ياللي تنشد وين راشد راح ماشفنّا قصيده=الجزايل مكسبي وانا على الجزلات قايد
ان بدعت القاف جبت الشارده واهوى الفريده=وان تركت القاف جعل تشب في قافي وقايد
يالجروح المبطيه قومي وقولي للجديده=الصدر مابه مكان يشيل من جرحي جدايد
الزمن جرّح خفوقي والحزن قطّع وريده=والقرايب يوم كثر الهم صارولي بعايد
كل جرحن من جروحي صايرن شيخ وليده=ان لفاه الهم هلا وان لفاه الحزن عايد
الفرح مثل الزهر لامن نبت جرحي يبيده=لين مل الصبر مني وانتحى عني وحايد
الله اكبر كيف هالدنيا معي صارت عنيده=القساوه لي غطاء والدمع من عيني وسايد
ان كتمت الاّه شب الاه في صدري وقيده=وان نطقته وين اروح من البشر اهل النقايد
المحبه في زمنّا صارت ياقلبي زهيده=كم خلن باع خله واشترى فيها قلايد
والوفا في هالزمن قلو هله وافلس رصيده=وان فعلت الطيب لاترجي من الناس العوايد
كيف بنسى وكيف بلقى في حياتي ماأريده=يمكن القى في النهايه بس مدفوع الفوايد