قالت كبرت وهالزمن هد حيلي=واللي يشوف الوضع يرأف بحالي
شبابي ولّى وشاب شعر الجديلي=وآمسيت كهله لا شكوك وجدالي
ناخت ركابي والوهن صاب خيلي=والقلب ماهو من عنآ الوقت خالي
والشكل ماهو مثل الآول جميلي=راح البهاء وراح عهد الجمالي
رح ناظر اللي حاضر"عصر جيلي=تلقاه شايب والصبا عنْه جالي
فات الأوان وفات زهوي وزيلي=وشمس الأمل قد أشرفت للزوالي
خل المحبه يا حبيبي تسيلي=تروي خفوقي من غلا الروح سالي
وحل الحبل لا تربطه في شليلي=والحبل الآخر لا يتعقّد بشالي
كنت آتمنى يوماً إنك حليلي =والرّب قدّر صار غيرك حلالي
كتمت حبك في ضميري ودليلي=على شعوري ما حوته الدِلالي
عشقك شغلني في نهاري وليلي=وياما آسهرَتْ فيك العيون الليالي
وكل ما آسلى فكري يمّك يخيلي=وآعيش جوّي في سراب الخيالي
وتمضي سنيني لين وقت الرحيلي=وكل ٍ لزوم بْيوم يشد الرحالي
هذي أنا واشرح لي اللي تبي لي=إشرح لي دام انّك بحالي تُبالي
وحذراك تركنّي بركن الهميلي=وليت الزمن يرجع أيا همّلالي
جاوبتها رداً على القول قيلي=وابديت رآيي في متون المقالي
العشق في مهجة حشايا نزيلي=والشوق زلزلني بساحة نزالي
والنفس لو تنسى مقام الخليلي=تنفّست معنى الوفآ من خِلالي
حبّك سكنّي مالي عنّه بديلي=والقلب ماله عن مكوثك بدالي
لا ما كبرتي والعمر لك طويلي= بإذن الذي شاد الجبال الطوالي
والشيب ماهو رمز عجز العليلي=ومهما كبرتي بناظري بالعلالي
انتي بعيوني لك جمال ٍ جزيلي=وآوصاف حلوه والمعاني جزالي
أبقى أحبك في هجير وظليلي=وكل المشاعر تستفي في ظلالي
يا شمس حبي وغايتي لا تحيلي=عنآ المعنّى من عناه المُحالي
وهلّي مزونك واستفيضي سبيلي=وشدّي عنان الوجد عند السبالي
روعة غرامي ما لها شط ميلي=وانتي غلاي وعزوتي ورآس مالي
يا ليت يشفى في عذولي غليلي=واحصد نتاج الحب واربح غلالي
من كثر شوقي هاض وتر الزليلي=وساعة قدومك كني أشرب زُلالي
إنتي حياتي وما لحبك مثيلي=هذا اعتراف الروح مالك مثالي
وعسى كلامي جزل ولا هو هزيلي=وكلامي جِد وما يطيق الهزالي