وينك تجيني ......!!!!!!
وينك تجيني لانزف هالشوق فيني أمنيـــات
وينك تجيني حلم ياخذني من حدود القهــــر
******
وينك تجيني طيف يحمل في يدينه لي حيـات
لاهـزّنــي كثر الحنين وفات ميعاد الصبـــــر
******
كنـّـي أشوفك في خيالي في حكايا وذكريــات
في النور في فرحة طفل بالعيد لو قرّب يمُــر
*******
كنـّـي أشوفك في ثيابي في سواليف البنــات
لاذابت الكلمة دلــع في {شفــة الليل} وخِـــدَر
******
كنـّـي أشوفـك في الأماني والليالي المقبــلات
في محبرة ماتت عطش من حرفي وجف الحبر
******
شفني جمعتك من غياهيب الفراق ومن شتات
من شمعتي ذابت بــــرد واحساسها قايد جمــر
******
لملمت أجزائك أماني في هدب عيني تبـــات
كوّنت منك موطني وأهديتك لعمري عمـــــر
******
تسكــن تفاصيل الوجوه بكل نظرة والتفــات
في كل {لهفــــة} جابتك تترك على عمري أثــر
****** شفـني طويــت من الدروب وبيننا عدة مئات
ليــه ؟ انت واقف ماتقدّم من مسافاتي شبــر
******
خـذني تعبت من التأرجح مـدّها كفوفك ثبــات
يشبه ثبات الشمس في كبد السما وقت الظهر
******
قرّب وخذني مابقـــا للروح {حيل} تقول هــات
قرّب تعبت من الرسايل تشرح ظروفك عـــــذر
******
شفني تعبت من التساؤل بين حي وبين مـــات
يمكن اذا جاني الصحيح مواج شوقي تستقــــر
******
بكره إذا فاضت عروقي شوق لك كيف النجات
لامركبـــي قادر يعـــود وساحلك دربه خطــــر
******
قلْ لي انا وشلون أوصل وأن كتب ربي حيات
تدري حياتي في غيابك تشبه {الموت الحمــر}
*******
ادري بأنك حظ غيري وفي حضن غيري تبات
لكن أنـــا ماضمّني ياغــير حضنـــك والقبــــر
*******
وادري نصيبي منك لو هو زان {مو دايم} شرات
من مـــــــات عنه والده ماورثـّه كـــود الفقــــر
*******
ياهيه جيتك والعطش في الروح ورضابك فرات
وينك تجي احتاجلك تهطــل على ارضي مطـــر
******
صدّق رجال الكون كلّه في نظر عيني سـوات
ماغير {أنت} اللي تزيد بخافقي عشــق وكبـــر
******
تدري أبيك واعشقك وأهواك الى حد الممــات
واقــــرا شعوري في قصيدي لجل عينك ينتثــر
******
يحتـار شعري لو بغا يكتبك ياعذب الصفـــات
وأجمع جزيلات الحروف {لخاطـــرك} دان ودرر
****************
******