يامجددة باشراق فكرك صباحي=ياناطقة باسلوب نهج ٍ فصيحي
ياشمس وجدي والبها وارتياحي=يازاهية معنى الغزل والمديحي
يانور دربي يا زمام انشراحي=ودي بعد عصف الغرام استريحي
ديم اشتياقي في مراميك طاحي=وجيتك مود ٍ في خفوق ٍ جريحي
ريح الغلا والشوق تدفع جناحي=حتى اتجه لك في مجال ٍ فسيحي
تكسرت في خط سيري ارماحي=وحتى الزمن في غيث وصلك شحيحي
عزف الهوى بالطوع روّض جماحي=والا من اول ما اشتقيت بمليحي
جيش الصبابة سادر ٍ باجتياحي=ومن الجوى مافيه قلب ٍ امريحي
من لوعة الحرمان تنزف اجراحي=حسبي على اللي للدما يستبيحي
دمي بحكم الدين ما هو مباحي=مسلم على مذهبك ماني مسيحي
سلمت لك بارضاي قوة سلاحي=وعلى شواطي الود عندك مطيحي
قربك خلق مضمون دافع نجاحي=واثمر ودادك في فؤاد ٍ صريحي
بين المحاني قلب مضناك ناحي=تجملي في حال صب ٍ طريحي
هام ونزع لك من بعيد النواحي=واخترت مرسى جمرتينك ضريحي
صرتي هدف وامال رحلة كفاحي=وما حدّ ( بصري ) حدني للوضيحي