عاد في هذا الحوار اللي كان بيني وامي ياجماعة تحملوني للاخير
الوالدة البارحة كلمتها في التلفون
وقالت ها يابوك ماتركت الشعر
قلت وبصوت مستحي ومنخفض لا يمه
قالت
القطو العود مايتربى
قلت: يمه عسى ماشر
ليه تقولي لي هالكلام
قالت عودت لسالفة الشعر
وقالت: ياولدي انت ماتسمع الكلام
الف مرة وانا اقول لك اترك الشعر ...اترك الشعر...اترك الشعر
قلت لك يدعو للنفاق ويجلب العداوة من الناس والبغضاء والكره
وبعدين تكتبه عشان من
اول كنت تكتبه عشان زوجتك اللي تموت فيها
الحين انت وزوجتك انفصلتوا وتم الطلاق وزوجتك صارت اجنبية لك
تكتبه حق من اذن؟
قلت اكتبه لك ولنفسي اقلها
قالت عن نفسي انا لا تكتب عشاني
برضاي عليك ياولدي
برضاي عليك ياولدي
برضاي عليك ياولدي
اتركه
وانا الان بين نارين ومحتار
ارضاء امي اولى اكيد
ولكن الشعر نوعا ما القى فيه نفسي
اقلها الان وافقت الوالدة ان استمر شاعرا بضعة من الشهور وبعدها خلاص اوقف
يسمونها بالانجليزي
Grace period
يمكن هالموضوع مايعني احد
لكن ودي اسمع رايكم
وان كان الامر واضح ومايبي له خيارات
لكن مايمنع ان استأنس بارائكم
نسيت اقول لكم ان قبل لا تقفل الخط قالت امي خلنا من الشعر الحين
وخذ هاللغز وحاول تحله بس لاتروح لي لخويكم هذا اللي مدري وش اسمه جوجل مدري قوقل
أنشدك عن بنت صافحت كف يسراك
وان صافحت يمناك عيب وخطيه
وقفلت الخط الوالدة
هل احد يعرف الحل بس بدون الرجوع لقوقل مثل ماطلبت الوالدة
شكرا لمن مر هاهنا وقرأ