نص شعر اليوم مكسور وهبيط =ما يتخيّط لو بعضهم خيطوه

المخيّط ما يتحكم بالمخيط = عالعن معنى الخياط وعيّلوه

يحسبون الشعر رسمه وإتخطيط= إدعوا تحسين وضعه وأعدموه

حرّفه مشوط وعدّل به مشيط = غيّروا نهجه وقالوا حدثوه

ابتلا من يد نشيط ليد نشيط = خربوا معنى القصيد وكسّروه

ما يبون إلا المعيّر والعبيط = ومن عرف تمثيل دوره لا دعوه

لا وصلهم له فحيح وله فحيط= قدموه وبالمنصة قعدوه

يوم جاهم من طرف شخص ٍ وسيط= أيدوه وبروزوه ولمعوه

عن طريق الواسطة جاله قشيط= وقبلوه وصفقوله وأمدحوه

وقالوا إنه شاعر ٍ ماله غليط= رحبوبه بأمسيتكم وأرفعوه

وإصدقوا ما قال لوهو ما يحيط= والقصيد اللي يقوله وقعوه

وقال أنا صوتي قوي وسط الشريط= إرفعوا صوت المسجل وأسمعوه

وقام يومي في يدينه مستشيط= إنهبل يوم المهبل شجعوه

كنه اللي راثع ٍ له في غبيط= ما تعلّم للشداد ولا أعسفوه

وقال أنا شاعر وبالمعنى غويط= إفهموا معنى كلامي وإكتبوه

شاعر ٍ معروف فهمان وحويط= كل قولي يا جماعة سجلوه

وعمموه من المحيط إليا المحيط= ودرّسوه وبالمدارس وثقوه

ثبتوا شعري ترى ما هو بسيط= جوهر ٍ مكنون تكفون إحفظوه

وإتضح قوله خليط ٍ في خليط= ما يتعدّل منهجه لو عدّلوه

ما يفيد العلم بالقلب المليط= ولا يحفظ العلم لوهم علّموه

مارج ٍ مرجوج ولسانه سليط= طاير ٍ يوم المسفّه طيّروه

يحسب إن الشعر في سجنه ربيط= هجّنه واللي دعاهم هجّنوه

ولا كمل مدة سنة هفة مقيط= إندثر شعره وعشاقه نسوه