الاصايل يجنّك مثل أهلهن أصايل
والوكاد إنّها منهن بليّا كلام
واجد الزين عند الحاضره والقبايل
شفت واجد ومرّنى مرور الكرام
بس هذى وصايفها علوم وهوايل
كنّها قطعةٍ من نور بدر التمام
ياكثر ملحها والا الحلا له دلايل
حورٍ عيونها والخشم سلّة حسام
كن ذيك الخدود بروق ماتنتخايل
لا كساهن شعرها شفت برق وظلام
تعسف الخيل ونفوس البشر تنتحايل
مير خيل القصايد مايطيق اللجام
انتحيت ولقيت القلب مأمن صما يل
كل ماذعذع الغربى من الشوق هام
ياكثر مانى من الشوق والحب شايل
من عشق مثلها وشلون بالله يلام
هذى اللى حلاها مايبى قول قايل
ماهى أول غلا لاشك مسك الختام
متعب التركي