أعزائي الكرام / في محاولة للخروج عن النمط الـ شبه معتاد 000 أضع بين ايديكم هذه المتواضعه ، برجاء أن تصل الى أطراف الذائقات " دري وش يصير لي "
في يوم وآنا مع الأفكار سرحانه = أستعرض أشياء خذت وقتي وتفكيري
أدرس تفاصيلها والنفس شفقانه = تشكي لطيف الزمن عجزي وتقصيري
القلب مشتاق والعبرات ولهانه = تتنهد الآه وتساهم بتغييري
تعيش مشهد درامي زحمة ألوانه = ترمي بتشويشها في جو تبريري
إلا وطائر شجي رفرف بجنحانه = فوق الأماني يردد صوت تذكيري
أطرب جناب النشيد بعذب ألحانه = وأطلق عتاب القصيد بصدر تعبيري
خلا المشاعر بلحظة شوق فرحانه = الله يجازي حضورك حب يا طيري
هونت غلبي علي وأخمدت نيرانه = حولت كل الحكايه فلم تصويري
كوميديا ساخره بعيون عتبانه = تنشل حطام الحزن من جوف تصبيري
راح الزعل وإعتلت ضحكات مليانه = مزح ومرح وإنسجام بجو تبشيري
يقول اهوا حبوب التوت وأغصانه = وأقول أنا أنصهر مع جبنة الكيري
ويقول كل ما ذرف دمعه من أعيانه = يدفن بقايا الأنين بدون تأخيري
وأقول أنا عكس هذا الوجد وأشجانه = من عقب هذا اللقاء ما همني غيري
تدري وش يصير لي لو كنت زعلانه؟ = تقدر تخيل غضبي وحجم تدميري؟
أشعل فتيل الهوا في جوف بركانه = وأقعد أمام الجهاز أشوف توم جيري