دام شعري مفخره لك يالحبيبه=بفتخر به واتفنن بالكتابه
والشعور اللي بديتي تشعري به=شاعرك قد بيّحه ذوق وذرابه
والشعر له حضرة ٍ دايم مُهيبه=ترتعد منْه الحروف مْن المهابه
لا تقولي وشْ عجب هذي عجيبه=لو تحسّين الغرام وكل مابه
والهيام اللي غزانا له ضريبه=والضريبه مْعكّره صافي شرابه
وكل بيت ٍ شارد ٍ لآجلك نجيبه=حتى لو هو في قواميس الغرابه
يكفي حرفي إنّه بحوزة لبيبه=تفهم المعنى ذهابه مع إيابه
تستقيني واستقيها دون ريبه=هي ملاك الريم والغيد اتشابه
هذا شعري سايل بوادي شعيبه=والثمار اليانعه مشروع غابه
لو أقول الشعر في لهجه غريبه=يآخذ المعنى من المبنى نصابه
صدقيني لو يجيني أو أجيبه=ما يراوح عن سؤالك والإجابه
والصحيح إنك ملاهيم وطبيبه= تجلبين الحس وتجلين الخطابه
يا مُرادي كيف ما صرتي صحيبه=والحروف الشاعريّه فيك تآبه
انتي اللي بالهوى عشقي رهيبه=وانتي اللي بالهنآ ضد الكآبه
هيّضي مشاعري رقّه وهيبه=وحفّزي كل الآحاسيس المُنابه
من صغر سني وآنا طالب طليبه=تسكن القلب المتيّم بنت لابه
حتى لو كانت بعيده أو سليبه=ترجع لأحضان حبّي كالسّحابه
غيبة ٍ أبطت ولكن بعد غيبه=ما غشاني اليآس وايماني عصابه
والفراق اللي حصل هذا مصيبه=والله يجبر كل مصاب ٍ في مصابه
أنتظرها وانتظر مافيها عيبه=ما يعيب المرء إلا ما يعابه
يا متى حلو النبا تصبح قريبه=يا متى نفرح ونقول ربّي جابه
والحقيقه كل ذرّاتي صويبه=والفكر مني غدى فاقد صوابه
والحبيبه قلبها مليان طيبه=وربّي يكتب اللقآ ويعطي جوابه
ودام شعري يسعدك أيا الحبيبه=بكتبه ولا آكبته وآخدم جنابه

’/’/

جوهر الراوي