ياهيه ياضعوف الرجال المساكين= الرجل مايضعف قبال الرياجيل
ياهل النفوس الدانيه يالدنيين= الكم حرام تساق بيض الفناجيل
مافزتو الا بالردا يالرديين= ولاالوفا والطيب قسم الحلاحيل
الله يديم إن الرجال الميامين= اهل الشحم والعود والبن والهيل
راع الكرم حط الكرم للكريمين= ويفرح ليا جوه الرجال المشاكيل
وراع الردا مايتركه طبعه الشين= لو عاش جيلً فات لو عاش هالجيل
ماهو مضريها على العز والدين= ولاهو مضريها علوم الرياجيل
درب الرجال الوافيه دربها يمين= والدرب الايسر ياعرب للمهابيل
يشوش راسي للرجال الوفيين= اهل الوفا واهل البيوت المداهيل
اخير من شوف الضعوف المساكين= اللي على الهزلات دايم مقابيل