ذوقتني الحرمان ...أحمد الناصر
أول وأنا ماشري بحبك ولا أبيع
واليوم بأول سوم والله لابيعه
عقب أنتشالك لي بروس الأصابيع
رميتني بين الرجا والقطيعه
ذوقتني الحرمان سبعة أسابيع
وأشقيت نفسٍ لك مطيعه مريعه
أيام صفو الحب تآمر وأنا أطيع
واليوم لامرك والله إني ماطيعه
لاتحسب إني عقب فرقاك أبا أضيع
البيض واجد وارض ربي وسيعه
سبَّعت قلبي من محبتك تسبيع
وأقفيت عنك وسو ماتستطيعه
خذ راحتك يامصَنّع الحب تصنيع
مادام نقض العهد عندك طبيعه
من لا على صهوة جواده مصاريع
خطر يطيح ومثل هذي هزيعه
مزَّعت صورة ماضي الحب تمزيع
وأنوي على تكوين صوره فضيعه
مع من جبينه مثل نور الشعاشيع
وإلا كما برقٍ تزايد لميعه
الصاحب اللي لامري امطيع وامريع
من شان حبي كل غالي يبيعه