الجزء الثاني



ظلت هناء طول الليل في أرق وتفكير .. ساعة تلوم نفسها على إتاحة الفرصة له بقبولها الإضافة
وساعة تتذكر كلماته وتستمتع بحديثه .. ما هذا التناقض يارب في مشاعري ؟؟

أشرقت الشمس وهناء لم تذق طعم النوم ..فقامت وأعدت الفطور لان عبدالله على وشك الوصول من
وردية الليل في المطافئ.. وصحت اولادها وفطرتهم ودخل عبدالله وصبح عليهم وقال : شفيها أمي ؟؟

هناء : ما ادري .. شفيها.... يالله صباح خير انا توني قاعده وللحين ما نزلت ؟؟

عبدالله : ما ادري والله انا تعبان ودايخ وهي تتكلم عن الكهربا وفلوس الكهربا وما ادري شنو ؟

هناء : ما ادري وانا طالعه للدوام اشوفها ؟؟تبي شي عمري ؟؟

عبدالله : لا .. انا بنام ..حدي تعبان..حمود وعبود ...هاتوا بوسه بابا...يلا باي

نزلت هناء ومعاها أولادها وهي تسمع صوت ام عبدالله في وسط الصالة ...

هناء : صباح الخير خالتي ؟

ام عبدالله :نزلت المسعده .. هلا صبحج الله بالنور .. البارحة لين تالي الليل وليتاتكم مفتوحه ؟؟

هناء : أي خالتي كنت اسوي شغله حق الدوام عالكمبيوتر ؟؟

ام عبدالله : أي قال مال عمك ما يهمك .. انا اللي بدفع فلوس الكهربا وانتوا اخذوا المعاش وخشوه

هناء : يا حلوج يا خالتي .. تدرين قاعدين نوفر عشان يطلع بيتنا ونفكج من ويهنا ...

ام عبدالله : عسى .. متى عاد لما أموت ؟؟؟ شوفي هناؤؤؤؤؤ .. من الليلة شغل كمبيوتر وهالخرابيط
مالت دوامج سويها بالدوام .. ترى والله اطفي الميتر ..سمعتي ؟؟

هناء ( من غير نقاش): حاضر خالتي .. من عيوني ..يلا مع السلامة


وخرجت بسرعة البرق قبل ان تسمع أي كلمة اخرى منها .. دخلت الروضة وكانت وداد تنتظرها
عند باب غرفة المديرة ..

وداد : هلا والله .. ليش متاخرة اليوم ... ركضي ... مجهزين كل شي .. ابلة الموسيقى وتتاخر ؟؟؟

هناء : اللي عنده المحقق كونان بالبيت غصبن عليه بيتأخر ..

وداد : كونان مره وحده هههههههههه...شنو صاير بعد اليوم ؟؟

هناء : اخلص النشاط واجي .. ابيج ضروري





بعد انتهاء النشاط


وداد : وهذا كوب النسكافيه .. ويهج يقول ما نمتي ابد .. كل هذا من " حيزبونه "؟؟؟

هناء : لا حرام عليج لا تقولين جذي عن خالتي .. مسكينه .. هي طيبه بس لسانها .. الله يهديها بس

وداد : والتحقيق شماله اليوم ؟؟

هناء : معصبة لاني كنت اشتغل عالكمبيوتر وتحاتي فلوس الكهربا ...

وداد : من صجج ؟؟؟ بس ؟؟؟ قوليلها ترى عالبطارية يا مال الفقر

هناء: ههههههههههه عبالج تستوعب ...وبعدين الزهايمر مخليها تنسى وايد اشياء
من ضمنها ان عبدالله قاعد يدفع لها بدل الايجار اللي ياخذه..وتقول تاكلون وتمشون
ايدكم بالطوفة

وداد : هههههههههههه يحليلها .. الله يشافيها ..
خلاص جابلي اللاب توب وقطي كنبل على راسج عشان ما تشوف الليت

هناء: عاد والله امس ما طولت .. تدرين وداد .. !!!!!!!!

وداد : امبيه نبرة صوتج تخرع .. جنج بتقولين شي يخرع!!

هناء : انتي تدرين انا اقضي الليالي اللي عبدالله فيها دوام عالنت .. بالمنتدى

وداد : مو شي جديد .. شنو اللي تغير ؟

هناء : وداد امس كلمت واحد ع الماسن .. كاتب كويتي .. شخصية راقية

وداد : هبله .. من صجج .. وشنو الهدف ؟

هناء : تبين الصراحة كنت مستانسه في البداية انه طلب يكلمني
بس امس طول الليل ما نمت افكر

وداد : انتي مينونه .. انتي متزوجة !!!!!

هناء : ادري يا وداد .. ادري.. وانا ما كلمته عشان يصير شي ولا ابي منه شي

وداد : تسوين روحج ما تدرين ؟؟ الانسان لما يتعلق بأحد ما يفكر بشي غيره بعدين

هناء : لالالالا .. انا معجبة بكتاباته بس وطلبه وهقني ووافقت بعد ما راح ادش ماسن واكلمه

وداد : احسنلج يا هناء .. والله الإثم بطرف والندم بطرف ثاني .. بتتعبين..بشنو سولف معاج ؟

هناء : عن كتاباتي وسألني لو كنت متزوجة او لا .. وانه مرتاح لي

وداد : لاحوووووووووووووول ... هذي اولها .. وقولي وداد ما قالت .. هناء ابتعدي والله
تراهم يلعبون .. ويستانسون .. وما ناكلها الا احنا ...

هناء : صبر صبر صبر.. اللي يسمعج يقول انا كلمته وحبيته وتكلمنا وطلعنا وووووو
انا اعرف حدودي وداد ولما قلتلج ما قلت عشان تلوميني بس لاني استغربت مشاعري بس
وانتي صديقتي اللي اثق فيها .. و

دق جرس الحصص

وداد : صدقيني هناء لو ما تهميني ... ما نبهتج .. عندي حصه اردلج تالي


تركت وداد هناء في عالم من الحيرة .. واللوم ..

" معقوله يصير اللي تقول عنه وداد .. معقوله أحب عدنان وانا متزوجة ؟؟"
مستحييييييييييييييييييييل .. ومن سابع المستحيلات .. انا أحب عبدالله وحياتي معاه حلوه
ليش أدور أحد غيره ...؟؟؟


هبله وداد .... هبله ...


بعد انتهاء الدوام عادت هناء مع الاولاد للمنزل .. وتناولت الغداء مع الجميع وخلدت للنوم
عصرا .. بدأت في أعمال المنزل .. والغسيل وغيره ..

كانت تفكر كثيرا في ان الدخول للماسن ...وفعلت

ما ان فتحت صفحة الماسن حتى وجدت رساله من عدنان تقول " اشتقت لج " ..
وسرعان ما اغلقت الماسن واللاب توب وجلست عالبيانو تحضر عملها للغد
عزفت وعزفت ... ولم تستطع ان تمنع نفسها من البكاء ...

فدخل عبدالله ورآها تبكي فقال : هناء .. عسى ما شر ... فيج شي ؟؟


يتبع