من يقول ان الهـوى وزنـه خفيـف؟
لاشـك انّــه للمحـبـه مـاعـرف

الهـوى علّـه وقربـه يـا لطـيـف
سيـل عـارم مـن أمامـه ننجـرف

إذا اقتربت منْـه صـار إلـك حليـف
واذا أبتعدت عنْه .. عنْـك ينصـرف

واذا جرحته جرح ولو جرح ٍ طفيـف
صـار يرمـي بالخيانـة والـشـرف

وان كان تاريخك معـه دايـم نظيـف
يرمِقَكْ في كـل نظـره مـن طـرف

في معظمه ما هو على الرغبه وكيـف
هل هـو لازم بالحيـاه والا تـرف ؟

بعض الهوى ما له قاموس ٍ وتعريـف
وبعض الهوى معروف لو ينطق بحرف

وبعض الهوى ثقيل رغم إنّـه ظريـف
يجلب الويـلات فـي سـن الخـرف

وبعض الهوى في منهجه كلـه عفيـف
ما يغامر حتـى لـو رمشـه يـرف

وبعض الهوى ألعاب وتسليه يا حيـف
وبعض الهوى مثل الغوى علّه وقـرف

وبعض الهوى كله ربيع ٍ بْـلا صيـف
وبعض الهوى منْـه الدمـوع تنـذرف

وبعض الهوى يصونه ولف ٍ ووليـف
وبعض الهوى مـن الهـواء ينغـرف

وبعض الهوى له زمجره والا حفيـف
وبعض الهوى يحكم عليـه أي ظـرف

هذا هـو الهـوى ربيعـه والخريـف
منهجه واحـد .. ولا هـو منحـرف



’،
’،
’،

جوهر الراوي