يا الربع بعض الأوادم= أخلقه ربي وفرقه

ما تدري وين اتجاهه= ولا تعرف ارضاه من حمقه

شخص ٍ مغرور ومتغطرس = ما يشوف القاع من أفسقه

ما يبي رجال ٍ فاهم = ولو ملا إحزامه بفشقه

يبي رجال ٍ به غفله= أكّال ولعّاب ورقه

يا منّه لعب مع ربعه= خطط للجوكر وإسرقه

يبي كذوب ٍ متمرد = مغسول ٍ وجهه بمرقه

لا قاموا على عشاهم = للصحن من قام اسبقه

مشفوح ٍ نفسه ردية = يمكن يطيح من أرهقه

يفقد لا شاف الوليمة = يركض من دافع واشفقه

يبي غشاش ٍ عفلنقي = من غفل غشّه وإدرقه

يرحب لا شاف الزاير= وإليا أقفا بالهرج إلحقه

دايم ما تامن جنابه= لو إنك تقعد بشنقه

وإن تكلمت الحقيقة= يجي لك بالحلق إعلقه

ما يبي قول الصراحة = ومن نافق حبه وإعشقه

وإن جاله رجّال ٍ واعي = لو جيت تقدمه أفهقه

ولا منّك مدحت الطيّب = يثور ويصب إعرقه

وموته لا قلنا متعلم = من غيظه تثور اتفقه

ولا منّك حكيت الواقع = عاكس كلامك وإحرقه