دام البقا بك ياسليل المجد سرٍ وجهرا=عد النجوم الساريات اللي يقدي نورها
نسل الكرام الماجدين الصاملين أسد الشرى =عون الرفيق أما الأعادي شوكةٍ في زورها
خوة وسيعين المعرفة ماتباع وتشترى =تبقى لنا كنز ٍ على مر الزمن ودهورها
صحبه على وضح النقا ماهي تلصق بالغرا=ترسي كما يرسي لعاتي الريح عالي قورها
وان كان تنشد عن علومي لاتعرضنا الزرى =يمكن علينا بعض خلق الله تضرب زورها
طارت بي اللي عـلّـقـت بي في الثريا من ثرى=ثـم وقــّـعـت في ديـرة ٍ يا نـور ربي نـورها
في ديرة ٍ تبري من العـلاّت جـرح ٍ ما برى=تنعش مضخات القلوب اللي عجز دكتورها
رحنا لديرة فاتنه فيها الحسن و المنكرا=الجو منعش والسحايب كل يوم تزورها
مدري هوى وإلا نوى وإلا على بيع و شرى=وإلا سَـرَت بي لـيـلة ٍ ما ينجـلي ديجـورها
رحنا وجينا ما لبسنا ثوب ذل ولا عرا=وبفضل ربي ما حسبنا لعدلها من جورها
وباقي علومي كان تبغيها وتعرف ماجرى=بيني وبينك لاتسمع عميها مع عورها
أحدٍ درى و أحدٍ على السجَّـات غافل ما درى=ماني مكـلّـف عند ناصرها ولا منصورها
هذا جواب اللي على بدع المثايل قد ضرى=كل البحور المدلهـمّــه قد سبحت بحورها
أفتل حبل وأنقض حبل وإعرف ترى وإعرف ترى=دقـيـت جــزلات المعــاني في فرايص زورها