الليلة اتصلت بالوالدة وبعد السلام
قلت لها يمه صج وش قصدت بهالمقولة
عافني الخلان والصاحب بعد ملني
واتكدرت عيشتي من يوم زادي هني
قالت شفيك هذه مقولة مثل غيرها كلام في كلام
قلت لازم لها سبب
قالت مثلها مثل
عافوك ياقلب المحبين عافوك
وتبدلوا في شف غيرك وخلوك
قلت لها هذا غير وذاك غير
قالت صبه حقنه لبن.....عنبر خو بلال
وبعدين وش لك انت بهالكلام
قلت لا بس الكلام يكون احيانا بلسم على القلب
والمقولات اللي اسمعها منك يمه بلسم
قالت وبعض الكلام ياولدي جرح مايبرى
ماسمعت اللي يقول
جرح السيف ياسيف على الدواء يبرى
إلا جرح الكلام ياسيف ماله دواء
وبعدين اذا تبيني ارضى عليك اترك الشعر
قلت ليش يمه
قالت اولا يدعو للنفاق
وثانيا انت وش له تشعر
اول قلنا معليش...عشان زوجتك
الحين زوجتك هدتك وراحت في حال سبيلها
خلاص هد هالسالفة وهد الشعر
من له تشعر
قلت لك ولي ولمتذوقي الشعر
قالت عني انا اقول لك اتركه وارحل
لاتكتبه لي
اذا تبيني ارضى عنك ابعد
روح بعيد وارجع سالم
وخل الخبز لأهله لو كلوا نصه
قلت يمه انا من اهله وانت تدرين اني من اهله
قالت اقول لك ارحل يابوك
وش لك بهالخواع
هالايام صار خواع
قلت ابشري يمه قريبا ارحل
قالت متى
قلت قريبا ومالك إلا طيبة الخاطر
قالت خلاص سكر الخط انا بنام
جك....جك( صوت التلفون وهي تسكره في وجهي)