‎
حمل همه سنين عجاف وأثقالٍ حنت ظهره
وعلى عكازته أركى ضعف يدّيه ومتونــه

رنا بعيون شح بها النظر وتعوّدت قصــره
رحل عنها الضيا مبطي ولا عادن يعينونه

نثر بأصابعٍ جفّت بياض العمر من شعــره
مسح بأطراف أكمامه سواد مسوّر جفونه

رفع كفه بجوف الليل يدعي ويطلب ويشره
إلهي ,,,,لاتذرني فرد أهله ما يودّونــــه

إلهي جنتك ارجي وولد صالح أبي بـــرّه
إلهي برحمتك ألجي من الاقدار وطعونه

خطا للمسجد يلبي ندا من يبتغي ستـــره
ألا طوبــــى لمن قاموا إذا نادى يلبّونــه

وقف وإيديه مرتعشه ومتعلقه على صدره
ركـــع‏ وخشوعه يسابق ملايكةٍ يحفّونـــه

سجد والناس محتاره غريبٍ يا بشر أمره
سجوده طـــوّل وأبطوا ينادونه , ينادونــه

ولكن لايرد الصــوت أو تهتز به شعــره !!
ما غير النور في وجهٍ تجعّد وانخطف لونه

على سجادته سلّم أمانــه شالها عمـــره
تعب في حملها وحده بلا نصره ولا عونه

بكاه المسجد وأصحاب مازاروا سوى قبره
ولاحسّوا وجوده يــوم لو كانوا يشوفونـــه

تنادوا كلهم سبحـــان ربٍ قـد قضـى أمـــره
هنيــاله ,هنيـــــاله !! على موته يحسدونــه


‎
دعواتكم لي وله