بسم الله أبدأ

::::::

أجمل ليالي العمر في وصـل الهـنوف المتـرفه
يسري غلاها في الحشى مسرى الشراره في الهشيم

في ليـلةٍ غـاب القـمر في ذمّـتي إنها منصفه
واثـنى عليّ بـدر البـدور النور في ليل العـتيم

منه التعـطّف في غـنــَج وأنا عليّ التكـلفه
وأعـطيه نفحـاتٍ تـداوي عـلّة القـلب السقيم

ذكرى تـباين عودك المـيّاس لين و هـفـهفه
يميل ميل الغـصن مع نـفح الهوا عند الصريم

أنا أشهد إنا مسرفـين وخـلق ربي مسرفه
يا الله تغـفر ما مضى لي غـفور ويا رحيم

يا فايق التوصيف يا زين ٍ عجزت أوصّــفه
يا ديمة ٍ يمطر غلاها لوّ ما في الجو غيم

فتحت لك باب المحبه وانت كلك معرفه
تعرف غلاك وعارفٍ سر الجديد من القديم

كل المشاعر تحت راياتك مشت متحالفه
تعلن ولاها من مفاهيم ٍ تغـذت في الصميم

دونك ينابيع الهوى و الدلو بيدك و أغرفه
وإليا أرتويت إسق النديم اللي ورد عـدّ النديم

لا تعتذر والعذر يا سيد الغلا وين أصرفه ؟
وأنا على جال الرجى خـلّــتـني أشواقي مقيم

مانيب من ياتي على صدفه و يمكن تصدفه
أما دسَم وإلا سمَح من مَــدّة الكف الكريم

أنا ملازيم الوعد وإليا عطيته ما اخلفه
وآتي على دعوى حميم ٍ يرتجي شوف الحميم

خل الوصل يمسح مذاريف العيون الذارفه
و يعزز اركان القلوب اللي شجنها مستديم

يوم المعزه سيّـرت بعض البشر متوالفه
غصب ٍ على العذال و الواشين وإبليس الرجيم

بعض القلوب تعيش في ديره وهي متخالفه
والحب يجمع ساكن الطايف بـ سكان القصيم


((وحيـــــد الدار))