربي يستر علىالجميع ..

العنود : خوووش مبدأ .. وربي يوفقك .. بس انت عارف انه شوق مو كويتية

وليد ( يتنهد ): أي ادري وهذا اللي كاسر ظهري بس ..

العنود : شلون ؟




يتبع

[عبدالعزيز الفدغوش]

فصل مؤثر

واحداث متتابعة بانتظار

أيهما يهزم الحب أم الجنسية ؟؟!!!

[الشوووق]

ابنتظر البقيه بفاااااااااااااااارغ الصب يارهف


الشوووق

[عبدالعزيز الفدغوش]

كلنا بانتظار بقية احداث القصة

[الشـ شمس ــموخ]

رهف
من جد وانا اقراء القصه اقصد الحوار اللي بين الثنتين احس انك العنود متقمصه شخصيتها حيييييييل مدري احساس انفعالي يالغاليه بنتظار البقيه من الاحداث المثيره والله يستر ما تفرقهم الهويه فديتك

[رهف الأنصاري]

شاكره هالمتابعه والتفاعل

فديت هالمرور